LUNGNGAI MANGANG A KAN ṬAHNATE HI KAN RINNA TAWPNA TUR NI LOVIN RINNA BUL KAN TANNA TUR A NI ZAWK FO ṬHIN.

#ZONEWS #FIANRIAL THIṬIN THLA Ni 24, 2025 CHAWLHNI:
LUNGNGAI MANGANG A KAN ṬAHNATE HI KAN RINNA TAWPNA TUR NI LOVIN RINNA BUL KAN TANNA TUR A NI ZAWK FO ṬHIN.

Vawiin kan fianrial hunah chuan kan mimal nun zin kawngah a ni emaw, chhungkuaa kan zin kawngah a ni emaw, lungngaihna leh manganna kan tawh thin te ngaihtuah ila. Mahni mimalin emaw, Chhungkua pawhin a ni ang; tahnate, hlimna leh lungngaihna kan tawng thin a. Heng lungngaihna leh manganna karah hian rinna chuan min chawi chhuak leh thin a. Pathiana kan nihna leh nun chhan te kan hre chhuak thar leh a, kan zin kawng hi chak zawk leh nghet zawkin kan zawh phah leh thin a ni.

LALPA chuan thinlung lungchhiate chu a hnaih thin a, Rilrua inchhir apiangte chu a chhandam thin (Sam 34:18).

Kan lungngaih leh tah avang hian kan rinna hi chak lo ta viauah kan ngai thin em?

Vohbik nu leh pate tan chuan fate vanga lungngaih leh tahna lo thleng thin hi vawi hnih khat thil mai ni lovin, nitina nunpui reng thil a ni thin. Lungngaihna leh tahna chu eng tik lai pawhin Damdawiinah hmuh turin a awm thin a. Damdawiin piah lamah pawh, hrisel lohna emaw, harsatna thil dangin emaw min tlak buak tak tak chuan, engvang in nge midang ang kan nih ve theih loh, sawng ho ang saw engngati nge kan nih loh ti a, midang dinhmun hmuh that a, awh mai a awl thin. Thinlungah zawitein engvangin nge hetiang hi kan nih bik reng tihte a lo ri fo thin a ni.

Nimahsela lungngaihna leh tahna te hi rinna kan tlakchham vang a ni lova, kan natna thuk berah Amah tawk tura Pathianin min sawmna a ni zawk. Hagari khan thlaler hmun khawhar leh hrehawm takah pawh Pathian chuan amah a hmu reng a ni tih a hre chhuak a. Mahni chauha kan awm laia kan mittui tla te, kan lungngaihna tawngtainaa kan chantirte, ngawi reng a kan thinlung phurritin nasa taka min delh lai pawhin kan Pathian chuan min hmu reng a, chung zawng zawng chu a hre vek a. Lungngaihna khur thuk berah pawh Amah tawk turin min sawm renga, kan kiangah kan koh turin a awm reng a ni.

NGUN TAKIN INNGAIHTUAH ILA!
Kan lungngaihna leh phurrit kan phurhte kha ngun taka ngaihtuahin Pathian hmaah dinpuiin, rilru dik tak pua thlenin inleihbaw teh ang. Kan nun ruak hnawh khah ngai ni a kan hriatah te a hnawh khat turin Pathian sawmin dil ila. Mi dangten an hmuh loh leh an hriat loh, min ngaihsak pui lo ni a kan hriat kan lungngaihna leh tahna te hi Pathianin min hriatpuia min hmuhpui vek a ni tih hre reng ang aw.

Kan lungngaihna leh kan mittui farte hi kan rinna thuk zawka a inkaih nghehna tur lei thaah kan Pathian hian a chantir thei a ni tih hi hre reng ang u. Pathian chuan kan lungngaihna mittuite hi a thlawnin a luan ral tir dawn si lova.

ṬAWNGṬAINA
A tawp berah chuan unaute u, a dik apiang te, a zahawm apiang te, a fel apiang te, a thianghlim apiang te, a duhawm apiang te, a thangmawi apiangte – thatna reng a awm a, fakna reng a awm phawt chuan – chung chu ngaihtuah rawh u (Philippi 4:8).

Ka Pa vana mi, ka ngaihtuahnate nangma lawm zawnga tikhat zel thei turin min pui ang che. Ka vela awmte hmangaihna thinlung nen en zel thei turin min pui la, pawn lam thil lang thei ni lova, thinlung lam en zawktu i nih avangin, keipawh pawn lam landan thlir lova mite thinlunga thatna hmu thiam zel thei turin min pui ang che. Dik, tha leh thianghlim chu ngainaa chu lam kawng chu zawh zel thei turin, I thu hmangin min hriattirin min pawl zel ang che. Midang tana a tha ber duhsakna thinlung pu zel thei turin min pui la. Midang ten keimaha awm a tha ber, Isua hmel chu an lo hmuh zel theihna turin. Eng dinhmunah pawh a chhe lam ni lova a tha lam chu ka thlir zel theih nan. Midangte chhiatna ni lova an thatna lai zawk ka hmuh thiam zel theih nan. Isua hmingin ka dil e, Amen!