#ZONEWS: Lunglei atanga chhim lam panna Theiriat kawng leiminin a hnawh avangin eng lirthei mah a kal tlang thei rih lo

#ZONEWS July 9, 2025: Vawiin chhun khan Lunglei atanga chhim lam panna kawngpui chu, Theiriat kawng pheiah a min avangin Motor eng chi mah a kal tlang thei lo a. Lei hi a la tlak deuh reng avangin kawngpui then fai hna pawh thawh hleih theih a la ni lo.

Lunglei, Sethlun atanga Theiriat panna kawngchung, hun engemawti chen atanga lei nasa taka khi chu vawiin chawhma dar 10:00 vel khan a min a, leimin vang hian kawng meter 10 vel a bal tel.

Hei vang hian he kawngah hian lirthei engchi mah a kal thei lo nghal a, a hnuai kawngpui National Highway pawh chhilhin tun dinhmunah Lunglei leh Hrangchalkawn inkar chu a ping ta rih a ni. Leiminna hi Mizoram Polytechnic Lunglei, Complex thlen hma lawk a ni. Helai kawng hi NHIDCL ten kawngpui laih zau hna an thawh mekna a ni. He kawng hi Lunglei lam atanga Hnahthial te, Lawngtlai leh Siaha lam panna kawngpui niin kawng pawimawh tak a ni.

Hrangchalkawn leh Theiriat inkar hi Company lam hian an laih mek niin a nal in chirh a tam hle a, lirthei eng chi tan pawh kal harsa a ni a, Lunglei Municipal huamchhung a la ni nghe nghe a, LMC huam chhung a mi, Zobawk, Lungpuizawl leh Hrangchalkawn lam tan chuan Lunglei kal pawh a harsa in tlemlai deuh atang khan Theiriat Local Council leh NGO hrang hrang te bakah Dist Administration lam atang pawhin hnathawk chak deuh tur in Company lam hi an lo nawr tawh thin a, a sawtna hmuh tur erawh a awm hran lo a ni.

#zonews #chanchinthar #tualchhung #lunglei