PATHIAN CHUAN KAN HUN KAL TAWH A PAWISA LOVA, A KHAWNGAIHNA LEH ZAHNGAIHNA CHU MI ZAWNG ZAWNG TAN A AWM RENG NI.

#ZONEWS #FIANRIAL SEPTEMBER 09, 2025:
PATHIAN CHUAN KAN HUN KAL TAWH A PAWISA LOVA, A KHAWNGAIHNA LEH ZAHNGAIHNA CHU MI ZAWNG ZAWNG TAN A AWM RENG NI.

Vawiin kan fianrial hunah chuan Samari hmeichhia hnena, Krista a nihna, Isuan a inpuanna kha ngaihtuah ila. Isua nen an titina atang khan, Samari hmeichhia khan Isua nihna chu a hre ta a, hlim takin chu a thil hriat thar chu puangin, a Samari mi pui tam takin Isua chu an lo hriat phahin an lo rin ve phah a, ama hnen ngeiah pawh nun inthlakthlengna ropui tak a lo thleng a ni.

TUICHHUNCHHUAHA HMEICHHIA

Tin, Isuan a chhang a, a hnenah, “Tupawh he tui in apiang an tuihal leh ang; tupawh an hnena ka pek tur tui in apiang erawh chu kumkhuain an tuihal lo vang, keiin an hnena tui ka pek tur chu an kawchhungah tui hna a lo awm ang a, chatuana nun thlengin a chik chho vang,” a ti a (Johana 4:13-14)

I nun kalphung thlak dawrh thei rin loh lutuk thil i tawng ve tawh em?

Isua leh Samari hmeichhia tuichhunchhuaha an inhmuh khan chutiang thil, nun inthlakthlengna hun ropui tak chu a lo thleng a ni. Isua chu tuichhunchhuah sirah a ṭhu chawl a, Samari hmeichhia lo kal chu tui intur a dil a, Samari mite leh Judate inkara inenhranna awm chu pawisa lovin, uluk takin an titi zui ta a. Isua chuan ‘tui nung’, chatuan nunna chu pek a tiam ve thung a, chumai ni lovin Samari hmeichhia nihna dik tak chu hrilhin, hun rei tak an lo nghah tawh Krista(Messia) a nih thu chu, chu Samari hmeichhe hnenah chuan a tilang ta a ni.

Isuan Samari hmeichhia a va pawha, a titipui dan atang hian eng nge zirtur kan neih ve le?

Judaten Samari mite an endan leh, an hnam inkara daidanna bang awm pawh chu pawisa lova, Samari hmeichhia a titipui mai dan hian, Isua rawngbawlna huam chin leh A khawngaih rawngbawlna awmzia min zirtir a ni. Samari hmeichhia hun kal tawh chhuanawm loh ve tak maite kha en kanin, beiseina leh tlanna(chhandamna) kawng chu kawhhmuhin a pe a ni.

Isuan ‘tui nung’ A hlan kha eng angin nge kan thinlungah a rik ve le?

He tui nung hianin, Amah ringtu zawng zawngte hnena Isuan thlarau lam malsawmna leh chatuan nunna min pek tur chu a takin min entir a ni. Kan thlarau tuihalna leh, kan thlarau tiharh thar tura Pathian nena kan mimal inlaichinna thuk tak mai pawimawh zia a rawn tar lang a ni.

Samari hmeichhia in a thilhmuh leh hriat a sawi khan eng nge a nghawng chhuah le?

A thil tawn leh hriat avang chuan, a thenawm khawvengte hrilh turin Samari hmeichhia chu a tlan nghal a. A tawnhriat ngei thil a sawi (a testimony) chuan awmzia a neiin a sawt hle mai a, Samari mi tam tak Isua hnenah lo kalin, Isua chu an ring ve ta a ni. Pathian khawngaihna leh thutak kan chante midangte hnena hrilh ve thin hi a pawimawhin a sawt hle a nih tih he Samari hmeichhia chanchin hian min hriattir a ni.

Kan vela awmte hnenah, rinnaa kan tawnhriattte chu engtin nge kan hrilh ve theih ang le?

Kan nuna Pathian awmpuina leh kaihhruaina kan chan nia kan hriatna hun leh hmunte kha ngaihtuah ila. Samari hmeichhia ang hian, kan tawnhriat thute chuan, Isua, nun thlakthlengtu thiltihtheihna ropui tak chu zawn ve duhna  kawngah midangte a hruai thei a ni.

NGUN TAKIN INNGAIHTUAH ILA!

Kan nunthlak thlengtu kawng, Pathian nena kan intawhna hunte ngaihtuah ila. Midangte tichaka, an thlarau nun chawk tho thei tur, kan rinna zin kawng hman tawhah te kan nei em? Ngaihtuah teh ang.

Midang tuemaw hnena kan testimony pakhat tal sawina hun remchang zawngin, tu emaw hnenah i sawi ve teh ang. Chu chuan an tan chakna leh huaisenna a lo pe thei a sin.

Midangte nena kan indaidanna bang ṭhiata, rinna kawnga titina awmze nei kan neih theihna turin, huaisenna dilin i tawngtai ang u. Samari hmeichhia chanchin sawiin midang a tidanglam ang khan, kan chanchin sawi hian midangte hnenah Lal Isua Krista khawngaihna leh hmangaihna tem ve turin a hruai thei a ni tih ring tlat ang u.

ṬAWNGṬAINA

tupawh an hnena ka pek tur tui in apiang erawh chu kumkhuain an tuihal lo vang, keiin an hnena tui ka pek tur chu an kawchhungah tui hna a lo awm ang a, chatuana nun thlengin a chik chho vang,” a ti a (John 4:14).

Ka Pa van a mi, Lal Isua thute kal tlanga, ka nundan tur kawng min kawhhmuh reng thin avangin lawmthu ka hrilh a che. Tute pawh mai hi min hmangaiha; kan vun rawng, kan lo chhuahna, eng ang hun kal tawh nge kan neih tih lam ngaih tuah lovin, nang chuan khawngaihna leh hmangaihnain min kuangkuah duh vek a ni tih I thu hmanga min hriattir avangin lawmthu ka hrilh a che. Nangmah avanga ka thil hmuh, tawn leh hriatte hi midangte tan an tuihal dang char laia an tuihalna tirehtuah a lo chan theih nana mite hrilh theihna hun remchang min pein, hrilh theih turin huaisenna min pe ang che. I hmangaihna famkim leh chatuan nunna chu midangte hnena ka tawn hriat hmanga hrilh ve theih ka duh e. Isua hmangaihna tuichhunchhuah kiangah chuan midangte ka lo hruai a, I fapa leh fanute, beiseina mamawh ngawih  ngawihte, I hnena an lo kal khawm ve theih nan, Isua hmingin ka dil e, Amen!