PATHIAN HI KEIMAHNI TANA PAWIMAWH BER NIA KAN NGAIHTUAH CHANGIN ENG NGE KAN RILRUAH LO LANG TEL VE THIN LE?

#ZONEWS #FIANRIAL SEPTEMBER 01, 2025:
PATHIAN HI KEIMAHNI TANA PAWIMAWH BER NIA KAN NGAIHTUAH CHANGIN ENG NGE KAN RILRUAH LO LANG TEL VE THIN LE?

Vawiin kan fianrial hunah chuan Pathian chu eng angin nge kan lo hmuh leh suangtuah thin tih uluk takin ngaihtuah teh ang.

Engangin nge Pathian hi kan suangtuah ve thin le, Pa hmangaihtu angin nge, kan hlat taka awm roreltu angin kan ngaihtuah zawk thin le? Pathian kan thlir dan hi kan ngaihtuahna a ni satliah ngawt lova- chu chuan kan ṭawngṭai dan te, kan thlamuanna leh kan nunchhan chian leh chian loh thlengin a nghawngin a khawih danglam thei tlat a ni. Vawiinah hian chiang lo deuh nuaiha Pathian kan lo hre thin a nih chuan, chu kan hriat dan chu Pathian nihna dik tak hmangin thlak tum ang aw.

LALPA i Pathian chu i chungah a awm e, Chhandamtu tûr mi chak tak chu: Lâwmin i chungah a hlim ang a, a hmangaihna a tithar ang a, Hla sain i chungah a lâwm ang (Zephania 3:17)

Pathian chungchang i ngaihtuahin eng nge I rilruah lo awm a, eng nge i mitthla, suangtuahna leh ngaihtuahnaah i hmuh thin le?

A tira kan sawi tawh ang khian Pathian hmel kan suangtuah changin, hmangaihtu Pa hmel kan mitthlaah a lo lang thei a, tam tak chuan kan hlat taka awm roreltu hlauhawm hmel tak kan suangtuahnaah a lo lang zawk pawh a ni thei ang. Pathian kan hmuh dan leh kan ngaihtuah dan hian- kan tawngtan dante, kan nundan te leh midangte chunga kan rilru put dan, mi kan hmangaih thiam dante thlengin a nghawngin a siam vek a ni.  

Nangmahah, keimahah hian Pathian a lawm hle a ni tih hi thudik tak a ni. Zephania 3:17 chuan, ‘Hla sain i chungah a lâwm ang’ a ti a, chu a lawmna chu kan thil tih vang ni lovin  Isua thil tih tawh avang zawkin a ni.

Kan thlir danah Pathian chu kan ngai kawisawi deuh nuaih, chiang lo deuh nuaih a nih chuan rinna chu kan tan phurrit mai niin kan ngaihtuah fo mai dawn a ni. Nimahsela, Pathian chu tunge a nih chiah tih kan hriat chian chuan; thianghlim, thiltithei, kan bul maiah kan koh phakin a awm reng tih leh hmangaihnaa a khat a ni tih kan hriat chian chuan thil engkim a inthlak thleng ang.

Pathian chu nitina hriatchiana, hriat belh zel hi kan duh ve tak zet em le? Kan duh tak zet a nih chuan chuan A thute hi min kaihruaituah hmang ang aw. Pathian hnenah chuan zep nei miah lovin inpuang thin ila, Amah chu thinlung leh tihtak zetin nitinin i zawng thin ang u.

NGUN TAKIN INNGAIHTUAH ILA

Kan hun kal tawhah engtin nge Pathian chu kan lo suangtuah dan ni thin le?

Nangmahah A lawm tak zet a ni, A lawm tak zet che a ni tih i hriatna khan eng angin nge a tihdanglam ve ang che le?

Pathian nihna chu keimahniah a lo chian leh zual zel a, A hmangaihnaah chuan kan lo innghah deuh deuh theihna turin i dil ang u.

ṬAWNGṬAINA

Tin, Isuan a hnenah, “Kei hi thawhlehna leh nunna chu ka ni; tupawh mi ring chu thi mah sela a nung reng ang; nung apiangin mi ring chu kumkhuain an thi lo vang; chu thu chu i ring em?” a ti a (Johana 11:25-26)

Aw Lalpa, I thiltihtheihnate chu a va nasa tehlul em! Marthi chuan a unaupa a thih avanga a hnen I va thlen khan a lo phun a, Nang awm ni la chuan a unaupa a thih a ring lo a, I tihdam mai a ring a ni. Nang chuan, “Kei hi thawhlehna leh  nunna chu ka ni, tupawh mi ring chu thi mah sela a nung reng ang…” tiin, Mari ang maiin mi tam tak hian I nihna dik tak hi kan hre chiang lo fo thin a ni. “Kei hi thawhlehna leh nuna chu ka ni,” tiin I lo sawi tawh a. Chu thu a taka lo thleng chuan Mari chu lungngaih tahna atangin a khai chhuak a, a mit tihmen sakin Thawhlehna leh nunna I nihzia a tak ngeiin I puang chhuak a nih kha. Chu chu hmun dang atanga lo kal ni lovin, nangmah kal tlang ngeiin a lo thleng si a. Ka taksa hi lo awngrawpin lo ral vek mahsela, Nangmah ka rin avang chea ka thlarau nung leh chu chatuanin a thi dawn tawh lo a ni tih Johana 11:26 hmanga min hrilh chu ka ring e. Ka tan leh nangmah ringtute zawng zawng tana I thiltih avangin lawmthu ka hrilh a che. Thianghlim famkim hnenah chuan lawmthu ka sawi e. Beramno kan tana talhtawha chu A thianghlim e, A thianghlim e tiin I fakna hla sain I hmaah ka lo kun e, Isua hmingin ka dil e, Amen!