PATHIAN RUAHMANNA KALHA BEIH CHU BORUAK VAWN TUM ANG MAI A NI;KHAWI HMUN MAH MIN THLEN THEI LO

#ZONEWS #FIANRIAL August 08, 2025:

Vawiin kan fianrial hun chu Lal Zedekia Babulon-ho kalha luhlul tak maia a chetdan chungchang hi ngaihtuah teh ang. Jeremia’n nasa taka a vaukhan lawk chung pawhin, Zedekia chu a hel lui tlat a. Jeremia kal tlanga Pathian thuchah chu a fiah em em: Babulon-ho beih chu awmze nei lo a ni. A thuawihlohna rah chu hmuin, Zedekia chuan Babulon sipairual-ten Juda mite leh Juda ram an tichhe lai chu a mit ngeiin a hmu ta a ni.

Mahse an ngaithla duh lo va, An tukkhum chhah an chhawn a, An hriat loh nân an beng an chhu chhêt a (Zakaria 7:11).

I thunun theih miah loh dinhmunah dingin, chu thil kalh zawng chuan I lo bei ve chiam tawh ṭhin em?

Lal Zedekia chanchin hi luhlul taka mahni chhiatna lama kal ngar ngar mai entirtu tha tak a ni. Lal Nebukadnezzara chuan Zedekia chu Judaho lal atan a ruat a, lala dahtu Babulon-ho a beih avanga thil tha lo lo thleng tur a hre reng chung khan Babulon ho do ngei tumin a bei ngar ngar tho mai. Chuti chung chung chuan, Pathianin a chhanhim theih nan Jeremia chu tawngtai sak turin a ngen a. Nimahsela, Jeremia kal tlanga Pathian thu rawn hrilh chu lal Zedekia’n a hriat duh zawng tak thu kha a ni hauh lo.

Jeremia chuan Babulon-ho do chu awm ze nei lo, boruak man tum ang chauh a ni thu a hrilh ta a. Kan tum dan leh duhdan nen a inmil loh avang ngawtin vawi engzat nge thurawn fing tak takte kan lo hnawl ve tawh thin le? Chiang taka vaukhan lawk a ni chung khan, Zedekia chuan hel chu a thlang lui tlat a. Chu a luhlulna chuan ama chhiatna mai bakah Judaho tuarna nasa tak a thlen phah a ni.

I nuna thil inthlakthleng ngai chu thlak thleng duh lova luhlul taka I dodal tlat te a awm ve em le?

Jeremia chuan rinawm takin Pathian thuchah chu a sawi mai a, vuak tuarin, lunginah hial a tan phah a,. Hei hian a huaisenna leh a thuawih zia a lan chian tir hle mai. Thutak kan dawn vang emaw, kan sawi chhuah vang emaw a dodalna kan tawh changin eng angin nge kan lo dawnsawn ve ṭhin le? He chanchin kan ngaihtuah mek hian pawm harsa hle mahsela Pathian kaihhruaina aw chu kan ngaihchan a pawimawh zia min zirtir a ni.

NGUN TAKIN INNGAIHTUAH ILA!
Kan nuna Pathian hruaina kan dodal thinna laite ngaihtuah ila. A duh zawng kalh ruahmanna emaw kan duh zawng ringawt emaw luhlul takin kan lo vuan ve reng ṭhin em?

Zedekia chanchin leh, Pathian atanga finna lo hnarin a nghawng hi ngun tak ngaihtuah teh ang. Pathianin min kawhhmuh kawng chu kan tum ang emaw kan ruahman dan ang ni lo pawh nisela, kan ngaihthlaka, huaisen taka kan zawh theih nan i tawngtai zel ang u.

ṬAWNGṬAINA
lal zedekia chuan a ko chhuak a: tin, lal chuan a inah a ruk tein a zawt a, a hnênah, “Lalpa hnên ata thu eng emaw tal a awm êm?” a ti a. Tin, Jeremia chuan, “Awm e,” a ti a. A hnênah, “Babulon lal kutah mantîrin i awm ang,” a ti bawk a (Jeremia 37:17).

Aw Lalpa, Ka nun hi vuak chauha a awm a, vawn tur hre lova, boruak dapa ka inhai buai mek laiin, Jeremia ang hian I thu thianghlim Bible-a kan hmuhteah chuan finna chu chhara chutah chuan chakna chu hmuh ka duh e. Sawiselna nasa tak karah pawh zam mai lova nangma duh zawng chu ka zawn tlat theih nan. Min puitu lo kalna tur Van lam chu ka hawi tlat theih nan. Mi hringah chuan ka beiseinate chu nghat lova, lei leh Van siamtuah chauh chuan ka rinna ka nghah theih nan. Ka dinna chu min tihngheh sak la, ka thusawi leh ka nunte I ropuina puan chhuahna hmanrua a lo nih ve theihna turin. Midangte duhsakna hloh phahna tur pawh nise, I thutak chauh chu sawi a, chu chu dinpui tlat thei turin, ka Pathian duhsakna zawk ka chan tur chu ka thlir tlat theih nan. Isua hmingin ka dil e, Amen!