DARLAK LEH TUIDAM INKAR KAWNG CHHIA AVANGIN KHAWTHLANG MIPUI AN MANGANG; HACHHEK BIALTU MLA IN PUITU A MAMAWH?

#ZONEWS July 11, 2025: Tunlaiin Mizoram hmun hrang hrangah kawngpui chhia avangin NGOs/Pawl hrang hrang hmalakna hmuh tur a awm nual mai. Kawng chhe lar zingah Mamit District chhunga, Darlak leh Tuidam inkar, khawthlang lam kalpawhna kawng leh an chak lakna ber chu Social Media lamah pawh a langsar ber zing a mi a ni chungin hmalakna hmuh tur a awm lo hle.

Chawngte kawng chhia chungchangah Chawngte NGOs (YMA,YCA,Zirlai Pawl etc) an che tha hle a. Mualkhang leh Kawnpui inkar kawng chhiaah Truck Owners te, Drivers Union etc in Sorkarah demand te neiin vawi duailo Sawrkar phutin an che chhuak bawk.

Hachhek bial chhunga Darlak leh Tuidam inkar tawite, kawngpui pawimawh em em si pawh a chhe hle a. Bialtu MLA in Mizoram Sorkar hotu liante, PWD Hotute, MoRTH hotute pawh a dawrin official in lehkha pawh a thawn vek niin Social Media ah kan hmu a ni. A tul ngang tawh a niang tih ngai zen zen loh Governor meuh pawh Hachhek bialtu MLA Pu Robert Romawia hian a sawipui a, lehkha a pe nghal bawk.

Hetih lai hian Group YMA te, Zirlai Pawl te, Drivers Union te, Motor Neitu pawl leh Ruling leh Opposition Party hote chu an la ngawi thuap mai niin alang a. An khaw chak lakna kawngpui leh Mizoram khawpui ber Aizawl an kal pawhna, sawrkar hmun pawimawh Mamit DC office an dawrna ber kal hleih theih loha awm chung siin an dawh thei viau mai.

Heti taka an bialtu MLA-in hma a la chung hian, sawrkar nawra an bialtu MLA han thlawptu hi an awm vak lo nge ni a reh duk mai a. Tihtak zeta Sawrkar han nawr thawm hriattur a awm lo hle.

Mizoram sawrkar dinhmun kan hria a, Sawrkarin sumah harsatna a tawk a ni mai thei e; State khat Sawrkar meuh chuan a duh phawt chuan Company/Contractor te Emergency-a thawk tur pawhin a ti thei. Mipui nawr hun a nghak nge ni, sawrkar lam chet lakna hmuh tur a awm hrih lo. Mipuiin an nawr hma chuan eng tak tak mah a thleng lovang tih a hlauhawm. Fur a la tawp mai dawn lo.

Hachhek lam tan chuan tih tak zeta chet chhuah a hun e. Ruling Party te pawh a fawng chelhtu an nih angin mipuiin an beisei ve ngei ang le!!

#zonews #article #hachhek