BUAINA I HMACHHAWNA PHATSAN HIAL I TAWH LAI PAWHIN I TANA PATHIAN RUAHMANNA CHU RING TLAT ANG CHE.

#ZONEWS #FIANRIAL August 12, 2025:
Vawiin ni kan fianrial hunah chuan, Jerusalem tluk chhiat hnua sala an hruai bang Judaten nunphung pangngaia nung tura nasa taka an beih chungchang kha ngaihtuah ila. Gedalia chu Governor-ah ruat a ni a, remna zawngin bei mahse thah a ni a, buaina nasa zawkah an lut ta a. Johanana phuba lakna chuan an dinhmun a tikhirh zual sauhva, mipuite chu inthen darhin, a then Aigupta ramah an tlan chhia a, tam takte erawh chuan Jeremia thusawi an awih a, tlanchhe lovin an cham a, Babulon hnenah an intulut ta zawk a ni.

JUDA CHAMBANGTE
He ramah hian in awm reng chuan ka tungding ang che u a, ka thiat lo vang che u, ka phun ang che u a, ka pawt phawi lo vang che u, in chunga thil ṭha lo ka thlente chu ka sim tawh si a.
Jeremia 42:10

Eng ang thutlukna pawh siam dawn la, buaina thuk zawka luh ngei ngeina tur ni si dinhmunah I ding ve tawh em?

Sala hruai bang, Juda la chambangten ngaiawh leh tuma nasa taka an beihna hian, buaina a lo thlena mihring thinlung nihna dik tak a lo lan chhuah thin dan chiang takin a entir a ni. Gedalia kha ram awptu (governor) atana ruat a nih khan, Babulon nen remna zawngin a bei nghal a. Nimahsela, chutianga remna leh muanna zawnga a beih mek lai chuan phatsan niin, tharum thawhna nasa tak chu a hmachhawn zui ta a ni.

Gedalia chu ama thian tha nia a ngaih ngei, a hmelmaa chang ta Ishmaela’n a that a, Juda la chambangte chu buaina thuk zawkah an lut ta a ni.
Kan mi rin em em ten min phatsan ta se engtin nge kan tih ang le?

Ishmaela tualthahna chuan buaina vawikhat a thlen nghal satliah a ni ringawt lova, a indawtin buaina nasa zawk chu a thleng chho ta mawlh mawlh mai a ni. Johanana chuan phuba lak nan Ishmaela chu a that ve leh a, mipuite an chiai tak zet ta. Mipuite chu dinhmun khirhkhan tak maiah an ding ta a, Jeremia’n nasa taka a hrilh chung pawhin, Aigupta rama tlan chhiat mai tur nge, tlan chhe lova Babulon mite hnena inpek luh turah an buai em em ta mai a.

Jeremia chuan Juda mite chu Aigupta ramah tlan chhe lova Babulon mite hnena inpea intulut mai turin a ti a, chu chu an nunkhawchhuah theihna tur leh siam thara an awm leh theiha tura Pathian duhdan a nih thu a hrilh mawlh mawlh a. Chuti chung chuan, tam tak chuan Jeremia thusawi chu an ring lo a, Pathian hruaina tur chu ring lovin, anmahni ngaihdanin Aigupta ramah an tlan chhe ta tho a ni.

Buaina kan hmachhawnin, vawi engzat nge Pathian thu ngaichang miah lova keimahni duhdan leh ruahmanna hmanga inhumhim tuma kan lo kal ve tawh thin le?

NGUN TAKIN INNGAIHTUAH ILA
Kan nuna buaina leh inthendarhnate kan hmachhawnna hun leh hmunte kha ngaihtuah ila. Inremna leh inpumkhatna tur zawngin kan bei thin nge ni a, kan hlauhna leh rinlohna khan thutlukna min siamtir thin zawk le?

Juda chambangte chanchin; Pathian thu leh A hruaina an ngaihchan loh avanga thil thleng te kha ngun takin ngaihtuah teh ang. Dinhmun khirhkhan leh harsa tak pawh ni sela, Pathian duhdana, huaisen taka thutlukna leh duhthlan tur dik kan thlan theihna turin Pathian hnenah dilin tawngtai (ṭhin) ang aw.

ṬAWNGṬAINA
Tin, khandaih tihral bang tlem te chu Aigupta ram ata chhuakin Judai ramah an lût ang; tin, Juda mi awm chhun zawng zawng, Aigupta rama cheng tûra kal tate chuan tu thu nge ding zawk dawn, ka thu nge an thu an hria ang (Jeremia 44:28).

Ka Pathian, eng dinhmunah pawh ding ila, ka tana I ruat Pathian mite aw ngaichanga, ngaithla thiam turin min pui la, hmelmapa min beihna tur laka min humhim tura I tirhte lo hnuchhawnsan lo turin thinlung dik leh tha min pe ang che. Vawiina kan thu ngaihtuah a mi te ang ni lova, I ruahmanna leh I kaihhruainaah chauh innghah ka duh e. Ka tana tha tur, ka nun siamremna tur, nangmah ka hnaih theihna tur thute ka dawn sawn changin, chapona chu min hnehtir phal lo la, thuhnuairawlh taka ka dawnsawn thin theihna turin thinlung dik leh tha chu min pe ang che. Kawng dik lo lamah chuan tlan chhe lova, I kawng min kawhhmuh chauh chu ka en fo theihna turin, ka hnung lama thilawmte sala tang lova, ka hma lam thil atana Nangma hnenah ka intukluh zel theih nan, Isua hmingin ka dil e, Amen!