I INPEIH HUN NGHAH KHER A NGAI LO, I DUHA I REMTIH MAI KHA A TAWK A NI

#ZONEWS #FIANRIAL August 17, 2025:
I INPEIH HUN NGHAH KHER A NGAI LO, I DUHA I REMTIH MAI KHA A TAWK A NI

Vawiin kan fianrial hunah chuan Mari leh Josefa te, Angelten an tlawh ve ve chungchang leh Isua enkawl seilian tura thlan an nih dan kha uluk takin ngaihtuah teh ang. Mari chuan Gabriela thuchah rawn thlen chu rinna hmangin a lo dawngsawnga, Josefa chuan a hlauhthawnna hnehin thuawih a thlang ta zawk bawk. An huaisenna leh rinna hian, Pathianin mi famkim te ni lovin, a duh tak taktute, A thu anga awm remtitute a thlang thin a ni tih min hrilh nawn a ni.

THLAN I NI E
“Tin, vantirhkoh chuan a hnenah, “Mari, hlau suh; Pathian ngaihsakzawng i ni e” (Luka 1:30).

Eng emaw thil awmze nei tak tia, chutiang ang titute zinga tel ve turin mi naran ve mai engmah tangkaina nei lo tur niin kan inhre thin em?

Mari leh Josefa pawh khan mi naran leh satliah ve mai niin an inhria a. Lal an ni lova, sakhaw lama hruaitu pawh an ni hran chuang hek lo. Chuti chung chuan khawvel chanchina mi pawimawh ber, Krista enkawl seilian turin Pathianin a thlang tho a ni. Mari khan Angel hnenah khan, ‘ka tling tawk a ni’, a ti miah lo, “..I thu ang zelin ka chungah thleng rawh se,” a ti zawk a ni. Thuhnuairawlh leh inngaitlawm taka a lo remtihna khan khawvel tan chhandamna kawng a lo hawng ta a ni.

Kawng zawh tur a chiang lo chung pawha Pathian hnena duhna leh remtihna hlan a, ‘Awle’ lo tih mai theih kha eng ang nge ni a kan hriat chiah le?

Josefa pawh kha duhthlan tur pek a ni a. Vantlang nawrna, hriat chian lohna, rilru insual buai tak leh hlauhna khan a ni lo lamah a hruai daih thei a ni. Nimahsela, a mumanga vantirhkoh thusawi kha awihin, a zawm mai a ni. Mari venhima, hmangaiha, Isua kha a ma fa anga enkawl seilen kha a thlang ta a. Josefa tawngkam chhuak engmah Bible-ah hian kan hmu lem lo, ngawi rengin thiltihin, rinawm taka a thuawihna hmangin thu tam tak a sawi zawk a ni.

Hre tawk lo, thiam tawk lo, tha tawk lo nia kan inhriat avanga thiltih hreh em em te kan nei ve tawh thin em?

Mari leh Josefa chanchin hian, Pathian thlan nihna hi chona hmangin a lo kal thin a ni tih min hriattir a. Hre thiam lo chung pawha huaisen taka tih maite a ngai thin a, tawng chhuak kher lo pawhin ngawi renga a taka tih maite a ngai thin. A kohna chhangtute chu an mamawh ang zelin Pathian chuan a thuam mai thin a ni. Mari leh Josefa nun atang hian Pathian hman ni tura tihtur hmasa ber chu kan duhna leh remtihna a ni tih kan hmu thei a ni.

NGUN TAKIN INNGAIHTUAH ILA
Pathianin min ko mek nia kan hriatna zawnte ngaihtuah ila. Ngaidam turin min ko nge, midangte kaihruai turin nge, midangte rawngbawl sak turin nge, kan rinna kawnga hma thar la turin nge? Eng berah emaw min koh mekna nia kan hriat kha ngun takin ngaihtuah teh ang. Kohna chhang turin inpeih lo niin kan inhria em? Mari leh Josefa pawh kha an inpeih bik lo. An danglamna kha an thiamna leh dinhmunah a innghat lova, an rinna leh thuawihna kha a ni zawk. Harsa viau mahse, a man chu to deuh dawn mahsela, duha remti mai thinte hi Pathian chuan a hmang mai thin a ni.

ṬAWNGṬAINA
“Hmu theia kal lovin, rinnain kan kal zawk si a” (II Korinth 5:7)

Aw Lalpa, Nang nen chuan engmah hian tawp chin a nei lova, ramri pawh a awm hek lo. Theih loh a awm lo a, engkim mai hi Nang chuan I duh angin I hmang thei vek a ni. Ka hmalam hun chu hmu thei lo mah ila, Nang chuan ka ke pen tinte chu min ven sak a ni tih ka hria e. Ka zin kawng zawh tura min kotu chu Nangmah I nih avangin, I aw chauh chu ngaihthlak ka duh e. Kawng min kawh hmuh chu vawiinah hian zawh ka duh e. Nang chuan min vengin ka mamawh ang zelin min thuam dawn ti ka hre si a. I thutea rinna nghatin ka duhna leh remtihna chu ka rawn hlan e. Isua hmingin ka dil e, Amen!