“MILEM BIAKNA CHUAN HIM NIA INHRIATNA A THLEN VE THEI A, NIMAHSELA, THLAMUANNA TAK TAK CHU PATHIAN CHAUHIN A PE THEI.”

#ZONEWS #FIANRIAL July 24, 2025:
Vawiin chu Lal Ahaza, Judate milem biakna leh sualna hrang hrang tihnaa hruai luttu roreltu chanchin ngaihtuahho ang aw. A pa Jothama ang lo tak maiin, Ahaza chuan Pathian chu a hnawl a, an ṭhenawm ramte leh Israel lal sualte kawng chu pawmin a zawh ta zawk a. Ramdang pathiante hnenah ama fate ngei hlan hial khawpin a kal sual fawr nasa a ni.

2 Chronicles 28:19
Juda lal Ahaza khan Judate dik lo takin a timualpho fo va, LALPA chungah thil sual nasa tak a tih avâng khan LALPAN Judate chu a titlawm a ni.

A hnu lawka a nghawng chhuah thil ṭha lo te hmachhawn leh turin, Pathian hnen atanga hruai bo thei che thutluknate i siam ve tawh ṭhin em?

Lal Ahaza chanchin hian, Pathian kaihhruaina kan hnawl a nih ngat chuan kawng kan bo thui theih zia min hriat nawn tir a ni. Jothama fapa Ahaza chuan a pa diknaa thil ti ṭhin hniakhnung chu zui lovin, Israel leh an thenawm milem betu lalte sual thiltih dan chu zirin, Judate chu milem biakna leh sualnaah a hruai lut ta zawk a ni.

Engvangin nge mite hian Pathian dik tak hre reng chung siin, him nia inhriatna ngaihthatna diklo leh milem pathiante lam an hawi fo tho ṭhin ni ang le?

Ahaza milem biakna kha a nasa tawh lutuk a, ama fate ngei kha ramdang pathiante hnenah khan a hlan hial a ni. Engmah pawisa lova a thil tih leh sualna nasa tak a tih chuan nghawng tha lo em em mai a rawn hring chhuak ta reng a. Pathian chuan Judate chu an hmelmaten an rawk leh tihchhiat a phal ta a, chu chuan sala tanna leh thihna nasa tak Judate chungah a thlen ta a ni.

Eng kawngahte nge Pathian i hawisan vanga a hnu leh harsatna i tawn ve tawh ṭhin?

Ahaza chuan hremna a tawk ngei mai a, nimahsela, Pathian zahngaihna chu a la awm reng tho a. Thil tisual ve lote venhim chu Pathian chuan a tum tlat avangin, mipuite kawng dik lova hruai ṭhintu roreltu diklo leh pamham tak takte chu a la bo mai thin a ni. Pathian chuan thununna a lek rualin, zahngaihna a lan tir ṭhin a, siam thar lehna turin hun remchang a pe leh ṭhin.

Ahaza chanchin hian kan nun hi, milem chi hrang hrang emaw, him nia inhriatna, mahni tawka ngaihṭhatna emaw lakah inenfiah fo turin min hrilh a ni. Pathian hnena kir leh a, a ngaidamna leh kaihhruaina zawng tura min kohna a ni. Pathian thununna chu na ṭhin mahsela, A hmangaihna lan tirtu leh, min siamthaa A hnen lama min hruai kir lehna hmanrua a lo ni ṭhin.

NGUN TAKIN INNGAIHTUAH ANG AW!
Kan nun kawngah hian, Pathian huang pawn lamah thil awmze nei emaw, himna ni a kan hriatte hi kan zawng ve ṭhin em? Kan thil chin ṭhan leh tih ṭhin te, inlaichinna te, ka tana milem biaknaa lo chang thei thil hrim hrimte ka lo um ve ṭhin em le?

Heng milem biakna thilte hi hria a, paih bova, kan rinna leh thahnemngaihnate Pathian hnen lama pe kir leh thei turin finna leh chakna dilin ṭawngṭai ṭhin ang aw.

ṬAWNGṬAINA
A mangan lai takte pawh chuan he lal Ahaza hian LALPA chungah thil a la tisual deuh deuh ta mai a.
– 2 Chronicles 28:22

Ka Pa van ropui a mi, kehchhiat vekna chanchin kal tlanga tlanna chanchin min hrilh avangin ka lawm e. Juda Lalte kal tlangin, famkimlohna leh diklohna lo thlen hnuah pawh min la hmang thei cheu a ni tih min hriattir avangin ka lawm e. Lalte chanchin atang hian, ka duh phawt chuan, keimahah leh keimah kal tlang hian hna i thawk thei a ni tih min kawhhmuh a. Hmelmapa thanga ka awh loh nan, Nang chuan rilru dik lo leh lal pamhamte awm dan I tarlan avangin i hming chu ka fakin ka chawimawi a ni. Vawiinah hian pathian dik lote lamah ka rilru ka seng ngai lovang tih ka puang a. Pathian fate kal kawng daltu ni lo va, Lalpa hmanrua ni zawk turin ka rawn inhlan thar leh e. Thlarau thianghlim hriak thihna leh thiltihtheihna chuan keimah kal tlangin, duh tak taktu thinlung chu Pathianin a hmang thin a ni tih miten an hriat theih nan rawn lan tir ang che, Isua hmingin ka dil e, Amen!