PATHIAN TANA HUAISENNA CHU HLAUHNA AWM LOHNA A NI LOVA, RINNA AVANGA HLAUHNA HNEH ZELNA HI A NI ZAWK.

#ZONEWS #FIANRIAL August 18, 2025:
PATHIAN TANA HUAISENNA CHU HLAUHNA AWM LOHNA A NI LOVA, RINNA AVANGA HLAUHNA HNEH ZELNA HI A NI ZAWK.

Vawiin kan fianrial hunah chuan Lal Nebukadnezzara leh rawhtuina meipui chungchang ngaihtuah ila. Sadraka, Mesaka leh Abednagoa te khan rangkachak milim an biak ve duh loh avangin rawhtuina meipuiah paih luh an ni a. Nimahsela, Pathianin mak taka chhanhimin, rawhtuina meipui sa lutuk pawh chuan an lakah engmah a ti thei lo a ni.

LAL LEH RAWHTUINA MEIPUI CHU
Kan Pathian, a rawng kan bâwl ṭhina chuan rawhtuina meipui ata min chhanchhuak thei si a, i kut ata pawh, aw lalber, min chhanchhuak mai ang (Daniela 3:17).

I rinna fiaha awmin, chu fiahna hmachhawnna hmunah chuan i awm ve tawh thin em?

Meipui hmanga tihhluma an vau lai pawhin, Sadraka, Mesaka leh Abednagoa te chu an rinnaah an ding nghet tlat a. An rinna nghing mai mai lo avanga thil lo thleng khan, kan nunah ngei pawh Pathian awmpuina leh venhimna kan chang ve thei a ni tih min hrilh nawn a ni.

Sadraka, Mesaka leh Abednegoa te chuan thih leh dam chungchanga thutlukna siam ngei ngei ngai an hmachhawn a: Pathian tan rinawm takin an ding nghet dawn nge, Lal Nebukadnezzara rangkachak milim chibai an buk zawk dawn? Lal Nebukanezzara thu zawm ai chuan an rinnaa nghet taka din chu an thlang ta zawk a. Rawhtuina meipuia paih luh an nih khan an tawpna hun a thleng ta niin a lang a. Nimahsela, meipui zingah chuan Pathian an hnenah a awm a, an natna tur lakah a chhanhim tlat a. He thil thleng mak tak mai hian, Pathian thiltihtheihna leh rinawmna chu thian thumte lakah chauh ni lovin, Lal Nebukadnezzara leh Babulon mite zawng zawng hnenah a tar lang a ni.

Kan rinna avanga dodalna kan tawhin eng tin nge kan chhan let ve ang le? Hrehawmin nuam lo viau dawn mahsela, kan hmachhawn tura chu chiang chiah loin lang mahse nghet takin kan ding ve thei ang em?

He chanchin hian, dinhmun harsa leh khirhkhan berah pawh Pathian venhimna chu ring tlat turin min fuih a ni. Dodalna kan hmachhawn pawhin kan rinnaa ding nghet tlat tur khawpin Pathianah rinna kan nghat ngam ang em? Sadraka, Mesaka leh Abednegoa te chanchin hian, Pathian chu kan hun khirh khan ber ber, meipui karah pawh kan hnenah a awm reng zia leh, Amaha rinna kan nghah zia hmutute thinlung chu A thiltihtheihna chuan a tidanglam thei a ni tih min hriattir a ni.

Vawiinah hian kan rinna tichak turin engtin nge hma kan lak ve ang le? Pathiana kan rinna chu a nghing ngai lo a ni tih midangte hnena hriattirtu engtin nge kan nih theih ang?

NGUN TAKIN INNGAIHTUAH ILA
Kan nun hman mek enfiah ila, kan rinna, thil eng emaw avanga kan tihdanglama kan tihchhiat mai theihna lai turte ngaihtuah bawk ila. Thil nuam lo tak emaw, midangte lawmloh zawng tak emaw pawh nisela, kan rinnaa nghet taka din a ngaihnate a awm em le?

Hun harsa berah pawh Pathian chu kan hnenah a awm zel thin a ni tih hriain, kan nun kawng atana Pathian ruahmanna chu ring tlat zel ang u.

A kaihhruaina chu zawng zel ila, kan rinnaah nghet taka kan din tlat theih nan huaisenna dilin tawngtai zel ang aw.

ṬAWNGṬAINA
Ani chuan, “Ngai teh u, mi pali phelha mei laia vei vei a, na hauh lovin ka hmu a, a palina landan phei chu pathiante fapa ang a ni,’’ a ti a (Daniela 3:25).

Aw Lalpa, Nang chu danglam ngai lo Pathian I ni a, I ropuina leh thianghlimna hmaah chuan tumah reng an ding thei si lo. Engkim hi I thuhnuaia awm a ni a, I thiltihtheihna chuan huap zawh loh leh tihtheih loh reng a nei love. Engmah hian I ropuina leh thiltihtheihna chu an hneh thei lova, an luahlan thei hek lo. Aw Lalpa, Sadraka, Mesaka leh Abednegoa te hniakhnung zuia, eng milem hmaah mah kun lo turin, vauna leh vauthlemna karah pawh nghet taka din tlat ka duh e. Rawhtuina meipui karah pawh ka nun hi lo awm mahsela nangmah fak zel che ka duh e. Hun harsa ber atang pawhin nang chuan min chhanchhuak thei a ni tih ka hria a, min chhan chhuak dawn lo mahla, Aw Lalpa, Daniela thiante pathum ang hian, nangmah chauh hi fak leh chawimawi zel che ka duh e. Isua hmingin ka dil e, Amen!