HMANGAIHNA, KHAWNGAIHNA LEH ZAHNGAIHNAA KHAT THINLUNG CHUAN PATHIAN THINLUNG A ENTIR A NI.

#ZONEWS #FIANRIAL August 23, 2025:
HMANGAIHNA, KHAWNGAIHNA LEH ZAHNGAIHNAA KHAT THINLUNG CHUAN PATHIAN THINLUNG A ENTIR A NI.

Vawiina kan fianrial hunah chuan Isuan Pharisaite a hauh chungchang kha ngaihtuah ila, Pharisaite khan lainatna leh zahngaihna, khawngaihna leh hmangaihna ai khan puithuna leh an tihdan vel kha an ngai pawimawh zawk a. Michanhai leh hnuaihnung zawkte, natna tuarte tana Lal Isua khawngaihna leh zahngaihna thinlung khan keini pawh chutiang mite chunga zahngaihna lantir zel tur chuan min fuih thar zel sela, Lal Isua thinlung ang pu ve thei turin Lal Isua ke bulah zir zel ila. Rinna dik tak chuan a lan dana mawi ringawt mai piah lamah khawngaihna leh zahngaihna lantir zel turin min ko si a.

“Choâk hi, a note ei tûr tlachham a, Pathian hnêna an hram lai leh An vahvaih laiin, tuin nge chaw pe?” (Job 38:41).

Mi chanhai leh hnuaihnung zawkte kan tawn changin eng angin nge kan rinna chuan anmahni tan nghawng a neih ve thin a, eng angin nge kan ka rinna chu chutiang mite chungah chuan kan lan tir ve thin? Lal Isua chuan, puithuna leh an tihdana nghet taka ding nimahsela zahngaihna leh lainatna tlachham leh si Pharisai hote chu a hauin a zilh a. Anni chuan a lan dan leh mawina, dan thuin a ziah angte kha an ngai pawimawh em em. Nimahsela, Lal Isua chuan thinlunga hliamte, vantlang duh lohte, mite ensan zawk te khawngaihna leh lainatna, a taka hmangaihna lantir kha a lan dan maia mawina aiin a ngai pawimawh zawk si a. Chung ang mite chungah chuan an nihna leh an hnam emaw, vantlangin an ngaihdan tur emaw lam ngaihtuah lovin, khawngaihna leh hmangaihna a lan tir thin a ni.

Kan rinna laimu leh tihtur dik tak theihnghilhin vawi engzat nge a lan dan leh mawina, puithunaah kan lo buai ve tawh thin le? Kan ruahmanna, chapona leh kan tihdan thin avangin chung ang mi puih mamawh ngawih ngawihte chu vawi engzat nge kan lo en kan ve tawh thin? Khawngaihna leh hmangaihna tel lo rinna chu a kawrawng mai a ni a, vervekna thil tih mai a ni tih Lal Isua hian Pharisaite a hauhna hmang hian min hrilh nawn mawlh mawlh a ni. Pharisai ten khawngaihna leh hmangaihna lantir duh mang si lova dan hmanga inthununna ringawt ngaihtuahna, vervekna thinlung an neih chu Isuan a hailan sak a ni.

Lal Isua hian keimahni nun ngei pawh inbih chiang fo turin min duh a. Lal Isua duh zawng, khawngaihna leh zahngaihna, hmangaihna te kan lan tir avangte, a dik leh a tha chu kan tih avang tea midangte sawiselna tuar te kan huam ve em le? Tihdan ni lova hmangaihna hmasak tir zel zawk turin kan huaisen tawk ve ang em? He chanchin hian kan rinna tak tak chu, eng tianga mawiin nge kan lan tih lam ni lovin, engtiang chiahin nge kan hmangaih tih zawkah a chiang thin a ni tih min hrilh nawn a ni.

Keimahni inzawt ta ila: Kan nuna lo tel ve te, hmangaihna, khawngaihna leh zahngaihna hmanga kan tuam dam ngaite an awm em? Kan lo tih thin dan leh dana kan lo neih thilte hian Lal Isua hmangaihna tak tak kan nunpuia kan lantir tur lakah min dal thin em le?

NGUN TAKIN INNGAIHTUAH ILA!
Rinnaa kan zin kawng zawh tawhte kha ngaihtuah teh ang. Kan puithuna leh tihdan emaw, kan landan emaw ten khawngaihna, zahngaihna leh hmangaihna an hliah khuh hun leh hmunte a awm ve tawh thin em?

Kan lo ruahmansa emaw, kan lo tih thin dan emaw tibahlaha tidanglam tur pawh nisela min mamawhtute hnen chu i thleng hmasa phawt zel ang u. Lal Isuan a lo tihtawh thin ang a, a mamawhtute tan zahngaihna leh hmangaihna thinlung kan neih theih nan dil ang u. Pathian ngaihsak anna aia khawngaihna leh zahngaihna ngai pawimawh zawk zela Krista kut leh ke ni turin tan ila zel ang u khai.

ṬAWNGṬAINA
Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, felna zirtir kawngah te a sawt bawk a ni; Pathian mi chu hna tha tinreng thawk tura kim taka inthuamin a famkim theih nan (2 Timothy 3:16-17).

Aw Lalpa, Nangin min hmangaih avangin ka hmangaih che a, nitina hmangaih zual zel che a, I chanchin hriat belha hriat chian zel ka duh e. Nangmahah chuan kawng tinrenga nitina than zel ka duh e. Vawiinah hian I thute avangin lawmthu ka hrilh leh a che. Ka kawngte min tihen sak thin a. Nasa takin I thu chuan min zirtirin, kawng dik chu min kawhhmuh thin. Min thununin a dik zawk chu min hriattir thin a. Chona tinreng hmachhawn thei turin min thuam chakin min buatsaih thin a. Ka tluk chang pawhin, ka tihsual chang pawhin I thute chuan min kai thovin a dik zawkah chuan min hruai leh thin si a. Kawng dik lova kal lova kawng dik chu zawh zel thei turin Nang chuan I thute hmangin min hruai zel thin. Nangmah nena nitina hun hman zel ka duh a. I khawngaihna leh zahngaihna, hmangaihna chu keimah kal tlanga miten an lo hmuh ve zel theh nan, Isua hmingin ka dil e, Amen!.