BEISEINATE CHU BEISEI LOHNA BER HMUNAH TE A RAWN THLENG THIN.

#ZONEWS #FIANRIAL AUGUST 29, 2025:
BEISEINATE CHU BEISEI LOHNA BER HMUNAH TE A RAWN THLENG THIN.

Vawiin kan fianrial hunah chuan Isua pian chung chang kha ngaihtuah leh teh ang. Mari leh Josefa te chuan khualbuk an chan ve tak loh avangin, Isua kha ran inah an lo lawm a ni tih kan hria. Berampute leh Sumeona te chuan Isua chunglam hna, a tihtur kha an hriatpui a ni tih kan hre thei a ni. Min tlantu bul tanna tlawm tak leh Pathian thutiam, zawlneite hmanga a lo puan lawk tawh A tihhlawhtlinna chanchin chu he chanchin atang hian kan hmuin kan hre thei a ni.

ISUA PIAN THU

I chhandamna mi tin hmuha i siam kha Ka mitin a hmu ta e; Jentailte hnena i eng puang chhuak tur leh I mi Israelte ropuina tur chu,” a ti a. (Luka 2:30-32).

I beisei lohna ber hmunah te i thil beisei kha i hmuin i chhar ve tawh thin em?

Mari leh Josefa Bethlehem zin khan harsatna hrang hrang an tawk a. Chhiarpui nei tura kal mipui zi nuaih nuaih karah khan ranin naran leh tlawm tak mai, Mari’n Isua a hrinna hmun chu thlen nan an hmu ve hram a. Bul tanna tlawm tak ni mahsela, khawvel chatuan atana thlak danglamtu, kan Chhandamtu lo thlenna hmunah chu hmun chu a chang ta a ni.

Dinhmun khirh leh tlawm taka kan awm lai hian Pathian kan hnenah a awm niin i hre ve thin em?

Berampute, vantlang mit hmuha dinhmun hniam takte chu Isua pian chungchang van lam thupuan dawng hmasa bertute an ni a. Thupuan an hriat veleha an tihnghal chu, Lal thar lo piang zawn chhuaha chibai buk a ni. Kan dinhmun leh nihna thliar lovin, Pathian thupuan chu mi zawng zawng tan a ni tih an rawn tarlang chiang hle a ni.

Beramputen thupuan ngai pawimawha Isua an zawng nghal chuk chuk mai khan kan  nunah eng nge min zirtir ve nia kan hriat le?

Beramputen Isua chibai buk ngei an duh tak takna leh an hlimna hian, kan nitin nuna Pathian hnathawh hriat a lawm taka lo pawm zel pawimawh zia min zirtir a ni. Ni riat hnua Temple-a Isua an va kalpui chuan, Pathian tana mi inpe tak mai, Sumeona chuan Isua chu Pathian thutiam anga lo awm Messia a ni tih a lo hre nghal a. Mi zawng zawng tana chhandamna leh eng a la rawn thlen tur chungchang, Isua’n a hlen ngei tur thil a lo puang chhuak a nih kha.

Nitina Pathian nena kan len dunna kawngah, Sumeona rinna hian eng tin nge min chhem nung thara phurna leh tha thona min pek ve theih ang?

Sumeona chuan rei tak a lo nghah tawh Isua chu a tawk ta a; Kan dawhtheihna leh kan rinna te Pathian thutiama nghah tlat pawimawh zia min hriattir nawn a ni. He chanchin hian, kan chhehvel piah lam en nachang min hriattir sela, Pathian hnathawh dan kawng ropui tak chu dinhmun leh hmun awm ang lo tak takah te a lo thleng thin a ni tih min hriat thar tirtu atan i hmang ngei ang u.

NGUN TAKIN INNGAIHTUAH ILA!

Isua pian dan dinhmun tlawm tak kha uluk takin ngaihtuah nawn ila.

A harsat vang emaw, a awlsam leh a naran em vang emawin kan nuna Pathian awmpuina chu kan lo en kan ve tawh thin em le?

Kan dinhmun tlawm leh naran tak maia Pathian kut hnathawh chu hmu thiam thei turin kan hun i hmang thin ang u.

Berampute leh Sumeona ten duh tak takna leh rinna tak tak thinlung nena Isua an zawn dan chungchang hmanga Pathianin zirtirna min pek hi keini pawhin kan nunah la lutin i pawm ve ang u.

ṬAWNGṬAINA

Tin, a fa tirah mipa a hring a; puanin an tuam a, khualbuka an len ve tak loh avangin ran chaw pekna thlengah a muttir a (Luka 2:7).

Aw Lalpa, Nang chu engkim siamtu I ni a! Ka nun atan nang chuan ruahmanna min lo siamsak tawh a, chu I ruahmanna chhungah chauh chuan kal a awm zel ka duh e. Min kohna chu ka chhehvel thil ten an tihdanglam loh nan, thu tak chauh chu min hruaitu atan hman ka duh e. Ka bul tanna tlawm tak chu ka tawpna tur a ni lo tih ka hriat avangin lawmthu ka hrilh a che. Ka zui Lal Isua angin nang chuan chhan neiin min ko a ni tih ka hria a, eng ang dinhmunah pawh bul tan mah ila, Nang chu ka hnenah I awm a, ropui takin min hlen tir dawn a ni tih ka hria e. Isua hmingin ka dil e, Amen!