MOTOR KAL HLEIH THEIH LOH KHAWPA KAWNG A CHHIAT LAIA MOTOR THAR LO LEI FO MAI HI!; Tuidam – Darlak siamna atana sum dah aiin CM Motor leina man a tam zawk?

#ZONEWS Editorial July 21, 2025: Beiseina sang tak nen sawrkar thar kan thlir a, mipui laka an inzawrhna avangin kan beisei a sang em em a ni. An inzawrhna chu kan sawi nawn tawh lo ang! Kan beseina erawh beiseina tham ral a chang mek em ni le?

Kan chak lakna kawngpuite hman hleih theih lohin a chhia a, khuarel chhiatna vang a ni hauh si lo. Chutihmek laiin CM motor lei thawm kan hria a. Aizawl-a mi ang chiah kha Delhi lamah pawh CM pual bik turin lei a ni tihte kan hre leh zel bawk a. Party-in a bualat chauh loh te chu kan meng kawk kawk a ni ber e.

Kawng chhiat thawm kan hriat rualin, motor khalhtu pawl thenkhatten kawngpui a chhiat lutuk avangin tlan an tum tawh loh thu kan hre zui a. NHIDCL leh Mizoram sawrkar Department pakhat inpuhtawnna kan hre zui a. Party pakhatin thangthat lak tumin hma an la a, hma an la tak tak te pawh a ni mahna le! Nimahsela, Oil phur tanker hovin a hnu ni rei loteah tlan an tum tawh loh thu an chhuah khum zui ta tho a ni.

Hmuntinah motor a tlu a, a let het hut mai a. Khawthlang lamah Darlak leh Tuidam inkar tlan hleih theih loh khawpin a chhe bawk a. Khawthlang lam an mangang au thawm pawh a ring hle mai! Hachhek MLA pawhin Governor hmuin hmalak sak turin a ngen hial, Governor-in theihtawp a chhuah zui a. PWD changtu Minister-in kawng chhiatna hmun a tlawh thu kan hre chho zui a. Darlak-Tuidam kawng chhia siamna turin cheng nuai 20 dah a nih thu a puang a. Nimahsela, khawthlang lam mipuite lung a dam thei lo.

Midang motor thar lei leh leiloh lam chu kan hre lo a, kan ram hotupa ber erawhin Aizawl-ah motor thar a lei thawm kan hria a, a thlalak kan hmu bawk a. A hnu lawkah Aizawl a mi ang chiah chu, CM pual turin Delhi lamah lei a nih thu kan hre leh a, a thlalakte pawh kan hmu ve leh bawk. CM motor thar leina man em pawh phak lo, Khawthlang lam Mizo mipuite chak lakna kawngpui siamna tur han ruahman hi chu satah chhuak pek ang lek a ni mai te pawhin a hriat.

Mizoram sawrkar hian ngaih pawimawh hmasak tur hi a hriat a ngai tak zet mai. Motor thar ai chuan a tlanna tur kawngpui tha kha mamawh hmasa zawk chu a ni a. Heng intihropuina lem ai chuan Mizoram ei leh bar kan chawk luhnate hi ngaih pawimawh tur a ni.

Thuneihna fawng vuantu kan CM-te leh PWD minister-te hi Mizoram chhunga awm ve tho an ni a, Mizoram fur leh thal, khaw awm dan zawng zawng hre ve vektu an ni. A hun laia an chet loh avanga hetianga harsatna tawk ta hi kan ni tih tute pawhin kan hre tlang vek. Chuvangin a hun laiin, ngaih pawimawh hmasak tur ngai pawimawh tawh sela. Anmahni thlangtlingtu mipuite hi ngaihsak hmasa phawt tawh rawh se.

Thil tha tih kawngah chuan kan thlawp zel ang. Chutih rualin kan thikthu pawh a chhe tawlh tawlh a ni tih hi a fawng chelhtute hian an hriat chian hle a ngai a ni.