NUN HI RIT EM EM NI A KAN HRIAT HUNAH, LAL ISUA PHUR ERAWH A ZANG TIH KAN HRE RENG DAWN NIA.

#ZONEWS #FIANRIAL August 16, 2025:
NUN HI RIT EM EM NI A KAN HRIAT HUNAH, LAL ISUA PHUR ERAWH A ZANG TIH KAN HRE RENG DAWN NIA.

Vawiin kan fianrial hunah chuan Lal Isuan taksa leh thlarau tidam turin thiltihtheihna a nei a ni tih hi ngaihtuah nawn leh ila. A thilmak tihte khan Pathian fapa a nih zia leh Amahah khan Pathian a awm a ni tih a tarlang a, mi tam tak rinna a tichak a, tam tak erawh chu an dodal bawk a. A thiltihtheihna a lan tir satliah mai ni lovin, A zahngaihna leh thlamuanna chu a taka chang turin mite a sawmna a ni. Isua chu mi tlusawp tawhte kaitho a siamtha leh tur leh chaute tana beiseina nung pe turin a lo kal a ni.

KA PHUR CHU A ZANG A NI
Lungchhiate chu a tidam a, An hliamnate chu a tuam thin a (Sam 147:3).

I nun phurrit chu phurh zawh rual lohva rit nia hriat chang i nei ve tawh thin em? Lal Isuan kan phurrit zawng zawng chu a hre vek a, min hriatthiampui vek a. Matthaia 11:28-30 hmangin min sawm vek a ni: “Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u,” A ti. A tihdamna chu taksa natna atan chauh a ni lo; lungngai beidawng, tlusawp tawh leh, rilru leh thlarau lama phurrit nasa tak neite tan a ni.

Vawiinah hian kan nunah phurrit phur niin kan lo in hre ve em, ritphurh kan lo nei ve em le?

Lal Isua tihdamna maktak mai hian Pathian atanga a thuneihna leh A zahngaihna thinlung chu a takin a entir a ni. Mitdel te tan mit varna a thlen atanga mitthi a kaihthawh thlengin, heng a thil mak tih tinte hian zirtirtu satliah mai ni lovin Pathian fapa a nihzia leh Amahah chuan Pathian thiltihtheihna a awm a ni tih an puang chhuak a ni. Isua thilpek ropuiber chu taksa damna hi ni mai lovin thlarau hahdamna leh chawlhna min tiam hi a ni. Kan phurritte a hnena thlen turin min kova, kan phurritte chu thlamuanna leh hahdamna in a lo thlakthleng dawn a ni.

Kan nun kehchhiat vek tawhna leh kan natna zawng zawngah Isua hi kan ring tawkin, min chhawk turin kan duh tak zet em le?

Lal Isua ringa a hnung zui avang hian kan nuna harsatnate a kiang nghal duak dawn tihna a ni lova, Isua nen chung harsatnaah chuan kan kal dun dawn tihna a ni. Kan phurte chu min phurhpuiin a tizang thin a, kan zin kawngah hian A khawngaihna leh zahngaihna, chakna leh tihdamna famkim chu pek min tiam a ni. Harsatna nen nasa taka kan inbuan mek a ni pawhin, vawiinah hian Lal Isua hnenah kalin Amah nen hun hmang ang u hmiang.

Lal Isua chawlhnaah chuan kan chawlh a, A muanna chu kan chan theihnan engtin nge hma kan lak ve ang le?

NGUN TAKIN INNGAIHTUAH ILA!
Kan phurrit phurh mekte ngun takin ngaihtuah ila. Kan phurrit phurhte rit lutuk ni a kan hriat leh kan nun a tichau nia kan hriatte a awm em? Lal Isua chu siam tha leh tur leh tidam turin a chak tawk a ni tih ring ila, A hnenah kan puma inhlanin, tawngtaina hmangin tlu lut phawt mai ang u hmiang.

Kan nuna rit kan tih, kan buan thilte chu Pathian hnenah la bo tura thlen chungin a bo ngei theihnan tan ila ang aw. Nitinin Matthaia 11:28-30 thu hi chhiar chungin Pathian rinawmzia leh rintlakzia hi ngaihtuah ṭhin ang u. Kan mangannate chu A thlamuanna thu chuan thlakthleng phal ila, A chakna chu kan hma lam kawng hruaitu atan i hmang ang u.

ṬAWNGṬAINA
Tin, Pathian hmangaihtu, amaha ruat anga a kohvate tan chuan, an thatna turin engkimin a thawhsak hlawm thin tih kan hria; (Rom 8:28).

Aw Lalpa, ka nunah leh ka thinlungah nang chuan tawp lovin hna i thawk reng a, ka thatna turin engkim I tithin tih ka hria a, lawmthu ka hrilh a che. A landan chu eng pawh lo nise, ka ngaihtuah dan chu eng ang pawh lo ni rawh se, eng dinhmunah pawh I rintlak a ni tih ka hria e. Nang chuan min hmangaih avangin keipawhin ka hmangaih che a. Nang chuan min kovin min thlang tawh a. Nangmahah chauh chuan hmalam hun leh beiseina chu ka nei a ni tih ka hria e. Nangmah chu ka nun chhan I nia, Nangmahah chuan chanvo ka nei a ni. Chungte chu ka hnen atangin tuman an la bo thei hek lo. Nun thar min pe a, chakna thara min thuam avangin ka lawm e. Ka tana thil tha leh ropui tak takte chu I nei a ni tih ka hria e. Ka hmaa harsatna ka buan thinte hneh thei turin nang chuan ka mamawh engkim min pe a, Lalpa ka lawm e. I kohna chhang thei turin nang chuan nun tam min pe a, thil hrang hrang min tawntir a, I thute chuan min thuama. Nang chawimawi che hi ka hlimna a ni a, I Lalram rawngbawl hi, Lalpa, ka lawmna a ni e. Beiseina mamawh leh fuihna mamawh midangte vawiinah hian min hmuh tir la. Nangma kawngah chuan ka hruai theih tur leh ka fuih theih tur mite nangin min hmuh tir ang che. I thlarau malsawmna min pek hi an hnenah ka lo sema ka lo pek ve theih nan, Isua hmingin ka dil e, Amen!.