“HLAWHTLINNA KAN CHANTE MAHNI ROPUI NAN NI LOVIN PATHIAN ROPUI NAN LO NI ZEL ZAWK RAWH SE”

#ZONEWS #FIANRIAL July 30, 2025:
Vawiina kan fianrial hunah chuan, thihna laka chhanchhuah, kum 15 zet mai a nun pawh sei sak, Lal Hezekia chanchin hi ngun takin ngaihtuah teh ang. Lal Hezekia dam lo chuan Pathian laka a rinawmna chu ti langin, nasa tak maiin Pathian hnenah a tawngtaia. Pathian chuan a dilna chu chhangin, zawlnei Isaia kaltlangin a rawn tidam a. Nimahsela, Babulon palaiten an rawn tlawh khan, Pathian chawimawi aiin, an ram ropuina leh hausakna chhuang takin a lo hmuhtir ta zawk a. He a chapona hian a hnu lawkah a ram leh hnam chu chhiatnaah a hruai lut ta a ni.

KUM 15 CHHUNG
2 Lalte 20:3-5
3 “Aw LALPA, i hmaa thutak leh thinlung tha famkim pua ka awm thinzia leh, i mithmuha thil tha ka tih thinzia kha khawngaih takin hre reng ang che,” tiin a tawngtai a. Tin, Hezekia chu a tap ta zawih zawih a.
4 Tin, Isaia chuan khawpui lai tak pawh chu a thlen hmain heti hi a ni a, LALPA thu a hnêna a lo thleng a,
5 “Kir leh la, ka mite hotu Hezekia hnênah sawi rawh, ‘LALPA, i pu Davida Pathian chuan heti hian a ti: I tawngtaina kha ka hria a, i mittui tla pawh ka hmu e: ngai teh, ka tidam ang chia; ni thum niah chuan LALPA inah i han kal ang.

Kan hlawhtlinnate emaw, kan thil neihte emaw chu midang fak duh vanga han hriattir emaw entir vel emaw te kan chak ve ṭhin em le?

Lal Hezekia chu chutiang dinhmunah chuan a ding a. Nasa taka Pathian a dil avangin, Pathian tihdamna mak tak mai chu a changa, a nunna chu zuah niin, kum 15 zet mai a nunna pawh sei sak a ni. He chanchin hian Pathian thiltihtheih zia leh zahngaihna nasat zia chiang takin a tar lang a ni.

Nimahsela, Babulon palaite amah lawmpui tura an lo kalin, Hezekia chuan tihsual pawi lutuk mai a nei ta a. Chu hun chu a tidamtu, hmuingilna petu leh hausakna petu chawimawina remchanga hmang lovin, ama hausakna leh hlawhtlinna, a ropuina lo tihlannan a hmang ta hlauh zawk a.

Midangte tihlawm leh midangte laka lan mawi leh ropui kan tum lutukna lamah hian vawi engzatnge Pathian chawimawina hun remchang hi kan hloh ve tawh le?

Hezekia chanchin hian chapona hlauhawmzia chiang takin min hrilh nawn a ni. Kan hlawhtlinna leh malsawmna chan vanga mahni tawka han inchhuan ve chu thil pangngai chu a ni ngei mai, a tawpa kan hriat reng tur erawh chu, heng thilte hi Pathian hnen atanga rawn kal a ni tih hi. Chawimawina leh ropuina keimahni ringawtin khum kan tum a nih chuan, malsawmna lo chhuahna hnar chu kan hliahkhuh mai a hlauhawm ṭhin a ni.

Engkawng te in nge kan hlawhtlinna laimuah Pathian kan awm tir reng theih ang?

Hezekia’n chapo taka thil a lo entir vel chuan nghawng pawi lutuk mai a nei ta a. Babulon mite duhamna chuan Hezekia hausakna chu itin, hun lo kal tura run an tum ngei pakhat a lo ni ta, chu chuan Juda ho chhiatnaah a hruai lut ta a ni. Vawiin ni a kan thil tih hian kan hma lam hun rei tak hnuah pawh nghawng a la nei zel thei a ni tih he chanchin hian min zirtir a ni.

Kan nitin nunah thuhnuairawlhna leh inngaihtlawmna chu engtin nge kan chhawm nun zel theih ang? Kan hmalaknatur pawimawh tak pakhat chu kan hlawhtlinna reng rengah Pathian a tel ve a ni tih hriat chian tlat hi a ni. Chutianga kan tih phawt chuan Pathian kan chawimawi chauh ni lovin midangte pawh Amah zawng turin kan chawk tho thei a ni.

NGUN TAKIN INNGAIHTUAH ILA
Kan hlawhtlinna midangte kan hrilhhriat laia kan rilru puthmang kha uluk takin ngaihtuah let teh ang. Midangte pawmpuina I lo zawng ṭhin nge, Pathian ṭhatna chu I lo kawhhmuh zawk ṭhin?

Kan hlawhtlinnaah Pathian a tel ve ngei a ni tih hi kan thinlungah leh midangte nena kan inbiaknaah pawh tichiangin tilang ṭhin ang aw.

Kan hlawhtlinna eng emaw tak avanga Pathian hnena kan lawmzia kan bula mite nen sawihona hun remchang zawng teh ang, chu chuan kan vela mite thinlung Pathian lamah a ti tho thei a ni tih hre reng bawk ila.

ṬAWNGṬAINA
2 Lalte 20:6
Tin, i dam chung kumte hi kum sâwm leh kum ngain ka tisei ang a; tin nang leh he khawpui hi Assuria lal lakah ka chhanhim ang a; tin, keimah avâng leh ka chiahhlawh Davida avângin he khawpui hi ka hum ang, a ti,’ tiin.”

Aw LALPA, min dotute ka hmachhawn chang leh nun hian nasa taka min chimtu ka neih lai pawhin Nangmahah chuan chawlhna ka zawng anga, Ka thinlung zawng zawnga Nangma rawng chauh bawla, Nangmah chauh chu chawimawi ka duh e. Ka hmangaihte leh keimah ngei hnena malsawmna min pekte midang mithmuha chapo taka tarlanga, Nangma hming hliah khuh khawpa chapona thinlung ka put lohna turin, ka nuna I thiltih ropui takte, ka hlawhtlinna laimu leh hnarber I nih ziahte min hriat nawn tir ang che. Midangte tana malsawmna ka nih theihnan finna tharin min thuam la, Hezekia anga, ka kum lo awm leh tur kum 15 hi kum kal ta kum 15 aia tha zawka ka hman theih nan. Ka kawnga I malsawmna lo kalte I duhdan taka ka lo dawnsawn zel theihna turin. Isua hmingin ka dil e, Amen!