PATHIAN ZAHNGAIHNAIN THLEN PHAK LOH A NEI LO; A KHAWNGAIHNA THLEN PHAK LOH KHAWPA HLA A AWM LO.

#ZONEWS #FIANRIAL July 31, 2025:
Vawiin fianrial hun chu, Judaho milem biaknaa hruai luttu, sal a nihna hmuna a inchhir avanga a dil anga Pathian zahngaihna la dawng cheutu, lal Manasea chanchin hi ngaihtuah ila. Manasea chetdan khan PATHIAN a tithinur hle mai, Assuria salah a tantir phah hial a nih kha. A saltanna hmuna Manasea mangang lutuk chuan, thuhnuairawlh leh inngaitlawm takin PATHIAN a au ta a, PATHIAN chuan a chungah zahngaiin a lo ngaidama, a lal ram chu a pe let leh a ni.

LAL SUAL CHU SIAM THAR A NI.

12 Tin, mangang taka a awm lai chuan LALPA a Pathian chu a zawng a, a pi leh pute Pathian hmaah chuan nasa takin a intihnuai a. 13 A hnênah a tawngtai a, khawngaih a hlawh a, a dilna chu a ngaihthlâksak a, Jerusalem-ah a ramah chuan a hruai leh ta a. Tichuan Manasea chuan LALPA chu Pathian a nih a hre ta a (2 Chronicles 33:12-13).

Ngaihdam tlak loh khawpa hlaah awm tawh nia inhriat chang I nei ve tawh ṭhin em?

Manasea chanchin hian Pathian zahngaihnain tawp chin a neih loh zia, ramri a neih loh zia chiang takin min hrilh nawn a ni. Manasea, Juda lalte chanchina lal sual leh Judate milem biaknaa hruai luttu, naupangte hial milem biakna atana hlan tawhtu, a pa Hezekia, PATHIAN tana a hun hlantu nena inletling thawk mai khan, inchhira PATHIAN a auh chuan PATHIAN zahngaihna a la dawng cheu a ni.

Kawng dik min kawhhmuhtu awm ṭhin mahsela, vawi engzat nge chuta tang chuan kan pen bo ve tawh ṭhin le?

PATHIAN laka Manasea helna chu Assuria ho hnena sala tantirna hmangin PATHIAN chuan a chhang let a. Dinhmun harsa leh khirhkhan tak maia a awm chiah khan, Manasea chuan a sualna thuk zia chu chiang takin a hmu ta a ni.

Inchhirna tak tak neia, kan nihna dik tak zuk hmu fiah tur hian eng ang chiaha nasa manganna leh harsatna nge kan mamawh ve ang le?

A chang chuan, kan nun harsat leh hniam lai ber mai hi PATHIAN hnena ruma, inngaitlawm leh thuhnuairawlh taka Amah auh nachang kan hriat hun a lo ni fo ṭhin.

Manasea’n tihtak zeta inchhira PATHIAN a auhna khan PATHIAN thinlung a khawih ta a. Khawngaihna leh zahngaihnaa khat PATHIAN chuan Manasea chu lo ngaidamin, a lal ram chu pe let lehin a siam thar leh a ni. Eng anga hlaah pawh kal bo mah ila, enga thui pawh PATHIAN hi vah bosan ṭhin mah ila, chung zawng zawng ai chuan PATHIAN zahngaihna hi a nasain a thui zawk a, a la ropui zawk cheu a ni.

NGUN TAKIN INNGAIHTUAH ANG AW!
Kan nuna ngaihdam kan mamawhna emaw, midangte va ngaihdam kan ngaihna emaw ngaihtuah ila. I hun kal tawh avanga I thinlunga delh rit em em ṭhin che i nei ve em?

Thuhnuairawlh leh inngaitlawm taka zawng thinte tan chuan PATHIAN zahngaihna leh khawngaihna hi engtiklai pawhin a awm reng a ni. Kan sualnate PATHIAN hnenah thinlung taka inpuangin a ngaihdamna dil ṭhin ang u. Chumi piah lamah chuan, PATHIANIN kan chunga zahngaihna a lantir ang chiahin, keimahni ngei pawhin midangte chunga khawngaihna leh ngaihdamna lantirna hun remchang i zawng ve zel ṭhin bawk ang aw.

ṬAWNGṬAINA
Tin, a pa Manasea tih ang bawk LALPA mithmuha thil tha lo tak a ti ve ṭhin a. – 2 Lalte 21:20

Ka Pa van ropui a mi, ka vela mite leh he thu chhiartu nangmah atanga hla taka bo tawh nia inngaite tan vawiinah hian I hmaah ka lo ding e. Nang chu ngaidam ṭhintu PATHIAN i nih avangin, nangmah rinna atanga kal hla mekte chuan hawi kira I thatna leh zahngaihna chu an tem leh theih nan ka rawn dil e. Nang chuan I kalsan tawh nia an inngaihna an thinlunga dawta hrilh ṭhintu chu Lal Isua hming ka dodal sak e. I thutak chuan thinlung thimber pawh a chhun eng thei a ni tih ka hria a, chuvangin I hmangaihna thu chu an hnena tlem tal thlentuah nangin min hmang ang che. Nang chuan min ngaidamin nun thar chu min pe tawh a, an tan pawh chu ka hnena min pek ang tho chu I pe ve thei a ni tih ka hria e. I thlarau thianghlim thiltihtheihna chuan tihtheih loh engmah a nei si lo, nangma hnena hruaikir leh mek, thlarau chhandam mekte avangin lawmthu ka hrilh a che. Isua hmingin ka dil e, Amen!