PATHIAN THU CHU, HARSA VIAU MAHSE PAWM MAI ZEL ILA CHU CHUAN PATHIAN DUHDANA INTHLAKTHLENGNA A RAWN THLEN ZEL DAWN A NI.

#ZONEWS #FIANRAL August 06, 2025:
Vawiin kan fianrial hunah chuan Jeremia chungchang bawk hi ngun takin ngaihtuah leh teh ang. Jeremia chuan Pathian hnen atanga thu hmanhmawh thlak tak mai, Juda mite inchhira sim an ngaih zia thu chu a rawn thlen a. A thu chu thutak a nihzia sawia, nasa taka vaua a nawr chung pawhin, Lal chuan Jeremia vaukhanna chu engah mah a ngai lo a, Pathian thu chuanna lehkhazial chu a hal ta zawk a. He thil hian Pathian kaihhruaina a duhloh zia chiang takin a lantira, chu chuan Judate tan a hnuleh nghawng tha lo tak a thlen ta a ni.

LEHKHAZIAL HAL
Mahse in tana ṭha lo tûra in kut hnathawktu mi tithinur tûrin mi ngaithla lo, LALPAN a ti (Jeremia 25:7).

Thutak chu kan lo dodal ve thin em le?

Jeremia chanchin hian Pathian kaihhruaina lo hnungchhawn sanin a nghawng a hnuleh pawizia chiang takin min hrilh a. Jeremia kaltlangin Pathian a rawn inpuang a, a thute chu Judate tan nawmna leh zangkhaina a la thlen tur thute, chutihruala rorelna dik leh inchhira sim tura kohna thute a ni. Nasa taka puangin bei mahsela, an lal leh mipuite chuan a vaukhanna thute chu ngaihsak loha hawisan chu an thlang ta zawk a ni.

Pathian thuchah a thlen avangin Jeremia chuan nuih sawhna leh a taksa tawrhna hial a hmachhawn phah a. Thudik ṭan avanga dodalna kan tawhin eng angin nge kan chet ve thin le? Dodalna nasa tak a hmachhawn lai pawhin Jeremia chuan a tihtur chu chhel takin a ti zel a, mi’n engahmah an ngaih lohna hun leh hmunah pawh Pathian thutak chu puang chhuak mai tur kan nih zia Jeremia chhelna hian min hrilh nawn leh a ni. Jeremia khan a hun laia Juda mite leh Juda mi thangthar lo la awm turte tan a thuchah pawimawh zia kha a hre chiang hle a, Pathian thute chu ziak chhuak meuhin, Pathian thu ang zelin lal hnenah a thawn ta reng a ni.

Nimasela, chung lehkhazial ten lal hnen a lo thlen chuan lal chuan a mal te tein a lo hal ta vek mai a. He thil tihchhiat leh hal hi lang theia thiltih a ni mai lova, Pathian kaihhruaina hnawlna leh A aw tihtawp tumna dik tak a ni.

Kan thiltum emaw, a nuam kan tihna hun leh hmun emaw te Pathian kaihhruaina aw kan dawn chuan a sut buai changin eng angin nge kan chet ve thin le? Lal thiltih hian Pathian atanga finna lo kal hnawl hlauhawm zia chungchang min hrilh a. Pathian thu kan ngaihsak loh avang ngawt khan thudik a nihna leh, kan hnawl avanga a hnuleh nghawng lo awm theite chu a bo phah chuang dawn lo a ni.

Kan nunah Pathian kaihhruaina kan lo hnar chang te a awm thin em inenfiah ila. Thutak pawm harsa kan tih emaw, han hnawl mai emaw chang te a awm ṭhin em? Pathian thu chu harsa ti chung chung pawhin kan pawm ve mai a tul zia ngaihtuah ila, chu chuan ṭhanna leh inthlakthlengna a la thlen dawn a ni.

NGUN TAKIN INNGAIHTUAH ILA!
Pathian Thutak kan hmachhawn thin dan ngun takin ngaihtuah teh ang. Pathian aw emaw, a kaihhruaina kan ngaihsak loh a kan hnawl hunte a awm tawh ṭhin em le?

Jeremia chanchin leh lehkhazial hal chungchang hi ngun takin ngaihtuah ila, Pathian thu kan hnawl avang ngawtin thutak a nihna chu a danglam phah chuang lo tih kan hre reng dawn nia. Harsa viau mahsela, Pathian thu chu a nihna anga huaisen tak leh thuhnuairawlh tak chunga kan lo pawm zel theihna turin Pathian hnenah a kaihhruaina dil ila. A tha zawnga kan nun chu thlak danglam leh siam danglama a awm zel theihna turin A thutak min pek tur chu zawng ve zel ṭhin ang u.

ṬAWNGṬAINA
“Lehkhabu zial dang la la, lehkhabu zial hmasaa thu zawng zawng, Juda lal Jehoiakiman a hâlral tâkte chu ziak leh vek rawh” (Jeremia 36:28).

Aw Lalpa, I thutak aia tha zawk hria nia inngaite dodalna leh tihduhdahna, sawichhiatna karah pawh i thutak chu huaisen taka puang chhuak thei turin huaisenna min pe ang che. Jeremia ang khan, mahni chauh pawha I thutak chu dodalna nasa tak karah pawh dinpui tlat ka duh a. Ka thiltih leh sawichhuah I thutakte chu vantlangin doin tihreh tum mahsela, I thutak chu a fawng chelhtu ten hal ral pawh nisela, I thutakah chauh chuan din tlat ka duh e. I thute chu tihchhiat rual loh, chatuan atan a ni si a. Eng ang dinhmunah pawh ding ila, hloh tawhte chu zawng chhuak a I thatna thute chu hrilh turin Nangmah ringtu zawng zawngte chu Nang chuan hriak min thih tawh tih ka hre si a. I thutak hmanga Inthlakthlengna chu a lo thlen theih nan. Isua hmingin ka dil e, Amen!