THIL DANG AIIN, ISUA LEH A THU CHU THLANG LA. A THUTE HMANGIN THLARAU THIANGHLIM AW NGAITHLA LA. THLARAU THIANGHLIMIN LO KHAT ANG CHE.

#ZONEWS #FIANRIAL August 10, 2025:
THIL DANG AIIN, ISUA LEH A THU CHU THLANG LA. A THUTE HMANGIN THLARAU THIANGHLIM AW NGAITHLA LA. THLARAU THIANGHLIMIN LO KHAT ANG CHE.

Vawiina kan fianrial hunah chuan Pathian thu kal tlangin, Pathian thu ni lo, Zu leh Zu ruih, ruihhlo leh thil dang kan thlanin a nghawng theih rapthlak tak takte kan kan ngaihtuah ang a. Hlimna leh Muanna nun nei turin thil dang zawng zawng aia kan thlan tur chu Lal Isua leh A thute, kan thinlunga Thlarau Thianghlim hmanga Pathianin min hriattir zawk hi a ni tih vawiinah hian ngaihtuah nawn leh ang u.

Pathian ram chu ei leh in lam thu a ni si lo va, felna te, remna te, Thlarau Thianghlima lawmna te a ni zawk e (Rom 14:17).

Kan nuna rilru muanna, hlimna emaw, huaisennate pawh a niang min rawn thlen tur engahte nge kan innghah ve thin le, chungte chuan kan rilru kan thlarau a tilungawiin a tipuar tak tak reng em?

Zu um hmanga rilru nawmna, ruihhlo hmanga nawmna zawn, kan duh zawng tak leia hlim, emaw kan rilru lapeng thei thil dang hmanga nawmna zawn te hi he khawvelin muanna lem min pek theih leh tiam theihte chu a ni mai. Mizote kher lo, khawvel hnam hrang hrangte culture hi en ila, rilru hahchawlhna atan Zu hi kan hmang nasa hlawm hle mai a, chu mai chu ni tawh loin, ruihhlo dang leh nawmsip bawlna dangte pawh hnam tin tihdanphungah a bet chho ve zel bawk a nih hi. Heng thilte hi reilote atana kan nun ruak hnawhkhah nana kan hman thin te chu an ni. Kan riru natna tihchawmawlh nan, rilru hah nia kan inhriatna atanga tlan chhiat nan, emaw thiante leh midangte pawl hlim nan, midangte zinga kan va lena kan va tel ve theih nan; heng thil hrang hrangte hian eng emaw chen atan chuan rilru nawmna leh zang khaina chu min pe ve thei niin lan pawh a lang thin e, nimahsela, heng thilin hlimna a thlente hian a daih rei tak tak ngai lo, a hre chiangtute kan ni e.

Pathian thu hian zu ruih hlauhawmzia a sawi chiang hle a – chu chu kan hlimna min laksak tuma sawi a ni lo a, min tina theitu thil hlauhawm laka min hum a tum vang a ni zawk. Zu chu in it awm taka a awm lai laka fimkhur turin Thufingte chuan min vaukhan lawk a ni, “A tawpah chuan rul angin a chu a, Rul tur tha mi angin mi a chu thin,” a ti (Thufingte 23:29-32).

Tun laiah chuan Zu mai ni lovin ruihhlo leh nawmsakna dang pawh kan huamtir thei ang chu, tihchakawm tak, tel chakawm tak, Thufingte chuan chung thilte chu en reng ching lo turin min ti a, a en renga a hnaiha awm thinte chu a tawpah chutah chuan an tlu leh thin. Nun ruak bawk min hnutchhiah leh thin thilte hmanga kan nun hi tikhat lovin, Thlaraua tikhat zawk turin Ephesi 5:18 chuan min hrilh a, min tihlawhchham ngai lo tu, min tihlawn ngailotu hnenah chuan muannate, huaisenna te, nawmna te leh hlimna te chu zawng zawk thin ang aw.

Kristaa zalenna tak tak chu, min tihlim thei leh kan nawman tur nia kan hriat kan duh apiang thil tih ringawt hi a ni lo, Rom 14:19-21-in min hrilh ang a, midangte, kan unaute kan hmangaih avanga anmahni tlukna thlen thei thil laka inthiar fimhlim hi Kristaa kan zalenna nia kan hriatin a ken tel a ni.

Rom 14:19-21
19 Chutichuan inremna tur leh intihsawt tawnna tur thilte chu i um ang u.
20 I englo ei vangin Pathian hnathawh tichhe suh. Thil zawng zawng a thianghlim ngei mai, nimahsela a englo eiin mi a tihtluk chuan a eitu tan sualna a ni.
21 I unau tlukna tur a nih chuan sa ei loh te, uain in loh te, thil engpawh tih loh a tha a ni.

NGUN TAKIN INNGAIHTUAH ILA!
Eng emaw chhung atana thlan chhiatna tur, penna tur zawn ai chuan, engtin nge thlarauva khat zawk tura tih tak zeta hma ka lak ve ang? Kan duh thu ngeia kan thlan dik loh thin avangin, keimahni mai ni lovin, kan unaute leh midangte pawhin an tluk phah ṭhin a ni.

ṬAWNGṬAINA
Pathian ram chu ei leh in lam thu a ni si lo va, felna te, remna te, Thlarau Thianghlima lawmna te a ni zawk e (Rom 14:17).

Ka Pa duhtak van ropui a mi, I khawngaihna leh ngaihdamna ka chan avangin lawmthu ka hrilh a che. I khawngaihna chuan hun kal tawha buaina piah lam chu en a, tun huna Nangmah leh I thutea hlimna zawn chu min phal sak a ni tih ka hriat reng theih nan min tanpui ang che. I ngaihdamna chauh chu, bul tan tha leh a, hma lam min pan tirtu chu a ni tih min hriat nawn tir ang che. Ka Pa, ka thinlunga muanna leh hlimna chu nangmah kal tlanga keimah ka inngaihdam ve atangin a intan a ni tih min hriat nawn tir la, Min ngaihdam avanga mahni inngaidama nangmah pan duhna thinlung ka neih zel theih nan min pui ang che. I khawngaihna thuk tak avangin nang chuan min ngaidam a, chutiang bawkin keipawhin mahni leh midangte ngaidam zel chunga hma lam pan zel a, ka nunna kawng min lo ruat sak tawh chu zawh zel ka duh e. He nunna kawng ka zawh mekah hian midangte tlukna thlen lo turin nangin I thute chu min hriattir zel ang che. Isua hmingin ka dil e, Amen!