CHHIATNA KARAH PAWH DIN THAR LEHNA TURA PATHIAN THUTIAM CHU A LA NUNG RENG A NI.

#ZONEWS #FIANRIAL August 07, 2025:
Vawiina kan fianrial hun chu Judate chunga chhiatna lo thleng chanchin ngaihtuah ang aw. Lal Nebukadnezzara chuan Judate chu rawn runin, an invenna kulh, khawpui leh an Biak in (temple) zawng zawngte chu a rawn tichhe ta vek mai a. Aigupta thuneihna hnuaia awm, Lal Jehoiakima hnuaia Judate chuan an thinlung an tihkhawng tlata, inchhira an sim duh loh avangin Pathian rorelna, chhiatna chu an hmachhawn ta a. Chu chhiatna karah pawh chuan Pathian chuan a rinawmzia tilangin, a thutiam ang ngeiin A mite chu a hun takah a la rawn chhanchhuak dawn a ni tiin beiseina A mite a siamsak a ni.

JUDATE TIHCHHIATNA
Chung niahte leh chumi hunah chuan felna Chawrno Juda hnênah ka chhuahtir ang, chu ramah chuan dik tak leh fel takin ro a rêl ang (Jeremia 33:15).

Nasa taka chimbuai emaw, tihbuai emaw nia inhriat chang i nei ve ṭhin em?

Lal Nebukadnezzara’n Judate a tihchhiat vek chanchin hian, Pathian kawng atanga kan pengbo a nih vaih chuan dinhmun manganthlak takah kan luh mai ṭhin zia chiang takin min hrilh nawnin min vaukhan lawk a ni. Aigupta thuneihna hnuaia awm Juda Lalram khan, Babulon lalram thinurna nasa tak mai chu a hmachhawn a. Lal Nebukadnezzara leh a sipai rualte chuan Judate khawpui chu rawn runin, mipuite chu an man a, Temple chu halin an tichhe ta vek a ni.

Judate chuan inchhira sim duh lovin an thinlung an tikhawng tlat a, chu chuan chhiatnaah a hruai lut ta a ni. Vawi tam tak Pathian hnena kir leh tura hrilh, vau leh hun remchang pek an ni chungin, anmahni kawngah chuan an kal chhunzawm lui tlat a.

Kan nunah hian Pathian ring tura hriattirna hnawl a, mahnia engkim titheia in ngaia, mahnia tih kan tum ve tlat tawh ṭhin em le?

Aigupta lalin duh duha a thunun theih, Jehoiakima rorelna khan buaina thuk leh zual zawkah Judate chu a hruai lut ta a. Nebukadnezzara chuan rawn runin, Jehoiakima chu salah a hruai a, a aiah a fapa Jehoiachina chu lalah a dah ta thung a ni.

Chu chhiatna chuan a huam zau hle mai a, Juda ram chu a chhe vek a ni ber mai a. Nimahsela chu hun thim tak karah pawh chuan Pathian beiseina thuchah chu a la awm reng a ni. A hun takah A mite chu a la rawn chhanchhuak leh dawn a ni tih thu A tiam miau a ni.

Engkim hloh vek tawhna karah beiseina a la awm theih i ring em?

Judate hnena Pathian thutiam hian A rinawmna danglam ve ngai lo chu a lantir a ni. A lakah an hel chung pawhin, Ani chuan a kalsan chuang lo a, rinawm takin sima an lo kir hun chu a lo nghak tlat a ni.

Kan nun in en ila: Pathian hnena kan kir leh ngaihna lai te a awm em? Chhiatna emaw beidawnna a lo thlen hunah pawh Pathian thutiam chu kan vuan ve tlat thin em le? Judate chhiatna chanchin hian inchhira simna dik zawng turin min tihuaisen sela, Meivap atang pawhin Pathian chuan engkim a siam tha leh thei a, a din thar leh thei a ni tih hriain, Pathianah chuan rinna nghatin beiseina i nei tlat ṭhin ang u.

NGUN TAKIN INNGAIHTUAH ILA!
Fiahna i hmachhawn ṭhin leh i hmachhawn mek te pawh kha han ngaihtuah la. Chu i dinhmun hmachhawn chu nasa lutuk leh i thunun phak loh niin i hria em le? Judate chhiatna chanchin leh Pathian thutiam beiseina kha ngaihtuah ang aw. Kan hun thim berah pawh, Pathian rinawmna chu a la awm reng a, a la ding reng a ni.

Pathian hnen atanga kan pen bona kawngte ngun taka ngaihtuahin, chungahte chuan inchhira sim zelin, A kaihhruaina leh a tihchakna chu zawng zel ṭhin ang aw. Kan hnenah a awm a ni tih hi ring tlat ila, A hun taka min chhan chhuaka min siam thar leh turin Ani chu a inpeih reng si a.

ṬAWNGṬAINA
“Persia lal Kura chuan heti hian a ti, ‘Khawvel ram zawng zawng chu LALPA, vân Pathian chuan min pe ta a; tin, Judai rama Jerusalem-ah chuan a in saksak tûrin thu min pe a ni. In zinga ama mite tawh phawt hnênah chuan LALPA a Pathian chu awm sela, han chho rawh se,'” tiin (2 Chronicles 36:23).

Ka Pa vana mi, ka hun kal tawha ka tihdik loh leh ka tihsualten min sal bet tlat nia ka hriat changa, chuta tanga tal chhuak tura theihtawp ka chhuah mek lai hian, zawlnei Jeremia hmanga I thuchahte chuan ka thinlungah lawmna min thlen a. Nang chuan ka hmabak leh ka nuna thil thleng engkim I hre vek a, hma lam hun beiseina, thihna ni lovin nunna chu min pek I duh a ni tih ka hria e. Nang chuan ka ke te chu lei tha hmunah chuan dah a, ka dinhmun harsa tak atang hian min lak chhuah I duh a, I kawngah chuan ding tlat turin min duh a ni. I tana nun tam nei a, nangmah rinna chi chu ka thinlung lei thaah chuan ka lo dawn a, tam taka ka rah theihna turin. Isua hmingin ka dil e, Amen!