KRAWS CHU EN ZAWK RINGAWT LOVIN KAN THLIR RENG A NGAI A NI.

#ZONEWS #FIANRIAL August 03, 2025 Chawlhni:
Vawiin kan fianrial hunah chuan Lal Isua inhlanna kal tlanga damna chungchang, Chanchin tha bua kan hmuh nasat em em kan ngaihtuah ho anga. Phar tihdam te, zeng tihdam te, ramhuaiin a tih retheih em em tihdam te; dik tak chuan Pathian hian kan pumpui hian min tihdam a duh a ni. Zawlnei Isaia’n chhiahhlawh tawrhna thu a puan lawk khan, Chhandamtu chu kan sualna chauh phurtu ni lovin, natna zawng zawng phurtu a nih thu a puang a ni. Damna hi a ken tel satliah ni lovin Chanchin ṭha thutiam laimu a ni.

4 Ani chuan kan natnate phurin, kan lungngaihnat epah a phur ngei a: nimahsela keini chuan lungngaihna tlakbuakah, Pathian vuakah, tihretheihah kan ngai si a.
5 Nimahsela ani chu kan bawhchhiatnate avângin hliamin a awm a, kan khawlohnate avângin vuak thitlinin a awm a:kan thlamuanna tûr thununna chu a chungah a tla a; a vuakna vualtea tihdamin kan awm ta (Isaia 53:4-5).

Tihdamna hi I chan lo ni ve tak tak ta se mak I ti ang em, nge ni midangte tawnhriat chauh tur niah I ngai hrim hrim zawk?

Lal Isuan kan sual man a pek tlak rualin, damna chu kan tan a lei tel nghal a ni. Isaia bung 53 hian, Isuan kan natna leh hrehawmna zawng zawng a phurh tur thu chiang takin min hrilh a, chu chu rilru lamah chauh ni lovin taksaah pawh a ni tel a ni tih chiang takin a sawi a ni. Lal Isua kha vuak a nih a, khenbeh a nih khan, kan sualna ni ringawt lovin, sualna avanga mihringte tawrhna zawng zawng zung kha la bo a ni.

Tihdamna chu dil lova I dawn tur ni ta se engtin nge I tih ang?

Chu tihdamna, damna famkim chu a hawnna chahbi Lal Isuan kan tan a dahin a ruahman fel sa thlap a, chu chu Rinna hi a ni. Rinna chu thil lo lang miah lo tur lo la lang tur ni awma ngaih theih tura va awm der lam a ni lo a; Rinna chuan kan taksain a ngaihtuah leh hriat piah lam thil, Pathian thutiama innghah chu a thlang mai a ni. Chu rinna chu Marka bung 5-a hmeichhe thiput chung changah kan hmu a, Tirhkohte bung 14-ah piantirh ata kea kal ngai lo ke zeng chungchangah kan hmu bawk a ni. An ring a, an tawng chhuak a, an che chhuak a, damna chu a lo thleng mai a ni. A chang chuan thilmak chu huaisen taka pen khat leka kan pen belh ngamnaah hian a lo awm ṭhin.

Kan rin hmaa dam hmasak phawt kan nghak nge, rin hmasak chu kan duhin kan inhuam zawk?

Tihdamna chu kan taksaa a lan chhuah hmain kan rilru leh thinlungah a intan hmasa ṭhin a ni. Thufingte bung 4 chuan Pathian thu chu nunna leh kan taksa/tisa tan hriselna a nih thu min hrilh a ni. Pathian Thu chu kan damdawi a ni a. Chu chu kan puan chhuaha, kan ngaihtuah a, kan rin phawt chuan a takin keimahniah hna a thawk tan mai thin a ni. Israel hoten dar rul khai kan an en a an dam ang khan. Keini pawhin Lal Isua leh a hnathawh zawh tawhah chu en tlat ila, chutah chuan damna chu kan hmu ngei ngei dawn a ni. Tihdamna hi duhthusam ngaihtuahna mai a ni lova, kan rin tura thutiam min lo nghak rengtu chu a ni.

NGUN TAKIN INNGAIHTUAH ILA!
Lal Isuan man nei a a lo lei fel diam tawh chu a neitu kan ni tawh tih hria ang aw. Isuaa Kan nihna hi natna leh damlohna nen a in mil lova, kan pumpuia damna leh hriselna, damna famkim lamah I her rem zawk teh ang. A rawn lang chhuak leh ṭhin a nih pawhin, nasa leh zualin bei ila. Kan taksa leh rilrua Pathian inpuanna chu kan lo ngaihtuah dan nen a lo inmil lo ni a kan hriat pawhin, Pathian lamah theihtawp I chhuah zel ang u. Rinna chu che lova awm mai ringawt a ni lova, chet chhuah a, puan chhuah a, chutah chuan dinngheh tlat a ngai a ni.

ṬAWNGṬAINA
Tin, LALPA in Pathian rawng chu in bâwl tûr a ni, tichuan I chhang leh I tui chu mal a sâwm ang a; tin, in zîng ata hri ka tikiang daih dâwn nia (Exodus 23:25).

Aw LALPA, Nangmah fak leh chawimawi thei a, nun chhan nei a min siam avangin ka lawm e. Ka thinlung chu Nang ka hnena I awm tlat avanga lawmna chuan tikhat la. Ka nun kawng tinrenga ka chawimawi theihna tur chein ka dil che a. Ka nuna I rawn teltir leh i rawn dahte avanga lawm zel thei turin min pui ang che. I eng leh I hmangaihna chuan ka thinlung chu lo chhung khat sela. Ka nuna lo tel ve tute hnenah pawh ka lawmna chu ka thiltih leh thu sawiah a taka ka lantir fo theihna turin. Isua hmingin ka dil e, Amen!