“MIIN MUALPHONA LEH ZAHTHLAK NIA AN NGAIHTE AN HMUHNA HMUNAH PATHIAN ERAWH CHUAN THIL HLU A HMU THIN”

#ZONEWS #FIANRIAL July 26, 2025:

Vawiin chu Isuan damlo a tihdam ṭan dan, biak ina a zirtir dan leh midangin an ensan nia langte leh engahmaha khawtlanga an ngaih loh mite amah zui tura a koh dan te kan ngaihtuahho dawn a ni. Miin engahmaha an ngaih lohte a hmangaiha a thlang tlat mai hi thil pangngai a ni hauh lo mai. Hei hian tumah hi Pathian hman tura hla lutuk emaw tling lo lutuk bik emaw an awm lo tih a lantir a ni.

Tin, Isuan an inkhawmna inahte zirtirin, Ram Chanchin Tha chu hrilin, mite zinga natna tinreng leh chak lohna tinreng tidamin, Galili ram zawng zawng a fang vel a.
Matthaia 4:23

I tihsual vang emaw, I dinhmun vang emawin mi dang zinga leng lo leh, midang tan engmah ni loa inhriatna I nei ve ṭhin em?

Lal Isuan rawng a bawl tirh khan, mi chungchuang emaw mi fing bik emawte thlangin bul a ṭan miah lo nia. Galili ram tuipui kam bawlhhlawh ve takah khan a kal kual a, sangha mantu Petera te, Andria te, Jacoba leh Johana te kha amah zui turin a ko mai a ni. Amah rawn hnaih ngam phar natna vei chu a lo tidam mai a. Inchung atanga zeng an rawn khai thlak chu a lo lawm a. Chhiah khawntu miten an hmusit em em Matthaia chu amah zui turin a sawm a. Heng hi tihpalh thil a ti a ni hauh lo, miten an duh loh leh engahmaha an ngaihlohte amah zui tura sawm kha a tum sa reng a ni.

Miten engahmaha an ngaih loh leh an hnualsuatte nena Lal Isuan A Lalram din a tum tlat mai kha engnge a awmzia ni ta ang le?

Mi hrang hrang a tihdam dan leh Amah zui tura a kohte chanchin han en hian, Lal Isua hi kan chaklohna hian a titim miah lo mai ni lovin, kan chaklohna chuan Amah chu kan hnenah a hip zawk a ni. Kan thianghlima kan fai hun emaw a nghak lo a; kan natnaah a rawn tel ve a, a tidam a, a siamtha leh a, kan tum ram thleng turin hmalam min pan tir leh zawk ṭhin a ni. Dinhmun leh nihnain nghawng lian tak a neihna khawvelah hian, Lal Isua chuan a letlingin entirna a rawn siam daih thung. Mi hnuaihnung, mi tlu chhe tawh, mi’n engahmaha an ngaih loh, vantlang hmusit tak takte chu a tirhkohah, Lal Isua palaiah, a thu puangtuah an rawn ṭang ta daih zawk a ni

I thinlunga hliam leh I natna vei avang khan Pathian hman tura tlinglo leh tlak lo niin i inngai ṭhin em?

Lal Isua thiltihte hian rawngbawlna hi famkimnaah leh chungchuannaah a inṭan lova, inpumpeknaah a inṭan zawk a ni tih min hriattir a ni. Kan famkimlohna nen A hnen kan pan chuan, Anin damna nen min lo kuangkuah a, kan kalkawng tur chu min lo kawhhmuh mai ṭhin a ni. Lal Isuan sangha mantute, chhiah khawntute, phar natna veite leh zengte a hman theih chuan, kei leh nang hi min hmang ve thei a ni. Miten engahmaha an ngaih loh leh an ensante zingah leh an nunah Lal Isua chu a la kal vel reng a, keimahni kaltlangin chu thil chu tunah pawh hian a ti thei reng a ni.

Kan nunah miten engahmaha an ngaih loh leh pawimawh lo nia an ngaihte an tel ve em, An tan Lal Isua kut leh ke kan ni ve thei ang em le?

NGUN TAKIN INNGAIHTUAH ILA!
Isua amah zuituturte a thlan khan pawn lama lan dan leh awmdan kha a en ngai lova, thinlung kha a en zawk ṭhin a ni.

Isuan a endan anga midangte ena hmu thei turin i hun kha han hmang ve teh le. Midangte laka hrang ni a inhriate hnen va thlen phak a ni thei a, miten an en kan ṭhinte hnena ngilneihna lantir pawh a ni thei, emaw nangmah ngei pawh hman tlakloha siamtu che nia i inhriatnaah khan nangmah leh nangmah lo inngaidam la, hman tlak i ni tih lo inhria ang che. Chung thilahte chuan kan mit a men a, kan thinlung a lo nem theih nan Pathian hnenah dil ang aw.

ṬAWNGṬAINA
Chutichuan, chhumpui nasa tak ang thlirtuten min hual vel avang hian, min tihnawk apiang leh sual keimahnia bet tlat chu i dah ve ang u, tin, Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u. Ani chuan a hmaa hlimna awm avang chuan mualphona chu ngainepin kraws chu a tuar a, Pathian lalthutphah ding lamah khian a han ṭhu ta a.
Hebrai 12:1,2

Ka Pa leh ka Pathian, vawiin hmu thei tura ka mit ka men rualin I hmangaihna ropui tak mai ka chan hi mak ka van ti em! Lal Isua chuan engkim ka tan a lo hlan a, engkim a lo tuar chhuak a, keimah nen kan awm dun theih nan engkim a lo hneh tawh si a. Aw ka Pathian, Lal Isua avang chauha keimaha i lungawina chu ka hria e. A chang chuan buaina leh harsatna hrang hrangten min rawn chimin min rawn hual vel thin a. Nimahsela, eng anga lian leh sang pawhin chung buaina chu rawn fawn mahsela, Nang i ṭawng chuan chung thli leh tuifawnte chuan i thu awihin a lo reh leh mai ṭhin a ni. I hmaah chuan an ngawi hle hle thin si a. Ka pil dawnin nang ka au che a, Nang chuan min chhanchhuak leh ṭhin. Ka vela thilte avanga kalna lam tur hre lova ka awm changin, danglam ngai lo nangmah chauh hi en tlat ka duh e. Nang chu engkima engkim i ni a, ka rinna tifamkimtu leh siamtu chu i ni a. Nang chuan chakna leh huaisenna min pe ṭhin a. Ka zin kawngah hian hlimna leh beiseina min pe si ṭhin. Engtik niah emaw chuan him takin i buatsaih in chu min la hruai thleng dawn si a. Lalpa ka lawm e. Isua hmingin ka dil e, Amen!