CHATUAN NUNNA CHU THILTHLAWNPEK A NI A, A RING DUHTU APIANGTE HNENAH A THLAWNA PEK A NI.

#ZONEWS #FIANRIAL AUGUST 08, 2025:
CHATUAN NUNNA CHU THILTHLAWNPEK A NI A, A RING DUHTU APIANGTE HNENAH A THLAWNA PEK A NI.

Vawiin kan fianrial hunah chuan Isuan Temple a thenfai chungchang leh a hnua Nikodema nen an inbiakna kha ngaihtuah ila. Isua chuan hlemhle taka sumdawn nana Temple hmangtute chu hnawt chhuakin Temple chu a thian thianghlim a. Khami hnuah khan piantharna awmzia leh chatuan nunna dawn awmzia te, Pathian hmangaihna leh chhandamna chungchangte Nikodema a hnenah a puang zui a ni.

Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan (John 3:16).

Rorelna diklo leh diklo taka thiltih i hmuh leh hriat changing, dik zawk duhna avangin i thin a rim ve tawh thin em?

Kalhlen kut laia Isua temple-a a luh khan, hmun thianghlim chu sumdawnna hmunah an lo chantir a hmu a. Tawngtaina leh Pathian biakna tur hmun ni si kha, mipuite buma, hlemhle taka sumdawnna hmunah an lo chantir a hmuh khan, Isua kha rang takin a che nghal a, invuakna hruihrual lain chung sumdawng ho chu a um chhuak a, temple chu a nihna ang tur taka hman a nih theihnan thianfai a ni.

Diklo taka thil tih laka ding chhuak ngam turin Isua temple tihthianghlimna hian kei pawh hi min zirtir niin ka hre ve em?

Lal Isua thiltih leh chet dan hian, Pathian biakna hmun thianghlim taka hman a pawimawhzia leh, hlemhletna leh dik lo taka hmanna laka ven tlat a pawimawhzia a takin a lantir a ni. A thinrimna chu Pathian chawimawina leh zahna vang leh temple nihna diktak venhim a duhna vang a ni.

Kan nunah thil dik lo taka tih kan hmuhte eng angin kan chhan let ve thin le?

Lal Isua chuan Ama thiltih ngei hmangin, dik lo taka thiltihte huaisen taka dodal ngam turin min entirna min siam sak a ni. Khami hnu tlaiah khan, Pharisai hotute zing a mi Nikodema chu Isua hnenah, Isua chungchang hriatchian duhin a lo kal a. Isua leh Nikodema titina atangin Isua thuchah laimu, rinna kal tlanga Piantharna leh chatuan nunna chungchang kan hre thei a ni.

Eng angin nge Isuan piantharna chungchang a sawi kha keimahni nen a inzawmna nia kan hriat le?

Lal Isua khan Pathian Lalram luh nan thlarau lama piantharna chu thil tul a nih thu Nikodema hnenah a lo hrilhfiah a. He piantharna hi tisa piannawnna ni lovin, Thlarau lam zawk a ni a, rinna kal tlanga Pathian nena kan inlaichinna lo danglam ta chu a ni. Pathian hmangaihna thukzia kha a sawi uar hle a, A fapa mal neih chhun chu mi zawng zawng tan a rawn pe a, A fapa ringtute chu tumah an boral dawn lova chatuana nunna an nei zawk dawn a ni tih chiang takin a rawn sawi a ni.

Chatuan nunna thilthlawnpek lo pawma, kan rinna tichak leh zual turin engtin nge hma kan lak ve ang le?

Kan thlarau zin kawng zawh mek kha ngaihtuah ila, englaiah te nge Pathian nena kan inlaichinna tinghet zual zel turin ṭhan kan ngaihna nia kan hriat le? Kan nitin nunah Isua zirtirna a taka hmang thei turin hriatthiamna zawng zel ila, Thlarau Thianghlim kal tlanga kan nun thlak danglamna tur thiltihtheihna chu i lo pawm zel ang u.

NGUN TAKIN INNGAIHTUAH ILA!
Kan vela dik lo taka thiltih awm thinte ngaihtuah ila, Lal Isuan entirna a lo siam tawh zui turin, engtin nge thutak leh dikna tanin kan dinchhuah ve theih ang le? Pathianin min siam chhan leh thianghlimna kawng zawh turin eng te nge kan nunah siamthat leh siam thar ngai nia kan hriatte ni ve le?

Huaisen taka thutak leh thu dik tana ding tlat zel thei turin kan ngaihtuahna siamrem zel ila. Chubakah piantharna awmzia bulpui leh kan thlarau nun atana awmzia a neih theih dante uluk takin ngaihtuah teh ang.

Pathian hmangaihna leh A chhandamna thilthlawnpek chu lo pawm ila, Amah nen inlaichinna thuk kan neih theih dan tur chu, ṭawngṭai leh A thu zira, mahni inenfiah zel chungin, nitin i zawng zel ang u.

ṬAWNGṬAINA
Tin, hruihrualin vuakna a siam a, beram leh sebawng azain Pathian biak in atang chuan a hnawt chhuak a, tangka thlengtute tangka chu a leihbua a, an dawhkante a namthluksak bawk a; (Johana 2:15)

Aw Lalpa, dikna kawng min entira min kawh hmuh tawh chu zui a, thutak chu ṭana din ve tlat zel theih ka duh e. Van lam thilte chu hrethiam zela, chumi avanga nghet taka din zel theih chu ka duh e. Isua Krista avanga, min hmangaihzia leh chatuan nunna neih theihna kawng min hawnsak avangin lawmthu ka hrilh a che. Ka sual avanga min hrem tur ni lova, ka sual laka min tlan tur Isua I rawn tirh avangin lawmthu ka hrilh a che. Ka nunah Nang ka neih che avangin siamthar ka lo ni ta a, mi thar ka lo ni ta tih ka puanga, chu chu nitina puan zel theih ka duh e. Isua hmingin ka dil e, Amen!