THIL THEIHLOH NIA NGAIH KAN HMACHHAWN NIAH, RINNA CHUAN CHUNG LAM HRILHFIAHNA CHU A HAI HAWNG THIN

#ZONEWS #FIANRIAL August 15, 2025:

THIL THEIHLOH NIA NGAIH KAN HMACHHAWN NIAH, RINNA CHUAN CHUNG LAM HRILHFIAHNA CHU A HAI HAWNG THIN

Vawiin kan fianrial hunah chuan Daniela leh Babulon Lal mumang chungchang ngaihtuah ila. Babulon Lal Nebukadnezzara chu a mumangin a tibuai hle mai a, a ram chhung hmun hrang hrang atangin mifingte leh aienthiam (magician) tam tak a chah khawm a, nimahsela an hrilhfiah sak thei lova. A thinrimin thah vek tur thupek a chhuah ta rup mai le. Nimahsela, Daniela a rawn inrawlh ta vat a, Pathian kaihhruainain mumang chu a rawn hrilhfiah ta a. Nebukadnezzara paw’n Pathian thiltihtheihna chu a takin a hriat fiah phah a, chumai ni lovin, Daniela chu a lalrama nihna sang tak dinhmunah a dah phah ta a ni.

DANIELA LEH LAL MUMANG
Lal chuan Daniela chu a chhâng a, a hnênah, “He thil inthup i puan theihzia hian in pathian chu pathian te Pathian, lalte Lal, thilinthup puangtu a lo ni ngei mai e,” a ti a (Daniela 2:47).

Thil theih miah loh nia lang I hmachhawn avangin I buai ve tawh thin em?

Lal Nebukadnezzara chu a mumang hriatthiam loh leh hrilhfiah theih bawk si loh avang chuan a buaiin a mangang em em mai a, a mifingte pawhin amah pui turin tih theih reng reng an nei lo. A thinrim tihngaihna hre lo chuan a mifingte chu tihhlum a tum ta hmiah mai le.
Chona nasa leh huphurhawm tak nia kan hriatte kan hmachhawn changin engtin nge kan tih ve thin le?

Daniela, Pathian ring tlattu chu huaisen takin a rawn pen chhuak ta a. Tawngtaina hmanga Pathian finna dilin, a hrilhfiahna chu pek a ni ta a ni. Chu chuan mifingte nunna a chhan a ni ringawt lova, Pathian engkim titheitu thiltihtheihzia a lantir tel bawk a ni.

Daniela chanchin hian kan mamawh leh a tul huna Pathian lam hawi pawimawh zia min zirtir a ni. Rinna nen chuan thiltih theih loh ni a kan ngaih leh harsa ber pawh a sut kian zel theih a ni tih a takin min entir a ni.

Chona leh harsatna kan hmachhawnte su kianga, a chhanna min pe turin Pathian kan ring ve tak zet em le?

Nitina Pathian finna zawng duhtu thinlung chu engtin nge kan keimahniah kan siam ve theih ang?

A tawpah chuan Daniela rinna leh thuawihna chuan lal hnenah a hrilhfiahna a thlen ni ringawt lovin, amah Daniela ngei pawh chu thuneitu dinhmun sang takah a chawisang ta a ni. He chanchin hian Pathian thil tum leh Pathianin hun a tih chu ring tlat turin min tichak ve mawlh rawh se.
Chhanna zawng zawng neitu a ni tih hriain kan hma lam hun atan Pathian chu kan ring ve thei ang em?

NGUN TAKIN INNGAIHTUAH ILA!
Chona leh harsatna kan hmachhawn mekte ngaihtuah ila. Keimahni hriatthiamnaah kan innghat nge ni a, Pathian hnen atangin a kaihhruaina leh Finna chu kan zawng ṭhin zawk le?

Nitinin tawngtaina hmangin kan nun kalkawng min kawhhmuh turin Pathian dil thin ila. Hmalam huna kal dan kan thiam theih nan, Daniela ang hian Pathian sawm thin ila, kan mamawh finna chu Pathian chuan min pe dawn a ni tih ring tlat ang u.

Kan nuna harsatnate sukiang a, thilmakte chu min hrilhfiah sak turin Pathian thiltihtheihna chu ringin Amahah kan rinna nghat tlat ang u aw.

ṬAWNGṬAINA
27 Daniela chuan lal chu a chhâng a, a hnênah “Thil inthup, lal in hriat a duh chu, mi fingte, aikaihthiam te, dawivaihthiamte, aisânthiamte chuan lal hnênah an entîr thei lo va;
28 mahse thil inthupte puangtu Pathian chu vânah a awm a, lal Nebukadnezzara hi tûn hnua thil lo la awmtûr te chu a hriattîr a nih hi. I mumang leh i khum laizâwla i lû-a inlârna te chu hêng hi a ni: (Daniela 2:27-28).

Ka Pa vana mi, nun awmzia a thara min hriatfiah tir zel avang leh, midangte dinhmun hriatthiam theihna min pek thin avangin lawmthu ka hrilh a che. Nang chuan hma lam pan zel turin ka tana tha ber tur chu min hrilhfiah sak thin a. Hmun thim berah pawh I finna hmangin eng min chhit sak thin, lawmthu ka hrilh a che. Midangte rawng nangma hminga tha zawka ka bawl sak theihna turin, Midangte dinhmun hre thiam a, an natnate pawh hmuh sak thiam thei turin hriatthiamna thinlung chu min pe ang che. Mi tam tak ten kan nuna mumanga chu hrethiam lovin kan buai thin a, chung ang mite chuan an lo hriatfiah theihna tura beiseina an neihna hmanrua lo nih ve theih ka duh e. Ka rilru leh thinlung tifiahin min tihfai sak la, Daniela anga midangte tana nangma hminga beiseina siamsaktu ka nih ve fo theihna turin, Isua hmingin ka dil e, Amen!