HUAISENNA NEI TUR CHUAN, MAHNI INPHAT LEH PATHIAN RUAHMANNA A INNGHAT NGAM RINNA KAN MAMAWH FO THIN.

#ZONEWS #FIANRIAL AUGUST 25, 2025:
HUAISENNA NEI TUR CHUAN, MAHNI INPHAT LEH PATHIAN RUAHMANNA A INNGHAT NGAM RINNA KAN MAMAWH FO THIN.

Vawiin kan fianrial hunah chuan Persia lalnu lo ni ta, Juda hmeichhia Esther chanchin kha ngaihtuah ila. Lal Ahasuera duhsak niin, a hmelthatna leh duhawmna avangin lalnu nihna a chang a. Amah enkawl seiliantu leh a pa ang chiaha a en Mordekaia pawhin lal thah tumtute a hriat ruk avangin lal duhsakna a chan phah bawk a. Nimahsela, Hamana chuan Mordekaia chu a itsik leh huat avangin amah mai ni lo Juda mi zawng zawng chu thah chimih vek a tum a. Estheri chuan a finna leh mahni inphata huaisen taka a thilth avangin, chu hun khirh takah chuan a mi Juda-te chu thihna tur lakah a humhimin a ni.

PERSIA RAM LALNU JUDA MI ESTHERI
Tun hun anga i ngawih mai mai chuan, hmun danga Juda-te tan himna leh chhuahna a lo awm pawhin, nang leh i pa chhûngte chu kan boral ang. Lal nihna i lo chan hi hetih hun atân ngei hian a ni dawn lawm ni?” va ti tûrin a tir a (Estheri 4:14).

Dinhmun hlauhthawnawmah din phah dawn pawh ni ila rorelna dik lo laka din chhuah a ngaihna hun leh hmunah kan awm ve tawh em?

Persia-a Juda hmeichhia Estheri chuan chutiang chu a tawk a; lalnu a lo nih hnuin a mite thah chimih vek tuma phiar rukna chu a hmachhawn a ni.

Engtin nge diklohna leh sualna te hmachhawn turin chakna kan zawn hmuha kan lak theih ang?

Lal Ahasuera’n a thu awih loh avanga lalnu hmasa Vasti, lalnu nihna atanga a hnawl hnua lalnu atana Estheri a thlan atangin Estheri chanchin chu a in ṭan a. Estheri lalnu a lo nih theihna kal kawng chu a hmelthatna leh duhawmna mai bakah, a thuhnuairawlhna leh a rilru tha tak mai chu a ni a, chungte chuan lal duhsakna chantirin lalnu a lo nih theih phah ta a ni. Amah enkawl seiliantu Mordekaia paw’n lal tihhlum tuma phiarrutute a hriat ruk chu a hailan avangin lal duhsakna nasa tak a chang ve bawk.

Thutlukna harsa tak siam ngaia kan awmin engtin nge hma kan lak ve thin le?

Mi zahawm tak leh lal duhsakna chang ṭhin, Hamana chuan, a hmaa kun ve duh lo Mordekaia chu a haw em em mai a. Chu a huatna avang chuan lalram chhunga Juda-te zawng zawng that chimit vek turin lal chu thupek a siam tir a. Chu inphiarrukna rapthlak tak mai a hmachhawn avangin chuan, a nunna atana hlauhawm ni mah sela, Juda mi a nihna sawi chhuakin a mite tan a dil sak dawn leh dawn loh chungchangah thutlukna Estheri chuan a siam ngei ngei a ngai ta a ni.

I rinna chauh hmachhuana thutlukna khirhkhan tak mai i siam hun te i tawng ve tawh em?

A thihna hial thlen thei ni mahse, koh a ni lo chungin Estheri chu huaisen takin lal hnenah a va kal a, lalnu a nih chhan a chiang a, rinna leh beiseina hmangin huaisen takin a mite tan a pen chhuak a ni. A thiltih chuan a mite a chhanchhuak a ni satliah ngawt lova, mi pakhat huaisenna thiltih hian a nghawng nasat theih zia chiang takin a lantir bawk a ni.

Keimahni nun in en ila. Dinhmun hlauhthawnawm emaw, midangte sawiselna leh sawichhiatna tur emaw pawh nisela, thil dik leh ṭha ṭan avanga nghet taka kan din a ngaihna dinhmunah kan awm tawh ve tawh ṭhin em? Estheri ang chiah hian Pathian kaihhruaina leh A chakna chu ring tawk ila, huaisen taka kan thiltihte hian danglamna nasa tak a thlen thei a ni tih i hre reng ang u.

NGUN TAKIN INNGAIHTUAH ILA!
Dik lohna hmachhawn tura huaisen taka pen chhuah kan ngaihna hun leh hmun kan nuna kan tawn tawh te ngaihtuah teh ang. Rinna hmachhuana huaisen taka kan chet chhuah a ngaih hun leh hmun dinhmunah kan ding tawh ve tawh thin em le?

Estheri’n huaisen taka a thiltihte kha ngaihtuah ila, Pathian hian tuna ka awmna leh dinhmunah hian chhan neiin min awmtir a ni tih hi i ring tlat ang u.

Dinhmun hlauhawm leh midangten min sawichhiatna karah pawh dik taka thil kan tiha kan chet chhuah zel theihna turin chakna leh finna dilin i tawngtai ang u.

ṬAWNGṬAINA
Tin, lal chuan a hnênah, “Lalnu Esther, eng nge i duh le? Eng nge dil i duh? Ka ram zatve hial pawh ka pe ang che,” a ti a (Estheri 5:3).

Ka Pa vana mi, vawiina Estheri chanchin ka hriat ang hian, kan nuna thil min pek engkim mai hi chhan nei leh awmze nei, midangte nghawng thei vek a ni tih min hriatchian tir ang che. Mahni tan pawha ding thei lote tana lo dinsak turin nang chuan theihna min pe a ni tih ka hria e. Chuvangin a tul huna nghet taka dinga, Estheri anga huaisen taka, Nangman tihtur leh mawhphurhna ka chunga I nghah hi ti a hmachhawn zel thei turin, ka hmaa kal chu nang I ni tih min hriat chiantir zel ang che. Isua hmingin ka dil e, Amen!