“KAN RINNA HI A TAKA KAN LAN CHHUAH TIR DAWN CHUAN LAL ISUA NENA KAN INLAICHINNA ATANGA RAWN LUANG CHHUAK A NI TUR A NI. CHU CHU PATHIAN THU KAN NUN KAIHRUAITUA HMANA, HMANGAIHNA A TAKA MIDANGTE HNENA LAN CHHUAH TIR HI A NI.”

#ZONEWS #FIANRIAL July 27, 2025:
Vawiinah chuan pawl bawm chhunga inkhung bet tlat ni lo rinna nunpui chung chang ngaihtuahho teh ang. Pathian thu anga A tak taka midangte hmangaihna hian hlimna thuk tak leh rinna chak zawk neihna kawngah min hruai ṭhin a. Hmangaihna kan lantirna hmunah chuan Pathian hmel kan lantir ṭhin a ni.

Mi hriata, mi rina, amah chu ka ni tih in hriat theihna tûrin, nangni hi mi hriatpuitute in ni, ka chhiahhlawh ka thlana pawh chu, LALPAN a ti: ka awm hma chuan Pathian rêng rêng din an awm lo va, ka awm hnuah pawh an awm hek lo vang.
-Isaia 43:10

Vawiina nung dama kan la awm chhan hi tuten emaw Lal Isua panna kawng an hmuh theihna tura puitu leh ṭanpuitu nih hi niin kan hria em?

Isua kan rinna nun hi thil a fuh hun emaw, a nih dan tur tak a nih hun nghah reng ringawt a ni lo a, engtiklai mai pawh hi midangte hnena hmangaihna lantirna hun remchangah kan chantir thiam a ngai zawk a ni. Pathian chuan tupawh mai hi, eng hunah pawh, khawi hmunah pawh a hmang thei vek a ni. Va ṭawng duah lam ni lovin hmangaihna nun kan lanchhuahtirna hmangin a ni ṭhin. Nitina kan bula chengte emaw, kan chhehvela awmte hnena Pathian hmangaihna lan chhuahtir ṭhin nun hi, Pathian hriatpuitu thiltithei leh ropui berah a chang ṭhin.

Inpeih lo leh tling lo ni a ka hriat avangin hun remchang engzat nge ka lo liamtir ve tawh le?

Kan rinna chung chang emaw, Pathian thu hrim hrim midangte pek chhuah kawngah hian la tling tawk lo leh la hre tawk lo niin kan inhre fo ṭhin. Nimahsela Pathian thu chuan kan thuawihna hi kan tlinna a ni tih min kawhhmuh zawk a ni. Pathian thu keimahniah a awm a, Pathian thlarau thianghlimin min awmpui phawt chuan kan kalna hmun a piang mai hi Pathian hmangaihna lan chhuahna hmun thianghlimah a lo chang mai ṭhin a ni. Hlim hmel nui sang mai te, tawngtai saknate, thunem, zaidam leh ngilnei tak chhakchhuah ṭhinte hi, Pathian chuan midangte nun thlakna atan a hmang fo thin. Chung mite chuan kan thiamna an mamawh loa, Pathian thu kan zawm leh awih avanga, thinlung taka kan ngaihsakna leh kan hmangaihna kha an mamawh zawk chu a ni.

Vawiina midangte nena kan inbiaktawnna hian chatuan atan pawimawhna leh nghawng a nei thei a ni tih I hre chiang tak zet a nih chuan vawiinah hian eng nge nangmahah thlak thleng tur I neih ve le?

Kan rinna midangte hnena kan puahchhuah leh lantir hi midangte tan a ni ringawt lova keimahni ngei pawh Pathian nena kan inlaichhinna tihngheh zual zel nan a pawimawh em em a ni. Isaia 43:10 hian Pathian kan hriat chianna kawng pakhat chu Amah hriatpuitu kan nihna atang hian a ni tih min hrilh nawn a. Rinnaa kan pen chhuah a, Pathian thiltihtheihna a lo lan hian kan zahna leh hlauhna zawng zawngte pawh a lo bo mai ṭhin. Thinlung kehsawma kan awm hunah, natna kan tawrh laiin, thihna hialin thla a rawn zar hunah pawh Rom 8:28 thu hi hre rengin nghet takin kan rinna chu I vuan tlat ṭhin ang u. Pathian thiltum chu awmze nei lo a ni ngai lo. A lang chiang em em a ni; bo tawhte zawnga chhanchhuah hi a ni a, chumi titur chuan Pathianin min hmang duh vek a ni.

NGUN TAKIN NGAIHTUAH ILA!
Nangmah kha han in zawt ve teh le: Ka nun dan hi thianghlimna kawng zawh nun a ni em? Pathian hmangaihna I lanchhuahtir theihna tur tuemaw pakhat tal nena in titidun theihna tur kawnga hruai tur chein Pathian hnenah dil la, nikhat tal chu chutiang chuan I hun han hmang teh le. Huaisen viau emaw, tawngkam thiam tak nih emaw a ṭul hmasa hran lova, Pathian thuawiha tumna tak tak neih a, ngilneihna leh hmangaihna lantira kan va awm ve mai kha Pathian chuan a hmang ṭangkai dawn a ni.

Hotein bul han ṭan teh: ṭawngṭaisak dil la, I thian leh I bula mite chu a theih dan danin han fuih ve la, emaw an harsatna leh an sawi duhte han ngaihthlak sak teh. Pathian thu va sawi hluah hmasak kha a ṭul ber lova, thinlunga leh tihtak zeta Pathian hnena inpek pumhlumna thinlung kha an mamawh hmasak ber zawka chu a ni. Pathian atanga chhuak hmangaihna nen zawitein bul han ṭan la, bul ṭanna leh hun naran tak kha Pathian chuan chatuan kawngah a chantir thei a ni.

ṬAWNGṬAINA
LALPA i Pathian chu i chungah a awm e, Chhandamtu tûr mi chak tak chu: Lâwmin i chungah a hlim ang a, a hmangaihna a tithar ang a, Hla sain i chungah a lâwm ang.
–Zephania 3:17

Aw Lalpa PATHIAN, Nang chu ka nun chhungril berah hian i awm a, ka nunna bulpui i ni a, hlauhna lakah min humin hlimna hmunah min chawisang leh ṭhin a. I hmangaihna chuan ka hlauhna a tireh a, I thu chuan min tiharh thar leh ṭhin. I hmangaihna hlate chuan lawmna min siamsak leh ṭhin a. I hmangaih leh khawngaihna chuan nun thar min pein i ta ka nih thu min hriattir ṭhin si a. Hremna nasa tak ka tawrhtur chu min lak bo sakin hmangaihnain min lo kuangkuah a. Ropuina leh chawimawina zawng zawng neitu i ni e. Isua hmingin ka dil e, Amen!