ZONEWS: NI KHAT AWH COMMERCE & INDUSTRIES DEPARTMENT HNUAIA SCHEME HRANG HRANG INHRILHHRIATNA HUN SIAHA-AH HMAN A NI.

#ZONEWS July 9, 2025: Vawiin chawhma dar 11:30 khan District Industries Office, Conference Hall, Council Vaih, Siaha-ah Commerce & Industries Department hnuaia mipuite tana hmathatna awm scheme hrang hrang inhrilhhriatna hun hman niin Pu M Misael, Project Director, DRDO leh District Commerce and Industries Officer (DCIO) nibawk chuan he hun hi hmanpuiin training a hawng.

Thu sawiin Pu M Misael chuan kan ram leh hnam kan la intodelh lo va, hmasawnna tluantling nei tur chuan district atanga hma lak a ngaih chang a awm a. Chumi atana pawimawh tak training hun buatsaih a ni chu department aiawh leh kalkhawmte chungah lawmthu a sawi hmasa. Training-naa zir anga tha taka hmalak chu dinchhuahna tur a ni a, a hlawkna teltu chu keimahni bawk kan ni, a ti. Nutling patling training tura kal kal te chu zirlai rilru puin thiam tum tak leh zirtir nuam taka awm turin a chah a ni.

DCIO chuan a theih chen chenah tualchhung kutchhuak leh tharchhuah ngaihhlut a pawimawh a ti a , lei thei dinhmuna ding chuan tualchhung tharchhuah lei kawngah induhsak liam liam turin kalkhawmte a sawm bawk. Training neih hi thil awlsam tak anih loh avangin sum leh pai tam tak senralna ni lova reilote pawh nise hlawkna teltu ni theuh turin kalkhawmte a sawm bawk a ni.

Pu Christopher Lalbiaknia, Consultant, Angel Business Promoters of Mizoram chuan power point hmangin scheme hrang hrang – UNNATI, PMFME, PMEGP leh a dangte sawifiahna a nei a, kalkhawmte’n zawhna an neihte a chhang nghal bawk.

Vawiin hun hmannaah hian department mi leh sa bakah SHG leh scheme hrang hrang hriatchian duh mi eng emaw zat an kalkhawm a ni.

#zonews #chanchinthar #tualchhung