#ZONEWS: Central Trade Union in rampum huapa nawrh a huaihawt chu Mizoram Rural Bank Union chuan zawm ve in, vawiin khan MRB Head Office, MINECO- kawtah MRB thawktu 150 chuang an kalkhawm.

#ZONEWS July 9, 2025: Central Trade Union in rampum huapa nawrh a huaihawt, General Strike chu Joint council of Mizoram Rural Bank Union chuan zawm ve in, vawiin khan MRB Head Office, MINECO- kawtah MRB thawktu 150 chuang an kalkhawm.

Vawiin chawhma dar 10 leh a chanve khan Mizoram Rural Bank Head Office, MINECO kawtah MRB branch hrang hranga thawktu 150 chuang te chu sorkar laipuiin Labour Codes pali a siam te duh lohna lantirna leh Regional Rural Banks (RRB) anga thil phut 5 te lantir nan an pungkhawm a. Mizoram Rural Bank Officers’ Association (MRBOA) President Pu Lalrindika Fanai chuan an nawrh chhan chu All India Regional Rural Bank Employess Associtation (AIRRBEA) te nawrhna chauh ni lovin, India ram puma hnathawk mi nuai tel te nawrhna a ni tih sawiin, he nawrhnaah hian Bank-a thawkte pawhin an lungawi lohna leh an duhkhawp lohna te an tel ve tih a sawi a, chung zingah chuan Labour Code pali thar an hman chu nawrh huaihawttute duh loh ber a nih thu a sawi a ni.

Bank hnathawktute intelkhawm, AIRRBEA chuan thil phut 5 an nei a, chungte chu mimal kutah regional bank hlan (privatisation) an duh lo a, National Rural Bank of India hminga regional bank hrang hrang khaikhawmtu apex body siam an duh a, a nghet loa hna hrang hrang thawk dah ngheh leh tun dinhmuna hna ruak awm mek hnawhkhah te an duh a, hei bakah hian New Pension Scheme ti bo a, Old Pension Scheme (OPS) hman leh an phut bawk a ni. MRB thawktute chuan an thil phutte hi an aupui a ni.

#zonews #tualchhung #sawrkar