#ZONEWS: Serchhipah District AIDS Prevention and Control Committee thukhawm.

#ZONEWS July 10, 2025: Vawiin chawhnu khan Serchhip District AIDS Prevention and Control Committee (DAPCC) chu an Chairman Pu Paul L Khuma, District Bawrhsap hovin Pisapui Conference Hall-ah an thukhawm.

Vawiin meeting ah hian District Integrated Strategy for HIV and AIDS (DISHA) ngawrh taka kalpui a nih dan te, Serchhip DAPCC hmalakna leh hmachhawpte ngaihthlak a ni a. Tleirawl kum 13 atanga kum 17 zingah HIV/AIDS leh mipat hmeichhiatna atanga natna inkaichhawn theih te a darh zel lohna tura theihtawpa tan lak niin an pual hian School Education te nena thawk hoin Awareness Campaign ngawrh taka kalpui thin a ni a. Kuminah pawh Red Ribbon Quiz neih leh tur niin Class 8, 9 leh 11 zirlai te zingah Quiz hi School, District leh State pum huapa neih a ni ang.

Serchhip District chhunga Red Ribbon Quiz neih dan tur rel niin mahni School theuhah August ni 15 ah online a neih a ni dawn a. District chhunga school 50 aia tlem lo tel tura beisei an ni. School titha zual 10 thlanchhuahte chuan District pum huapa inelna an hmachhawn a nga, September ni 2 (Nilaini)-ah Pisapui Hall, Serchhip DC Office ah neih a ni ang. Heta titha te hi Serchhip District aiawhin State huap inelnaah an tel dawn a ni.

Sawrkar kum 2024-2025 chhungin Serchhip District-ah HIV hrikpai mi 65 hmuhchhuah an ni a, an zinga pathum hi nu naupai an test atanga hmuh chhuah an ni. Positive 65 hmuhchhuah thar zinga 50 hi mipa an ni a, 15 hmeichhia an ni thung a. Mipat hmeichhiatna atanga kai leh hriau inhmantawm atanga kai hi mi 30 (48.38%) ve ve an ni. Hetihlai hian Mizoram pum huapin kum 2024-2025 chhung khan HIV hrik pai mi 2021 hmuhchhuah an ni a, heng zinga mi 110 hi nu naupai thisen endik atanga hmuhchhuah a ni a. Mipat hmeichhiatna atanga kai hi 1302 (68.13%) niin hriau inhmantawm atanga kai hi 559 (29.25%) an ni.

Vawiin meeting ah hian Serchhip SP Pu Gavit Gogna bakah School Education Department, Health Department, I&PR Department leh official dang te an tel a ni.

#zonews #chanchinthar #tualchhung #sawrkar #serchhip