#ZONEWS: Champhaiah I&PR leh MJA tangkawpin Media Workshop buatsaih

#ZONEWS July 11, 2025: Vawiin khan I&PR Auditorium, CHANEM Building, Champhaiah Information & Public Relations Department, Mizoram Journalists’ Association, Champhai leh Mizoram Journalists’ Association, Khawzawl tangkawp chuan “Mizo Tawng Ziah Dan Dik” tih leh “Traditional vs. New Media” tih thupui hmangin Media Workshop an buatsaih a, Sub-Deputy Commissioner Pu Lalchhuanawma Ralte chu khual zahawm a ni.

Khual zahawm Pu Lalchhuanawma Ralte chuan thu sawiin Mizo tawng hi Mizo te min pawt khawmtu, hnam nihna min petu a nih thu a sawi a, thuthar lakhawmtute tan chuan a tawng chhui leta, a hlutna hriaa vawnhim hi pawimawh a tih thu a sawi. Mizo tawng dik ngeia ziak emaw chhiar emaw hmanga thu puang zel turin a fuih a, workshop an hlawkpui ngei a beisei thu a sawi. Traditional media atanga new media-a muangchanga insawn a tul tawh thu a sawi bawk a, newspaper lar ber ber pawhin an print tlem tial tial tih sawiin mipui hnena an thu puanzar a thlen ngei theih nan theihtawp chhuah turin a chah bawk a ni.

He workshop hi Champhai DIPRO Pu Lalzara’n kaihruaiin thupui sawi zauna presentation a nei nghal a, Mizo tawng chungchang, a tawng hmangtu awm zat te, a than dan te, a ziah dan dik te leh media chungchang, thuthar lakhawmtute hna a inthlak chhoh dan leh an harsatna tawh te, inthlak a tul zia leh inthlak theih dan chungchang te zirho a ni. MJA member te leh thuthar lakhawmtu te’n an tawnhriat te, an ngaihdan te leh hmasawn theih dan tur te an sawi bawk a, sawihona hun tha tak neih a ni.

He hunah hian Champhai leh Khawzawl MJA member te bakah thuthar lakhawmtu hrang hrang, stringer te, news editor te leh reporter te an tel a ni.

#zonews chanchinthar #tualchhung #champhai