Tamil Nadu Coimbatore-a Karunya Institutes of Technology & Sciences (Deemed to be University) chuan vawiin khan an campus-ah Convocation vawi 31 na an hmang a. Chief Minister Pu Lalduhoma chuan khuallian niin a hmanpui.

#ZONEWS July 12, 2025: Tamil Nadu Coimbatore-a Karunya Institutes of Technology & Sciences (Deemed to be University chuan vawiin khan an campus-ah Convocation vawi 31 na an hmang a. Chief Minister Pu Lalduhoma chuan khuallian niin a hmanpui.

Karunya University hian Chief Minister hi Honorary Doctorate Degree an hlan nghal a ni. Pu Lalduhoma chuan, Honorary Doctorate Degree an pek chu an rawng a bawlsak mek Mizoram, ramchhunga ziak leh chhiar tamna ber te chenna ram mipuite aiawhin dawng tih a sawi a. Zirnain hmasawnna leh changkanna a thlen zel a ni tih lantirnaah a ngaih thu a sawi.

Chief Minister chuan, India rama zirna in tha tam tak chu Kristian te din leh enkawl an ni a ti a. Zirna te, hriselna te, hnuchham enkawlna leh khawtlang rawngbawlna kawng dangah pawh, ram pum huapa mipui awm zat atanga tehin tlem hle mah se, ringtute hian an thawhhlawk thin a ti a. Karunya University pawh chutiang rilru pu chunga din leh kalpui a ni a. India chhim lama University tha leh changtlung pawl tak a ni chho ta hial a. Ramin kan hlawkpui em em a ni, a ti.

Zirlai hlawhtling thar te hnenah pawh thu chahin, tih tum bul fuk nei lo va hlawhtlinna chu a pawnlawi fo a ti a, ram leh khawtlang tana mi tangkai tak nih tumna neia an kawng zawh zel turin a fuih a, khawvel hian mithiam a mamawh belh satliah lo va, midangte thatna tura inpe, hmangaih taka rawng bawlsaktu tur mithiam a mamawh zawk a, ngaihhlut tur dik tak ngaihlu chungin a tha zawnga khawvel thlak thlengtu nih tum vek ni se, a ti.

Executive Council of Karunya Institute of Technology & Sciences (Deemed to be University) chuan Pu Lalduhoma chu hmingtha taka khawtlang rawng a bawl thinna te, hmathlir tha tak nei ram hruaitu a nih vang te, remna leh muanna a awm theih nana nghing lo va a inpek thinna te, hmasawnna leh mipui sawrkar dinna kawnga a hnathawh tha tak tak te avangin Doctor of Letters a hla niin an sawi a ni.

#zonews #mizoramcm #lalduhoma