Lungleiah LMC hnuaia Traffic and Transport Co-ordination Committee an ṭhu khawm

#ZONEWS July 14, 2025: Vawiin khan Lunglei Municipal Council (LMC) hnuaia Traffic and Transport Co-ordination Committee (TTCC) chu an Chairman, LMC Vice Chairman Pu K. Lalrinawma hovin Lunglei Convention Centre-a BoC Meeting Hall-ah an ṭhu khawm.

LMC Vice Chairman Pu K. Lalrinawma chuan Lunglei khawpuiah lirthei tlan dan leh hun dan felfai leh ṭha zawk a awm theih nan insingsak mek a nih thu sawiin, hma hun thui tak thlir lawk chunga ruahmanna siam a ṭul thu a sawi a. LMC chuan an thupek chhuahte a taka en zuitu, enforcement staff an neih ve tawh thu leh police lam nen thawh hona ṭha tak an neih thu sawiin, ruahmanna ken kawh kawngah pawh khauh zawk leh felfai zawka hma lak zel theih an beisei thu a sawi.

Member Secretary, LMC Chief Executive Officer Pu Donny Lalruatsanga chuan thu ngaihtuah tura chhawp chhuahte a sawi fiah a. Sawrkar office, lirthei hmanga ei zawng pawl hrang hrang, veng leh kohhran aṭanga lirthei dinna leh channa hmun (parking & stand) chungchanga dilna leh rawtna lutte thlir ho niin, khawpui chhunga cheng leh mipui tam zawkte tana ṭha ber tur ngaihtuah chungin sawi ho a ni a. LMC lamin Lunglei khawpui chhunga sumdawng lirthei chi hrang hrang – taxi, two-wheeler taxi, auto rickshaw, maxi cab leh pik-up te dinna hmun ruahman dan leh a taka hman a nih dan an zir chianna (verification report) chu thlir ho niin, ruahmanna felfai leh ṭha zawk atana rawtna hrang hrangte sawi ho a ni bawk.

LMC TTCC ṭhu khawm chuan sawrkarin lirthei dinna leh channa hmun atana ruahmanna a siam leh a chhinchhiahna a rin baka pawl, mimal leh dawr te’n mahni thua chhinchhiahna lo rin emaw, mahni lirthei hunna tur lo hauh va, ‘parking/no parking’ lo rin ve ringawt emaw phal a nih loh thu an sawi a. Mipuite chu thu neitute ruahmanna ngaichang a, zawm turin an ngen a ni.

#zonews #chanchinthar #tualchhung #sawrkar #lmc #lunglei