Union MoS Pu George Kurian an Siaha-ah PMJVK hnuaia project 2 hna thawh tanna tur lungphum phum

#ZONEWS July 16, 2025: Hon’ble Minister of State for Minority Affairs and Fisheries, Animal Husbandry & Dairying, Govt of India, Pu George Kurian chuan vawiin khan video conference hmangin PMJVK hnuaia Siaha District-a project thlan chhuah pahnih (2) hna thawh tanna tur lungphum a phum.

He hun hi MADC Golden Jubilee Hall, Siaha-ah Addl DC Pu Abraham Beirazi Khithie kaihhruaina hnuaiah neih a ni a, Siaha District a MLA 2, Dr K Beichhua, Pu K Hrahmo, BJP National Secretary-Minority morcha Pu Delson Notlia te bakah Mizoram Sawrkar leh MADC a hotute an tel kim hle.

Hon’ble Union Minister of State for Minority Affairs Pu George Kurian chuan Prime Minister Pu Narendra Modi kaihhruaina hnuaiah India ram chu Kum 2047 ah Developed country (Vikshik Bharat-2047) a siam tumna huangah hmasawnna hna tam tak thawh a ni tawh a, Hmarchhak state leh a bikin Mizoram pawh nasa taka thuam chak niin ram hmasawnna turin theihtawp chhuah a nih thu a tarlang. Siaha District-ah PMJVK hnuaia thlan chhuah project 2 lungphum phum a ni tur chu a lawmpui hle a ti a, Market Shed cum Multipurpose Centre and women facilitation centre at Tipa leh Multipurpose Community Hall at Siaha te chu Mara ram mipuite nunphung nen pawh a inrem hle tiin tangkai taka hman a nih theih nan duhsakna sang ber a hlan chhunzawm a ni. Minister of State for Minority Affairs hian thu a sawi zawh hian Video conference hmangin lungphum phumna a nei chhunzawm nghal a ni.

Dr K Beichhua, 39-Saiha (ST) A/C Bialtu MLA pawhin thu sawiin Siaha Bialtu a nihna angin Sawrkar laipui chungah lawmthu a sawi a, Khuallian Pu George Kurian chungah pawh a mah ngeiin vawiin hun a rawn hmanpui avangin lawmthu a hrilh bawk. Sawrkar Laipuia sawrkarna fawng vuan mekte chu hnam hnuaihnung zawk (Minority) te ngaipawimawh a, an dinchhuah ve theihna tura theihtawp an chhuah thinna ah lawmthu a sawi a, hun lo la kal zel turah pawh an hmakhua ngai chhunzawm a, hmasawnna hmel an hmuh zel theihna turin thawhpuiah a sawm nghal bawk a ni.

Pu M Laikaw, Chief Executive Member, MADC pawhin Mara mipuite leh MADC aiawhin Central Sawrkar chungah lawmthu a sawi a, hnam hnuaihnung zawkte chawikanna kawnga an thahnemngaihnaah thinlung takin lawmthu a sawi. Vawiina Lungphum phum tak 2 bakah MADC in PMJVK hnuaia project an thehluh dang pathum(3) tarlangin, a vaiin cheng nuai 9,000/- man hu pawm a nih avangin lawmthu a sawi bawk a ni:

1) Construction of Maraland Gospel Centenary Hospital 2) Construction of Girls Hostel at Zotlang, Aizawl
3) Construction of school building within MADC area

Vawiin a PMJVK hnuaia Lungphum phum tak te hi PMJVK scheme hnuaiah Mizoram sawrkar recommend na a project thehluh tam tak atanga thlanchhuah niin :

1) Construction of Public Market cum Multipurpose Centre and Women Facilitation Centre at Tipa V, Siaha District, Mizoram

2) Construction of Multipurpose Community Hall, Siaha District , Mizoram te an ni.

Hun kaihruaitu Pu Abraham Beirazi Khithie, Addl DC chuan lawmthu sawina neiin vawiin hun hi tihtawp ni.