KOLASIBAH PMFME LEH MSME SCHEMES AWARENESS & TRAINING PROGRAMME NEIH A NI

#ZONEWS July 16, 2025: Vawiin khan I&PR Conference Hall Kolasib ah Commerce & Industries Department huaihawtin ‘Pradhan Mantri Formalisation of Micro Food Processing Enterprises Scheme’ (PMFME) leh ‘Micro, Small and Medium Enterprises’ (MSME) schemes chungchangah Awareness & Training Programme buatsaih a ni. He hunah hian District Bawrhsap Pu Robert C. Lalhmangaiha chu khuallian a ni.

Khuallian, Pu Robert C. Lalhmangaiha DC Kolasib chuan thu sawiin, hmasawnna chu thawhhona tel lovin a awm thei lo a, hmasawn tur chuan inlungruala thawhhona tha nen ke pen ho a ngai a ni, a ti a. Kalkhawmte chu an hun tha taka hmang tur leh vawiin a an thil zir te chu an hma hun zel atana hlawhtlinpui ngei turin duhsakna a hlan a. Khuallian chuan sawi zawmin, tunhma a kan pi leh pu te taihmakna, tumruhna leh an hmalakna kawnga an hlawhtlinna te kha tun hunah hian kan pha tawh lo hle a ni a ti a. Kan pi leh pu te kha kan entawna kan in zir thar leh a ngai a ni tiin, chutianga hlawhtlinna an neih theih nan vawiina training programme chu tangkai taka hmang turin kalkhawmte a chah a ni.

Vawiin hun, Pu C. Lalthangkima, District Commerce & Industries Officer, Kolasib kaihhruaiah hian Pu Lalmuan Puia, Project Director DRDO, Kolasib chuan Central scheme hrang hrang atanga hmasawnna hmuh theih thenkhat tarlangin, Central Sorkarin Scheme hrang hrang a chhawp chhuah sak te chu anmahni, an chhungkua, khawtlang leh ram economic dinhmun chawikan anih zel theihna atan vawiin a an hun hman chu tangkai taka hmang turin kalkhawm te chu a fuih bawk ni.

He hunah hian Pu PC Lalnunpuia, Lead Bank Manager leh Christopher Lalbiaknia, Principal Consultant, RAMP, Commerce & Industries Department ten kalkhawm te zirtirna an pe a.

Kolasib district huamchhunga Self-help Group te, Society-te leh Bank lama thawktute leh Department hrang hranga thawktu te mi thahnem tak an tel a ni.