KAN IN UNAUNA TICHHE LOVIN, CHIN-KUKI-MIZO HI A MALA LAK HRAN MAI HI A THA ZAWK LAWM NI.

#ZONEWS #Article July 17, 2025: He thu hi internet kawngsira an paws a ni a. Saptawnga ziah a nih angin saptawngin a ngai ngaiin ka rawn dah hmasa ange.

Zo should be confined to Mizoram state politics only

The term “Zo” originated from the Mizo tribe in Mizoram. It does not include the Kukis of India, the Chins of Myanmar, or the Bawms of the Chittagong Hill Tracts in Bangladesh. In fact, there are no historical records or government documents acknowledging the term “Zo”. As a derivative of Mizo, the term “Zo” should be confined to Mizoram state politics only.

The term Kuki refers to the tribals living in Western Myanmar, the Chittagong Hill Tracts in Bangladesh and the North Eastern India.
The British Govt had recorded the Kukis ‘ History in the 17th century and is recognised by the UN so the term Kuki can’t be changed into any other name.

The recognised Kuki Country by the British Govt in 1904 can’t be changed into any other name like Zoland, Zalengam, Zogam, etc. There are evidences like the Anglo-Kuki war and other valuables preserved in the London Museum.

We are Kukis and we are people who once already had a country. We need to restore the long lost sovereignty . Be vigilant about it.
~SG HAOKIP

A ziaktupa kan Kuki Unaupa hian, “ZO” tih hi Mizoram Politics huang chhung atan a tawk, Mizoram chhung chinah tawp rawh se a ti a ni ber mai a.

Mizo/Duhlian tawngin a awmzia han sawi zuaih zuaih ila:

“‘Zo’ tih thumal pawh hi Mizoram atanga rawn chhuak a ni a. India rama Kuki-hote, Myanmar-a Chin-hote, Chitagong Hill Tracts (Bangladesh)-a Bawm-hote hi a huam tel lo. Thuhlui chhinchhiah (Historical Record)-ah, “Zo” tih thumal sawrkar lehkhaa pawmna leh hriatpuina hi engmah a awm lo. Chuvangin, Mizo atanga lak, “Zo” tih hi Mizoram state politics thil a ni a, Mizoram chauhin a huam.

Kum 1904 daih tawh khan, British sawrkar khan Kuki ram tiin a lo hre tawh a, chuvangin hming dang – Zoland, Zalenga, Zogam etc tea thlak theih a ni lo. A finfiahna turin Anglo-Kuki indona a awm a, London Museum-ah pawh a kaihhnawih thil hlu tak tak dah that a ni.

Kuki kan ni a, mahnia ram hran lo nei tawh kan ni. Hun rei tak mahnia thuneihna kan lo hloh tawh hi kan neih let a tul a. Hemi chungchangah hian inveng fimkhur kar reng rawh.” tiin Kuki a nihna anga a hriat dan leh a ngaihdan dik tak a rawn sawi chhuak a ni.

Hei hi Kuki nationalist ho, a tam ber ngaihdan dik tak a ni(?). Zofa nia kan chhal zawng zawngte hi, Mizo/Zomi/Zo/Zofa hnuaia inzawm khawm a theih dawn loh, Kuki hnuaia inzawm khawm a theih dawn loh, Chin hnuaia inzawm khawm hi a theih dawn loh niin a lang ta a. Unau kan nihna chu kan hria a, unau kan nihna chu a bo dawn chuang lo. Nimahsela, nia kan inhriat dan theuh ang hi kan hmangaih laklawh tawh si a. Kan awmna ram leh hmun theuh a, nia kan inhriat dan ang hian din chhuah tum theuh ila a tha mai lawm ni.

Kan Kuki unaupa ngaihdan chiah hi Mizoram chhunga cheng Mizo intite pawhin, Mizo kan nihnaa kan ngaihdan a ni tawh. Mizote ram Mizoram chu a piang tawh a, Mizo kan inti tawh a, Mizo tih chu midang min koh dan mai ni lovin keimahni inphuah ngei a ni bawk a. Chu chu dinchanpui tumin kan bei mek a ni. Mizo tih hmingin India kan do tawh a, kan nu leh pa pi leh pute an lo ram mu tawh a. Nunna leh thisen tam tak, Mizo hmingin a lo luang ral tawh, Mizo tih hi thil danga thlak theih a ni tawh lo. Hei hi kan dam chhunga kan nihna tur a ni tawh, tih hi Mizoram chhunga chengte chuan kan ngaihdan dik tak a ni. Chu Mizo hnuaiah chuan, hlim tak leh inngeih takin- Lusei, Lai, Mara, Hmar, Paite, Ralte, Vaiphei, Zomi, Bawm, Thadao(Kuki), Mathupi, Darlawng leh Zofa chi peng dang dangte kan cheng ho mek a ni. Mizorama chengte hi chu a tlangpuiin Mizo-ah hian kan lungawi a, Mizo nih hi kan hreh lo. Chibil politics-in a chim hneh avanga rilru dang pu te chu an lo awm mahna le.

Mizo leh Kuki te ang chiahin, Chin Hills lamah pawh Chin mi nia inhre nghet tlat, Chin mi ni a piang, Chin chu dinchhuahpui tum a tam zawk an ni a, Chin hills-ah an awm a ni emaw, ram dang leh hmun dangah pem pawh nimahsela, an thisenah Chin nihna chu a bet tlat tawh a ni. Tute sawi emaw avanga inthlak mai mai thei a ni lo. An hriat theih tirh, an pian tirh atanga an inhriat dan a ni tlat. Chutah chuan inpumkhat tura theihtawp an chhuah kha an tihtur a ni a, dem theih an ni lo mai ni lovin, pawmpui mai kha kan tihtur a ni zawk.

Mizorama mite pawh hian Mizoram ramri kan lo hian kan ram chhunga mite hi Mizoah kan inpumkhat theih nan theihtawp chhuah mai ila, a duh chu ramri pawn lam a mi pawh rawn tel ve mai sela. Chutiangin Kuki ho pawh, Chin ho pawhin bei bawk sela, tumahin tihluihna hmang lo sela, kan tel duhna theuhah khan bet mai hrih ila, kan duhna ber kha zawm ve ta mai hlawm ila. Unau kan nihna hre chungin, CHIN-KUKI-MIZO hi a hrang theuha kan lak hran mai hi a tha tawh e (?). Bible-a kan hmuh Isaka fate, Unau pianghmun Esauva leh Jacoba te paw’n hnam hrang leh ram hrang an din a lawm le. CHIN-KUKI-MIZO hming pakhat hnuaia dahkhawm hi chu khawvel awm chhung hian kan thei hmel tawh lo niin a lang e.

Mihring kan pung zel a, Zofate pawh kan awmna theuhah kan pung ve zel bawk a. Mizoram chhung ngei pawh han en ila, hamthatna beisei avanga, mahni chibil dinchhuahpui tum an nih fur hi, entirnan, Lai, Mara, Hmar, Paite. Mizoram chhung a mite pawh Mizo-ah kan huikhawm that hleih theih loh laia, ramri pela va chet chhen hi thil tul ber a ni lem lo.

Chin hills en ila, mahni chibil dinchhuahpui tuma bei vek an ni a. Anni pawh Chin anga inzawm khawm tur pawhin an beih fet a la ngai. Chin Hills pawn lam hi chu ngaihtuah hman an ni lo.

Kuki lam han en leh ila, ui ui ui a ni mai, an buai nuaih nuaih ve tho, Kukia insuihkhawm tur chuan an beih fet a ngai ve bawk. An ti thei ang em a hriat loh. Anni pawhin an huang chin bak pel lo sela, an awm hmunah Kuki lo dinchhuahpui mai sela chu chu a fuh ber ang.

Zofate hi kan awmna hmun theuha kan nihna ang hian awm mai hlawm ila, Unau kan nih erawh theih nghilh lohvin, a theihna na naah inpuibawm zel chungin, CHIN, KUKI leh MIZO hi mahni awmna theuhah i dinchhuahpui tawh mai ang u hmiang, insawm insawm pawh hi a tul tawh lo ve. Kan duhna theuhah ruai va theh mai ila, chutah chuan cham hlen ila, bak ang maia vir tawn sek lovin, a tha mai tawh lawm ni? Chu chu kan inlungrualna ber tur pawh a ni ang. Hming pakhat hnuaia kan inzawm khawmna tura kan beih hi chu chawlhsan tawh ila, unau kan nihna lam hi nasa takin inhrilh hre ta ila, a tha ang e.

Mizoram sawrkar pawh hian rawn tlan chhia ni ringawt lo, rawn pem duhte hi chu mumal deuha an rawn pem theih dante hi ngaihtuah sela, chutiang zelin Chin Hills leh Kuki ramah pawh. Mumal deuha kan khawsak hi chu a hun tawh e. Kan unaute itsikna leh huphurhna hi dahbo tum theuh bawk ila. Hming pakhat hnuaiah in zawm khawm thei lo mah ila, khawvel hian hnam ropui tak kan ni tih hi a hre ngei ang.