Cooperation leh Information & Communication Technology (ICT) Secretary in Siaha tlawh

#ZONEWS July 18, 2025: Mizoram Sawrkar hnuaia Information & Communication Technology (ICT) leh Cooperation Department Secretary Pu Amit Sharma, IAS chuan nimin khan Siaha tlawhin Sawrkar mi leh sate nen DC Mini Conference Hall, Siaha-ah inkawmhona an nei.

He inkawmhona kaihruaitu Siaha District Addl DC Pu Abraham Beirazi Khithie chuan Mizoram district a chhim tawp ber dinhmun zir chianga, hmalakna tur awm te a hmun ngeia enpui tura an rawn kal avangin lawmthu a hrilh a, vawiin thutkhawm chuan ram hmasawnna turah rah duhawm tak a hrinchhuah ngei a beisei tih a sawi. Pu Abraham Beirazi Khithie chuan Siaha District dinhmun tlangpui leh inrelbawlna kalpui a nih dan report tawi a pe a, Siaha District in harsatna a tawh thenkhat a tarlang bawk.

Cooperation leh ICT Secretary Pu Amit Sharma chuan hun chep tak karah thutkhawm ngai pawimawha kalkhawmte chu lawmthu a hrilh a, chawhma lamah hriattir lawkna awm lova District Hospital a tlawhna atangin Siaha District a Sawrkar inrelbawl dan chu a fel thawkhat hle a a hriat thu tarlangin lawmthu a sawi a ni. Sawrkar inrelbawlna thuam chak turin Mizoram chhunga Sawrkar Pisa pum chu e-office a siam a nih theih nan theihtawp an chhuah mek a ti a, chu chuan nasa takin hna a tih awlsam phah dawn a ti bawk a ni. A department chan ICT leh Cooperation Department aiawha kalkhawmte chu an hmalaknate leh hmachhawpte tarlang turin a sawm a, an harsatna tarlan tak te chu sutkian a nih theih nan theihtawp chhuahpui a tum thu a sawi bawk.

Heng bakah hian Pu Amit Sharma chuan Siaha District in hma sawn zelna turin theihna (potential) tam tak a nei a ti a, khualzin mite hip thei tur phochhuah kawngah department tin te tan la lehzual turin a fuih a, District mawina leh danglam biknate chu hmang tangkai thiam turin a chah bawk a ni.

Pu Amit Sharma hi Mizoram Sawrkar atangin Pu H Vanhlupuia, Deputy Registrar, Cooperation Department, Pu Lalengzuala, Informatics Officer ICT leh Pu Lalmuanawma DB Admin, MEeGS ten an rawn tawiawm a, he thutkhawmah hian Siaha District a Sawrkar mi pawimawhte leh telecom service provider- te an tel bawk a ni.