Mizoram State Bharat Scouts & Guides Chief Patron atan Larsap lakluh a ni

#ZONEWS July 22, 2025: Vawiin khan Mizoram Larsap, General (Dr) Vijay Kumar Singh, PVSM, AVSM, YSM (Retd) chu Mizoram State Bharat Scouts & Guides Chief Patron atan Pu H. Lalhmingthanga, State Chief Commissioner, Bharat Scouts & Guides, Mizoram State chuan Durbar Hall, Raj Bhavan-ah a la lut.

Larsap General (Dr) Vijay Kumar Singh (Retd) chuan Scouts & Guides hlutna, inthununna leh rawngbawlnate zahawm a tih thu leh khawvela thalaite beihpui thlakna nghawng nei lian berte zinga mi a nih thu sawiin, mahni duhthlanna, politic rawng kailo leh zirna kawnga hmalakna hmanga thalaite hmasawnna tluantling petu a ni, a ti a. India rama bultan a nih hun, kum 1909 atangin chak takin ram pumah nunphung tha inzirtirna leh vantlang rawngbawlna lama hmalak a nih thu sawiin, tunah chuan khawvela ram 216 a thalai maktaduai 67 te’n he pawl hi an zawm tawh a, thupui thlan ‘Once a Scout or Guide, always a Scout or Guide’ tih chuan member-te nunah hmun a chan kumkhua thin dan a nemnghet a ni, a ti bawk.

Mizoram State Bharat Scouts & Guides Chief Patron thar chuan kum 1932 atanga kalpui Lushai Scout Troop chuan Mizoram Scouts & Guides tan hmakhaw eng tak a siam thu sawiin, hlawhtlinna tam tak Mizoramin a hmuhte a tarlang a. Scouts & Guides movement chu uniform leh badge chauh ni lo, khua leh tui rintlak leh mawhphurhna la ngam siamtu a ni, a ti a. Khawvel changkang zelah mahni bil inngaihtuah leh tunlai khawl chhuak thar ber berte a inawmtlei tumna karah Scouts & Guides huan khawtlang nun hlutna, chhelna leh dam chhan min hriattir thin a ni, a ti a. Chief Patron a nihna zawnah Mizoram Scouts & Guides hmasawn nana theihtawp chhuah a tum thu sawiin, Mizoram District hrang hranga khua leh school-a thalaite’n he hmalakna hi an zawm vek theih nana tanlakpuiah kalkhawmte a sawm a. Nakin lawka ram leh hnam inghahna ni mai tur thalaite chu hruaitu tha leh danglamna thlen theitu ni tura buatsaih lawk a tul thu a sawi bawk.

He hunah hian Pu Lalngilneia Colney, State Secretary, Mizoram State Bharat Scouts & Guides chuan Bharat Scouts & Guides chanchin tlangpui a tarlang a. Pu Thankhuma, State Commissioner (AR) chuan lawmthu sawiin hun hman a khar a ni.

Vawiin hun hmanah hian Mizoram State Scouts & Guides Council member-te an tel a ni.