Minister Pu C. Lalsawivunga’n Champhaiah Horticulture department hnuaia Warehouse-cum-Collection Centre pahnih a hawng; project kal mek a tlawh bawk

#ZONEWS Champhai, July 23, 2025: Horticulture Minister Pu. C Lalsawivunga chuan vawiin zing dar 7:30 khan Horticulture Department hnuaia Warehouse-cum-Collection Centre, Manager Quarter leh Chowkidar Quarter, New Champhaia sak leh Hmunhmelthaa Warehouse-cum-Collection Centre a hawng a, Passionfruit Processing Unit, Cold Storage Complex, New Champhai a sak mek te, Tlangsam Turmeric Processsing Unit, Farmgate Agro Processing Pvt. Ltd. ten an enkawl mek te. leh Tlangsam a Champhai Winery a tlawh bawk a ni.

Minister Pu C. Lalsawivunga chuan heng project sak zawh tak te kuthnathawktute’n an tangkai pui ngei nan duhsakna a hlan a, department hotute tha taka thawhpuia tanpui turin a chah bawk a ni. Champhai Winery a tlawhnaah chuan thu sawiin kuthnathawktute tan sawrkar hi a ding zel a ni tih a sawi a, Mizoram tihmasawntu an ni thei tih sawiin rinawmna leh dikna vawng tlata hna thawk turin a fuih a ni. Project sak mek te chu Champhai Bawrhsap Pu Mohammad Aaquib nen enin hmalak zel dan tur te an sawi bawk. Minister chuan a hmun tlawhnaa hnathawh dan te enin, sawhthing khawl hmanga an sawngbawl dan te, solar drying an hman dan te, winery-a an thawh dan te leh an thiltih hrang hrang a enpui a ni.

Horticulture Complex-a project hi NABARD hnuaia sak niin September ni 25, 2024 khan sak tan a ni a, July ni 2, 2025 khan sak zawh a ni. He project atan hian cheng nuai 114.64 hman niin, he collection centre-ah hian 210 metric tonne leng tura ngaih a ni. Hmunhmelthaa Warehouse-cum-Collection Centre chu September ni 18, 2024 khan sak tan a ni a, May ni 16, 2025 khan sak zawh a ni. He project ah hian cheng nuai 50.2 hman a ni a, 210 metric tonne leng tura ngaih a ni bawk.