MIZO WRITERS ASSOCIATION TEN AN FOUNDATION DAY VANAPA HALLAH AN HMANG

#ZONEWS July 24, 2025: Pu R Lalrawna Padma Shri Awardee ,Mizo Writer Association Advisor ni bawk chuan nimin 23.7.2025 chawhnu dar 1 khan Mizo Writers Association (MWA) in Aizawl Vamapa Halla an pawl Foundation Day 2025 a buatsaih chu khuallian niin a hmanpui.

Mizo ziakmite chu Mizo history chabi kawltute an ni a. An kutchhuak thu leh hla in thil a tih theih zia te, Mizo khawtlang nun leh ram inrelbawl dan thlenga nghawng thui tak thlen theihtute an nih vangin an mawhphurhna hi a pawimawh hle a ni.

Mizo ziakmite chu thalaite kawng dik kawhhmuh a, ram siamdanglam tura thalaite kaihruaitu an ni bawk a ni.

Mizo ziakmite kutchhuak thu leh hla hlutna leh pawimawhna hrang hrang sawi tur a tam hle mai

Mizoram sorkar pawh hian zirlaite’n Mizo Literature tha awlsam zawka an hmuh theih a, College library Mizo Literature Section changtlung tak a awm chu a ngaihpawimawh zingah thil Pakhat a ni a, MIZO Ziakmite kut chhuak lehkhabu tam tak chu Mizoram State Library chuan kumtin a lei sak ziah thin a ni.

MWA Foundation Day 2025 lawmna inkhawm hi MWA President Pu R.Lallianzuala chuan a kaihruai a , Secretary Pu H. Ngurthansanga chuan report pe in, Ziakmite chanchin Bu 4-na chanchin report kimchang chu Jt Editor , Ziakmite chanchin Editorial Board chuan a pe a, khuallian Pu R.Lalrawna chuan chu lehkhabu chu a tlangzarh a ni.Chumi rualin ziakmi 10 hnen atangin an kutchhuak lehkhabu a tlangzarh bawk a ni.

MWA dintu mi paruk – Pu C. Rokuma, Pu Selet Thanga, Pu J.F. Laldailova, Pu James Dokhuma, Pu R.L. Rina leh Pu R. Lalrawna te chanchin presentation a pe a. Founder Member zinga Pu R. Lalrawna, MWA Adviser chauh hi a la dam chhun a ni tawh bawk.

Mizo Writers Association (MWA) hi July ni 23, 1977 ah din niin kum 48 a upa a ni tawh a. Din tirh atangin MWA chuan Mizo tawng tihhmasawn nen leh Mizo thu leh hla tihhmasawn nan kawng hrang hrangin hma a la thin a. An hmalakna zingah Lehkhabu lehlin tha ber Lawmman hlan te, Mizo Proficiency Prize siam te, Thu leh Hla Kutpui buatsaih leh Lehkhabu Pho Runpui (LPR) /bookfest neih te a tel a ni.

Mizo Writer Association pawlah hian Mizo tupawh lehkhabu pakhat tal khawrpum tawh chuan membership fee leh annual fee pein member a nih theih a ni.kum tinin MWA hian MIZO Proficiency Award a sem ziah a,kumtin a lawmman dawngtu leh a prize hming putu chanchin chu kan rawn tarlang leh dawn nia.

kumin hian R Buchhawna Proficiency Award dawngtu chu Nl.Lallawmi ,PUC a ni a,Mizoram University a BA Mizo subject-ah hian kumin 2025 a mark hmu sang ber a ni.