“RILRU HELNA HIAN PATHIAN AṬANGA BEISEINA LEH PUIHNA LO THLENG TUR CHU A HLIAH ṬHIN”

#ZONEWS #FIANRIAL July 25, 2025:
Vawiinah chuan Lal Hosea hnuaia Israelte tlukchhiatna runthlak tak mai chu kan ngaihtuahho dawn a ni. Anmahni laka roreltu Assuria chu phatsanin Aigupta puihna a zawng a, Israel chu run a ni a, Israel mipuite chu sala man an ni. Nasa taka an tuar chung pawh chuan Pathian ṭanpuina an zawng chuang lova, Pathian laka an hel zui zelna chuan pawi nasa zawk a thlen ta a ni.

ISRAEL-TE SUALNA LEH HREMNA
LALPA chuan, “Dan zawm tûr, in pi leh pute ka pêk leh ka chhiahlawh zâwlneite hmanga ka hriattir che u ang zel chuan, in awm dan sual hi hawisan ula, ka thupêkte leh ka thu ruatte chu pawm rawh u,” tiin Israelte leh Judate chu zâwlnei tin, leh hmutheitu tin hmangin a hriattir thin a. 2 Lalte 17:13

Zilhna thu i ngaihthah a, thutlukna dik lo I siam hnuah a lo tlai tawh si, a sawhkhawk I tawrh leh I hmachhawn a awm ve tawh ṭhin em?

Lal Hosea hnuaia Israel-te tluk chhiatna hian, Pathian ngaihsak duh lova, Pathian laka hel reng mai man chu chiang takin min hriat nawn tir a ni. Zawlneiten vawi tam tak hrilhin vaukhan lawk ṭhin mahsela, sual kawng chu Israel-te chuan an zawh lui tlat a, milem betu hnamte chu thurualpuiin, milem biakna kawngah chuan an kal lui tlat bawk a ni.

Engvanga zilhnate chu ngaihsak lova, kan kawng zawhlai chu tha zawka ringa zawh lui tlat ṭhin nge kan nih le?

Assuria thuneihna lak atanga tal chhuah tum, Lal Hosea beidawng chuan Aigupta puihna zawngin a ngen ta a. Chu phatsanna chu rangtakin hriat chhuah a ni a, Assuria chuan khawngaihna nei hauh lovin rang takin an chhang let ta a. Israel ram chu runin, mipuite chu salah an hruai a, Lal Hosea ngei pawh chu lunginah khung a ni ta. Hnam chapo tak ṭhin kha sal niin, hmun hrang hrangah an vak darh a, tawrhna nasa tak an chungah a lo thleng ta a ni.

Pathian hruaina che I ngaihsak duh loh avanga nangma nun ngei pawh ṭul miah lova harsatna leh tawrhna hmunah I hruai luh chang a awm ve ṭhin em, eng kawngahte nge ni ṭhin le?

Sal an tanna hmunah pawh Israel-te chuan Pathian lam an hawi duh chuang miah lo mai a, hei hian thlarau lama an mit a del nasat tawh zia a lantir a ni. He Israel-te chanchin lungchhiatthlak tak hian, Pathian thu leh A zilhna ngaihsak leh A thupekte rinawm taka zui a pawimawhzia chiang takin min hrilh a ni.

Pathian hnena kir tura Pathian min kohna hre duh lova mahni kawnga kal luih tlat mai hi a awl em em mai a. Chuti chung chung pawh chuan, kan Pathian hian A hnena kan kir leh a, A puihna kan zawn hun hi A lo nghak reng ṭhin a ni. Kan hun thim berah pawh nisela, A kohna ngaithlaa kan lo chhawn a nih phawt chuan, min chhandama engkim min siam that sak leh turin A inring reng a ni.

NGUN TAKIN NGAIHTUAH ILA!
Kan nunah hian Pathian min kaihhruaihna tur kan dal tlata kan ngaihsak duh loh ve ṭhinnate uluk takin ngaihtuah ila. Thutlukna emaw, kan thiltihdan emaw Pathian duhdana her rem ngai te a awm em?

Pathian zilhna chu kan hriatthiama huaisen taka A duhzawng leh A thupekte chu kan zui tlat theihna turin finna leh hriatthiamna dilin I tawngtai ṭhin ang u. Thuawihtu thinlung chu nei turin zawng lui tlat ila, Pathian kawngte chu kan tan pawh kawng tha a ni tih hi pawmin I ring tlat ang u.

ṬAWNGṬAINA
“LALPA in Pathian erawh chu in ṭih tûr a ni; tichuan in hmêlma zawng zawngte kut ata chu a chhan chuak ang che u,” tia thu a thlun a, an tana LALPA thupêk te, thuruat te, rorêl te, dan siamte chu an zawm hek lo. – 2 Lalte 17:39

Aw LALPA, zalen taka nung tura min siam avang ngawt hian Nangma duh loh zawng thil leh tihdan hrang hrang, ka nun a tha lo zawnga hruaia tinaa tichhe thei lamah chuan hlan ka duh love. Lal Hosea hnuaia Israel-te ang maia ka sualnaah chuan cham reng ka duh love. Nawmsakna leh hmuingilna thutiam dik lote avanga rinawm lohnaa kual kual mai hi Lalpa ka duh love. Ka lo tlu a nih pawhin, min siam thar leh a, chawlhna hmuna min hruai tur chuan I hming chauh hi lama koh che ka duh e. Eng ang dinhmunah pawh ding ila Nang chu ka lak atangin I hla ngai si lova. Nang chu I dikin I famkima, chuti chung chuan ka diklohnate theihnghilh leh min ngaidam turin I inpeih reng si a. Ka chaklohna leh tihsualte avanga min dotu karah pawh, Nang chuan min dinpuia huaisenna min petu tur mite chu I rawn tir ṭhin a, Lalpa ka lawm e. Ka dam chhung zawnga nangmah fak leh chawimawina thute chauh hi puan chhuah ka duh e. Isua hmingin ka dil e, Amen!