Lunglei West bialtu MLA Pu T. Lalhlimpuia’n Govt J. Buana College Freshers’ Social 2025 a hmanpui

#ZONEWS Lunglei July 25, 2025 Zirtawpni: Vawiin khan Lunglei West bialtu MLA Pu T. Lalhlimpuia chuan Government J. Buana College (GJBC)-in zirlai tharte lawmna hun, ‘Freshers’ Social 2025′ an buatsaih chu khuallian niin a hmanpui.

Govt J. Buana College Multipurpose Hall-a Freshers’ Social hun hmanah hian Khuallian Pu T. Lalhlimpuia chuan zirlai college dai tharte chu an thil tih reng rengah mellung an phun tih hria a, a ṭha zawng leh hmasawn zawnga hun hmang zel tura chahin, college tihming ṭhatu leh timawitu ni tura an rilru siam a, chumi tihlawhtling tur chuan bul ṭan turin a fuih a. Tun lai thiamna leh changkanna chu zirlaite tan remchang ṭha tak siamtu a nih thu sawiin, an zirna, ei zawnna leh hma hun atana ṭangkai leh ṭha zirna atan an phone leh internet hmang ṭhin turin a chah a. Zirtirtute pawh an thawh rimna chu zirlaite tana malsawmna a ni tih leh zirlaite nuna nasa taka thu sawitu an nih inhre reng a, ngaih hlut tlak zirtirtu nih zel tum turin a chah bawk.

Khuallian Pu T. Lalhlimpuia chuan Mizoram hmasawnna turin mipui nawlpui ngaih hlut zawng leh thil thlir dan siam ṭhat a ngai tih sawiin, sawrkar hna thawk zinga mahni hna tibahlah zawnga khawtlang leh kohhran mawhphurhna danga peng ṭhinte aia mahni hna rinawm taka thawkte ngaihsan a, zirlai zingah pawh incheina leh khawsakphunga tun lai takte aia mahni zir lai thiamte ngaihsan a ṭul tawh, a ti a. Mizoram tan zirna chu nun khaw chhuahna tura innghahna (lifeline) a la nih reng thu sawiin, Mizorama zirna leh mipui rilru sukthlek chu India ram pum el phak tura siam rem a ṭul tak zet tih a sawi.

Khuallian Pu T. Lalhlimpuia hian Magazine Editorial Board-in an buatsaih GJBC 24th Annual Magazine 2024–25, “Leitlang Dingdi” tih chu a tlangzarh nghal a. Sawrkarin Higher & Technical Education Department kal tlangin GJBC building pui ber (main building) chei ṭhatna tur cheng vaibelchhe 3.3 leh GBJC hmun Meltea Sports Centre sakna atan cheng vaibelchhe 2.8 a ruahman tih puangin, hma lak ṭan thuai tum a nih thu a sawi a. GJBC Principal kutah college-a hman tur infiamna hmanrua a hlan bawk.

Govt J. Buana College Freshers’ Social hi Students’ Union (SU) Vice President Lalremruatpuia Aineh chuan a kaihruai a. Evangelical Union (EU) Chairman Philip Lalrinzuala’n hunserh hmangin, Principal Pi Lalthangmawii Chhangte chuan inlawmna thu leh zirlaite fuihna thu a sawi a. Zirlai tharte chu college-in zir tur ṭha tam tak a chhawp chhuah aṭanga inzir belh tur leh theihnghilh leh kalsan ngai an neihte kalsan ngam tura chahin, college kal chhuak ringawt lo va, zir chhuak ngei turin a fuih.

SU Games & Sports Secretary Jacob B. Malsawmtluanga kaihhruaiin college zirlai thar (I Semester zirlai 125 vel) te’n college an kal chhunga an zawm tur thu an tiam a. Magazine Editor (2024–25) Malsawmtluanga Khiangte chuan annual magazine chungchang report pein, EU Choir leh Music Club te zai ngaihthlak a ni a. SU General Secretary R. Vanlalhruaitluanga’n lawm thu sawiin hun a khar.

GJBC Freshers’ Social-ah hian Principal hlui, Prof. J. Zorema Proficiency Award 2025 sem niin, award-in a ken tel trophy leh pawisa fai chu MZU Under Graduate Examination 2025-a ti ṭha zual zinga lang phak (rank holder) – Vanlalpekhlua, 6th rank (Public Administration) hnenah hlan a ni.

Govt J. Buana College hi kum 1983 khan din niin, kum 2007 October thla khan sawrkar college-ah hlan kai a ni a. Mizoram University hnuaiah inziak lutin, UGC hnuaiah 2f leh 12b category-ah a awm mek a. National Assessment and Accreditation Council (NAAC) hnuaiah B grade pek a ni bawk.

Govt J. Buana College-ah hian department pakua awmin, English, Mizo, History, Geography, Economics, Education, Political Science, Public Administration leh Commerce-ah te core subject zir theih a ni a. Kumin 2025–2026 hian zirlai 370 vel an nei a ni.