Mamit Bialtu MLA-in Sampoornata Abhiyan Award semna leh Aakanksha Haat hawnna hun hmang

#ZONEWS Mamit July 28, 2025: Vawiin khan Er H. Lalzirliana, Mamit Bialtu MLA chuan Siamliana Hall, Mamit-ah Sampoornata Abhiyan Award semna hun a hmang a, kar khat chhung awh tur Aakanksha Haat, tuachhung siam thil hrang hrang phochhuahna a hawng nghal bawk.

Mamit Bialtu MLA chuan vawiin hun pawimawh hmang tura lo kal te hnenah chibai bukna hlanin Mamit hmasawnna atan ni kawng pawimawh tak a nih thu a sawi a. Sawrkar Laipui chuan Vision 2047 chu nasa taka kalpui mekin kum 2047-ah chuan India ram hi developed country a nih theih nan tan a la mek a, kan ram pawhin ram changkang te kan umpha mek zel a, hemi hmasawnna atana hmalam kan panna pawimawh tak pakhat chu Sampoornata program hi a ni a, Mamit district pawh Aspirational district ni mahse zirna lamah te, hriselna leh in enkawlna lamah te leh kawng hrang hrangah hma kan sawn zel a, entawntlak kan nih zel thu Pu H Lalzirliana chuan a sawi a. Ram changkang apiangin zirlai naupang te chawikan hi a tum thin a, Mamit district pawhin hma lam a pan zel a, hemi kawng a hnathawk tha kan frontline workers te vawiin a chawimawina hun neih a ni hi lawmawm a tih thu a sawi bawk.

Sampoornata Abhiyan hi July 2024 atanga September 2024 thleng India ram a Aspirational district leh Aspirational block-ah te hman a ni a, Mamit District leh Reiek Block-ah kalpui a ni. Tehfung paruk –

1. Health & Nutrition (hnuaiah 3)
2. Agriculture (hnuaiah 1)
3. Education (hnuaiah 2)

hnuaiah kalpui niin hemi program chhung hian line department te’n an ruahman an kalpui kim thei em tih endik a ni. Mamit district leh Reiek Block chuan Bronze lain hmun 4-ah 100% an tum a ti hlawhtling a ni.

Mamit Bialtu MLA hian kar khat chhung awh tur “Aakanksha Haat”, tualchhung thil siam hrang hrang phochhuahna a hawng nghal bawk. Aakanksha Haat-ah hian thil siam bakah free medical check up, SBI leh Aadhar services te a thlawn a rawn theih an ni nghal dawn bawk a, Siamliana Hall, Charkawn, Mamit-ah tunkar 28thJuly- 1st August chhung pan theih a ni dawn.

Vawiin hun hi Pi Carolyn LB Khiangte, Addl DC chuan kaihruaiin Pi Lalramlari, SDC Mamit chuan report tawi pein award semna hun a hmang a, frontline worker mi 29 hnenah certificate semna hun hman a ni bawk. Pu Lalnunfela Chawngthu, SDO(Sadar) chuan lawmthu sawina hun hmangin hun a khar a ni.