MHIP General Headquarters chuan tun thla ni 27-a rawng taka a pasal thattu, Pi Lalremruati chu a phu tawk hremna hmu ngei se an duh tih an sawi.

#ZONEWS July 29, 2025: Vawiina thuchhuah an siamah, MHIP General Headquarters chuan tualthahna thleng chu pawi an ti tak zet tih sawiin, Pi Lalremruati’n a pasal Pu Lalchhuanawma (kum 39) rawng taka a that chu an demin, dan hnuaiah a phu tawk hremna hmu ngei se an duh tih an sawi a. MHIP chuan an Hmeichhiatpuite tana theihtawp an chhuah laia hetiang pawikhawihna Mizo hmeichhiaten an ti ta mai chu hriatthiam harsa an tiin, a pawi an ti takzet an ti a. Tun chinah tuma chungah thleng tawh lo se an duh tih an sawi a ni.

Nimina Kulikawn Police Station Officer Incharge in a sawi danin, July ni 27, Pathianni-a Mission Vengthlang thualthahna thlengah tualthattu a inpuang tawh a, man a ni tawh bawk a, nimin, Thawhtanni khan Court-ah Judicial Custody a dah turin hruai a ni a, he thil thleng hi chhui zui zel a ni a, tun dinhmunah he tualthahnaa inhnamhnawih midang tumah an awm hriat a ni lo a ni.