Lungleiah National Deworming Day 2025 August Round kalpui dan tur sawi ho a ni

#ZONEWS Lunglei July 30, 2025: Vawiin chawhnu khan Lunglei District Level Co-ordination Committee for National Deworming Day chu Lunglei District Additional Deputy Commissioner Pi Rochuangkimi Khenglawt hovin Lunglei DC Conference Hall-ah an ṭhu khawm a. National Deworming Day (NDD) August Round 2025 kalpui dan tur an sawi ho.

Addl DC Pi Rochuangkimi Khenglawt chuan kumin February thlaa Lunglei District-a rulhut hlo pek beihpui thlak (National Deworming Day) kalpuiah target 98% laiin rulhut hlo an ei chu lawmawm a tih thu sawiin, tun August round lo awm turah hian naupang tam zawkin an ei theih nan thawktute chu theih tawp chhuah turin a chah.

National Deworming Day hi kum tin vawi hnih, February thla leh August thlaah te hman ṭhin niin, kumin NDD August Round hi August ni 11 aṭanga hman ṭan tura ruahman a ni a. Naupang kum 1 aṭanga kum 19 inkarte chu rulhut hlo (Tab. Albendazole) eitir vek tura tih a ni a. Naupang kum 2 hnuai lamte chu mum chanvea eitir ṭhin niin, kum 2 chung lamte chu mum khat pek ṭhin an ni a. Rulhut hlo hi zirna in leh anganwadi centre-ah te pek leh tura ruahman niin, chumia hmaihte chu an ina kal chilha pek leh turin ruahman a ni.

NDD 2025 August round bul ṭanna leh hawnna hun hi August ni 11, 2025 (Thawhṭanni) chawhma dar 10:30-ah Govt High School, Lungleiah hman tum a ni a. Hemi ni hian Lunglei District leh Hnahthial District chhunga school, college leh anganwadi centre-ah te rulhut hlo inpek a nih dawn bakah, sikul kal lote chu ASHA-te’n an inah kal chilhin an pe ang a. Target zinga tel si, hemi nia pek hman lohte tan mop up day August ni 18-ah buatsaih a ni leh bawk ang.

NDD February 2025 round-ah khan Lunglei leh Hnahthial District chhunga target mi 56,270 aṭangin mi 55,149 (98%) chu rulhut hlo pek an ni a. Kumin NDD August round-a rulhut hlo pek tur atan hian Lunglei leh Hnahthial District chhungah kum 1 leh kum 19 inkar target 56,358 an awm.