HOME MINISTER HOVIN SAINIK WELFARE & RESETTLEMENT DINHMUN BIHCHIANNA AN NEI

#ZONEWS Aizawl July 31, 2025: Nimin khan Sainik Welfare & Resettlement dinhmun bihchianna review meeting chu Directorate of Sainik Welfare & Resettlement-ah neih a ni a. He hun hi Home Minister Pu K. Sapdanga chuan khuallian niin a hmanpui a, Home Secretary Pu Vanlalmawia chuan a kaihruai a ni.

Home Minister chuan thutkhawm hi Home Department hnuaia peng hrang hrangte a tlawhkual tawpna a nih thu sawiin, lawmna leh harsatnate inhrilhtawna thawhhona tha tak neih a pawimawh thu a sawi a. Sainik Welfare & Resettlement chu ex-servicemen-te enkawltu an nih angin anamahni chhawmdawl leh hamthatna an dawnna kawngah theihtawp a chhuahpui zel tur thu a sawi a. Ex-servicemen-te hi mi in vawng, mi taima leh training tha tak lo nei tawhte an nih avangin ram venhim bakah khawtlang tan mi tangkai leh chhawrtlak an nih thu sawiin, sawrkarah pawh lut se rinawm tak leh tha taka hna thawktu an nih tur thu a sawi a. Home Department hnuaia hna lak a awm leh hunah pawh ex-servicemen a tam thei ang ber an luh theih nan an inbuatsaih thu a tarlang bawk a ni.

Home Secretary Pu Vanlalmawia chuan ex-servicemen-te chu sipai atanga an ban hnu pawha eizawnna mumal (gainful employment) an neih chhunzawm chu anmahni tan mai bakah ram hmasawnna atan a pawimawh hle tih a sawi a. Dr. Andrew H. Vanlaldika, Addl Secretary, Home Department chuan lawmthu sawiin hun a khar a ni.

Tun dinhmunah Mizoramah hian registered ex-servicemen 6,355 leh registered widows 2,550 an awm a. Sainik Welfare & Resttlement chuan Aizawl, Lunglei, Champhai leh Kolasib-ahte district office an nei a, office atan mimal in luahna district-ahte office sak dan tur ngaihtuah ho a ni a. Integrated Sainik Rest House/Complex sak tharna tur leh War Memorial thar din tura hmalak mek a ni a. State sawrkar hmalaknain ex-servicemen leh an chhungte’n (dependent) a thlawna computer an zir theihna tur Sainik Computer Training Centre chu 2003 atang khan hawn niin, hemi centre atang hian mi 389 in an zirchhuak tawh a ni.  Ex-servicemen-te hian Group B (non-gazette) chin post hrang hrangah reservation an nei a. Sawrkarin ex-servicemen-te tan hmathatna hrang hrang a siamte chu dawng an awm nual rualin, documents neih kim loh avanga dawng thei lo an awm thin thu tarlan a ni.

DISBURSEMENT DETAILS UNDER PROGRAMMES / SCHEMES / MEASURES FOR WELFARE OF EX-SERVICEMEN FY 2023-24 till date –

RAKSHA MANTRI EX-SERVICEMEN WELFARE FUND

NUMBER OF GALLANTRY / DISTINGUISHED AWARDEES FROM MIZORAM