Mizoram Assembly Speaker-in “Mizo Pa Ropui Pu H. Vanlalfaka Chanchin” – Dr. C. Lalhmanmawia Lehkhabu ziah chu a tlangzarh

#ZONEWS Aizawl July 25, 2025 : Vawiin khan Mizoram Legislative Assembly Speaker Pu Lalbiakzama‘n Govt. Aizawl North College Conference Hall-ah ‘Mizo Pa Ropui Pu H. Vanlalfaka Chanchin” tih lehkhabu, Dr. C. Lalhmanmawia ziah chu a tlangzarh.

Tlangzarhna inkhawmah khuallian Pu Lalbiakzama chuan thu sawiin, he lehkhabu hian Chalfilh bialtu a nih angin ama tan tak pawh hian hlut bikna riau a nei tih sawiin, Pu H Vanlafaka hi Chalfilh bial chhunga awm Khawlek khua a ni a. A ziaktu hi a bial chhung tho Hmunnghak khawchhuak a ni bawk chu lawmawm a tih thu a sawi a. Chanchin lehkhabu a ziah tham mi ropui Khawlek tui-al-liak zingah an lo awm reng mai chu chhuanawm a tih thu sawiin, mimal chanchin ziah tlak leh ziah tham hi zofate zingah kan la tam lo hle a, chutiang kara a chanchin lehkhabu a chhuah a ni ta chu Khawlek khua leh Pu Faka chhungte lawmpuina a hlan a. Pu Faka aţang hian Mizo nun mawi tlawmngaihna chungchang zir tur a tam a, Mizo pa ropui Pu H Vanlakfaka chanchin hi Khawlek khua, Chalfilh bial leh Zofa zawng zawngte tan malsawmna ni turin duhsakna a hlan a ni.

Khawlek khuaah theih tawkah development pawh an dahlut ve tih sawiin, library an sak zawh tawh thu leh Mizorama a hmasa ber turin Ginger Processing Unit dah a nih thu a sawi a. NABARD hnuaia Agriculture link road PCC hna thawh mek thu leh, Upa te inawmtleina In tur “Old age Recreation Centre” sak mai theih tura peih a nih thu sawiin, Chalfilh Bial chu, a hmar tawp ber khua atangin kan ti eng chho dawn a ni, a ti.

Khuallian chuan RSK Road kum 30 zet hluihlawn tawh Ratu-Suangpuilawn-Khawlian thlunzawmtu kawng, chu zawh theih turin buatsaih mek a ni a ti a. He kawng chhawr ber tur pakhat chu Khawlek khua hi an ni a. He kawng zawh hian, Khawlek-Ratu-Vervek-Sakawrdai-Mauchar-Bagha ah hnai te in chak lakna kawng a inhawng leh dawn a. Hmar lam khua chuan Aizawl dawr lovin, a aia hnai zawk leh thil tlawm zawkna Silchar awlsamte in an dawr thei dawn a ni. He kawng hi Mizo hnam min phuarkhawmtu a ni dawn a ni, a ti.

Lehkhabu tlangzarh inkhawm hi Jerry Lalmuansanga, Asst. Professor, GANC chuan kaihruaiin, K. Vanlalawia, Associate Professor, GANC-i’n lehkhabu thlirzauna hun a hmang a. A ziaktu, Dr. C. Lalhmanmawia’n chuan lawmthu sawiin hun hi a khar a ni.