Mizoram Pradesh Congress Committee (MPCC) chuan Mizoram hmun thenkhata zikhlum chingtu loneitute manganna chinfel sak turin sorkar an phut.

#ZONEWS July 31, 2025: MPCC Legal Department, PAC/Chairman Pu TT Zothansanga’n vawiin khan Aizawl Press Club-a thutharthehdarhtute kawmin, Loneituten an thawhrim rah a taka an seng theih nan sorkarin Loneitute leh zikhlum zuartute te be rawnin Vairengte leh hmun hrang hrang atanga zikhlum lo lut tur khapna dan chhuah thuai turin a phut tih a sawi a.

Pu TT Zothansanga chuan Samthang khuaa zikhlum chingtuten a hralhna tur an hriat loh avanga July ni 25-a Aizawl khawpui veng hrang hrangah YMA ten an zawrhpui a, veng chhung mipuite lei tura an ngen chu pawi a tih thu a sawi a. Kum 2022 Assembly inthlan dawn a ZPM Kalphung thar Manifesto ah thlaichin uar tur thlan bik zingah Zikhlum a tel tih sawiin, an sorkar hnuah an ngaihsak lo a ni a ti.

Pu TT Zothansanga sawi danin, Samthang ah In 145 in an ching a, Khankawnah In 111. East Tuipui bial khaw hrang hrangah In 400 chuangin Zikhlum chu innghah nan an hmang a, an vaiin Zikhlum Qtls 10000 chuang zet tharchhuah an inbeisei a, hralh theih loh tawih chhia chu Qtls 1300 zet a awm a, hralh tur an la ngah hle a, sorkar a chet vat a ngai a ni a ti a ni.