Akashvani Aizawl din kum 60-na pualin vawiin khan a thawktuten Tuikhuahtlanga Akashvani Aizawl pisa ah lawmna hun an hmang.

#ZONEWS July 31, 2025: Vawiina Akashvani Aizawl din kum 60 puala hun hman hi Akashvani leh Doordarshan Additional Director General (Northeast Zone) Pu Ashish Bhatnagar an khuallian niin a hmanpui a, Akashvani Aizawl in a din kum 60 na a thleng chu a lawmpui thu sawiin Radio chu mipuite beng ti tlai ber tu pakhat leh a hunlai a thil thleng chanchin reng reng a nemnghehna tehna dik lo thei lova ngaih a nih thu a sawi.

Pu Ashish Bhatnagar chuan All India Radio Station atanga rimawi leh hun buatsaih hrang hrang tihchhuah thin chuan hlut a hlawh hle thin a ti a, All India Radio Aizawl chu hmarchhak state-a station dang zingah pawh hmasawn ber pawl a nih thu sawiin, hmanraw tunlai ber ber hmanga hnathawh thin a nih thu a sawi bakah mipuite chhawr tangkai theih tura Radio hmanga programme chhawp chhuahte chu Mizoram khawpui Aizawl hriat rualin hmun kilkhawr atang pawha an lo hriat theih phah thin thu leh sorkar laipui atanga hmalakna pawh radio kaltlangin kuthnathawktu tam takin an chhawrin an hmang tangkai thin tih a sawi.

Akashvani Aizawl Director leh Mizoram Cluster Head Pu DR Lalropuia pawhin thusawiin All India Radio Aizawl chu rambuai kum, kum 1966 a din a nih thu leh khatih hunlai a curfew kar a Zoram mipuiten a thlawn a sorkar thuchhuak leh chanchin thar an hriatna atana thil tangkai tak leh mipui khawhar in awm tleina a nih thin thu a sawi a, Radio chuan hmasawn zelin tunlai thiamna kawnga hmasawnna tam tak karah pawh chanchinthar leh Radio programme hrang hrang chu ngaihhlut a hlawh reng thin a ti a, tunlai khawvel changkang zelah Akashvani Aizawl leh Akashvani Lunglei in Live programme social media kaltlangin an phochhuak tawh tih a sawi bawk.

Vawiina hun hmanah hian Asst Director (News) Pu Gin Gangte leh Asst Director (Prog) Pu Biakchungnunga bakah Doordarshan Director Pu Nampibou Marinmai ten thu an sawi a, tunhnaia Emmy Award dawng Akashvani Aizawl News Editor pahnih HC Vanlalruata leh Isaac Zoramsanga te chu ADG Pu Ashish Bhatnagar an lawmpuina a hlan a, Akashvani Aizawl hlawhtlinna hrang hrang ngaihthlak niin zai leh lam hrang hrang nen hun hlimawm tak hman a ni.

Tun dinhmunah Akashvani Aizawl ah hian thawktu mi 170 an awm mek a, a ngheta thawk mi 50 leh a nghetlo a thawk mi 120 an awm mek a ni.