DM&R MINISTER-IN ROTARY CLUB HRUAITU THARTE LAWMLUHNA HUN A HMANPUI

#ZONEWS Aizawl August 01, 2025: Nimin khan Rotary Club Aizawl, Rotary International District – 3240 hruaitu tharte thutiam laktirna leh member thar lawmluhna hun ‘33rd Installation of Office Bearers of Rotary Club of Aizawl’ chu RB McCabe Hall, Aijal Club-ah neih a ni a. Prof. Lalnilawma, DM&R Minister chuan hun a hmanpui.

Minister Prof. Lalnilawma chuan midangte rawngbawlsak hna chu hna ropui berte zinga mi a nih thu sawiin miharsate tana Rotary Club-te an luang chhuak thin chu fakawm a tih thu a sawi a. Khawvel tihrehawmtu harsatna hrang hrangte sukiang tura Rotary Club te hnathawh chu fakawm a tih thu sawiin khawvel nuam leh tha zawk siam tura thawk zel turin a fuih a ni.     

Rotary Club hruaitute hi kumtin thlan thar thin niin, kum 2025-2026 Rotary year chhung atana President chu Pu Anup Chhetry niin Pi Zoe Lalrinpuii John chu Vice President a ni a; Post District Governor, Rotarian Prabhat Kedia-an hruaitu tharte rinawmna thu tiamtirna a neih hnuin member thar 6 lawmluh nghal an ni.

Rotary Club hi khawvel pum huap inzawmkhawm pawl niin khawtlang thatna, hriselna, nun dan tha inzirtirnate leh khawvela remna leh muanna a awm theih nantea thawktu pawl pawimawh tak an ni a, an motto pawh, ‘Service Above Self’ tih niin Mizoramah chuan kum 1992 khan din tan a ni a; khawtlangin harsatna a tawh laite, hripui len lai leh khuarel chhiatna thleng thinahte kawng hrang hrangin, tanpui ngaite tanpui leh chhawmdawl hna an thawk thin a ni.  Vawiin hun hmannaah hian Aizawl Rotary Club-te chuan Spastic Society-te hnenah Nuai 1.5 an hlan nghal a ni.