Lungleiah sawrkar leh department hotute leh pawl hruaitute tan Bana Kaih Scheme zir hona buatsaih a ni

#ZONEWS Lunglei August 05, 2025: Vawiin khan Mizoram State Policy Coordination Committee (MSPCC) huaihawtin Lungleia HPC Conference Hall-ah Mizoram Sawrkar flagship scheme, Mizoram Bana Kaih (Handholding) Scheme chungchang zir hona leh sawi hona, ‘Sensitisation Programme for District Leadership’ buatsaih a ni a. MLA-te leh MSPCC member-te bakah, Lunglei High Powered Committee (HPC) member-te, Lunglei Municipal Council (LMC) hotute, District Monitoring Committee (Bana Kaih) member-te, bank ai awhte, zirtirtute, NGO, kohhran, political party leh MJA hruaitute an tel.

District Leadership Sensitisation Programme hi MSPCC Vice Chairman, Adviser to Chief Minister (Implementation of Handholding Policy) Dr KC Lalmalsawmzauva’n a kaihruai a. Lunglei HPC Vice Chairman, Lunglei North bialtu MLA Pu V. Malsawmtluanga’n inlawmna thu sawiin, District Bawrhsap Pi Navneet Mann chuan Lunglei District-a Bana Kaih Scheme kalpui dan report a pe a. Lunglei West bialtu MLA Pu T. Lalhlimpuia leh LMC Chairman Pu Lalzuithanga te’n thu an sawi bawk.

MSPCC Member Pi Laldikkimi chuan Bana Kaih Scheme hnuaia hma lakna report pein, kut hna thawktute hnenah thlai thar man dona (support price) pek a nih thu leh Phase 1-ah Mizoram pumah CM Special Package dawng tur mi 2,257 leh loan pek tur mi 646 thlan chhuah an nih thu a sawi a. MSPCC Member & ZIDCO Managing Director Pu LP Lalchangkima chuan Bana Kaih hnuaia loan kalpui dan a sawi fiah a. Zawhna leh chhanna leh sawi hona hun hman chhunzawm niin, MSPCC Member Pu Zohmingthanga’n lawm thu sawiin hun a khar.

MSPCC Vice Chairman Dr KC Lalmalsawmzauva chuan Mizoram Bana Kaih (Handholding) Scheme pilot phase chu September ni 19, 2024-ah Vanapa Hall, Aizawlah tlangzarh a nih thu sawiin, pilot phase (phase 1)-ah partner bank pathum – State Bank of India (SBI), Mizoram Rural Bank (MRB) leh Mizoram Cooperative Apex Bank (MCAB) kal tlangin loan eng emaw zat leh CM Special Package eng emaw zat pek chhuah a ni chu lawmawm a tih thu a sawi a. Sawrkarin sawhthing quintal 3,47,387.40 a lei tawh thu leh pawisa senso tur chin fel chhoh mek a nih thu sawiin, cheng vaibelchhe 142 chuang fe a nih dawn thu leh la pung zel tura ngaih a nih thu te, sawhthing man ba pawh August 2025 chhunga pek fel tum a nih thu te a sawi a. August 2025 chhungin Bana Kaih thawh hnihna (Phase 2) dilna hun hawn leh tuma inbuatsaih mek a nih thu leh portal tihchangtlun mek a nih thu a sawi bawk.

MSPCC Vice Chairman chuan Bana Kaiha thil pawimawh zual pahnih chu – thlai thar lei leh sumdawnna bul ṭan turte bana kaih (entrepreneurship handholding) a nih thu sawiin, thingtlang lam leh khawpui lam chawi kang thei tur ruahmanna a nih thu a sawi a. Thlai thar lei chu thingtlang kut hna thawkte ban phak leh lei rem an rah theihna tur tin zawna ruahman a nih thu leh khawpuia cheng ṭhalai lehkha thiam, sawrkar hna thawk lote, sumdawng leh entrepreneur-te tin zawnin awlsam zawka bank loan an lak theihna tur ruahman a nih thu sawiin, sawrkar chuan guarantor-a a ṭansak bakah, a pung zawng zawng a rulhpui dawn bawk tih a sawi a. Bana Kaih bank loan chu sekibuhchhuak a nih loh thu leh, chem leh tuthlawh ngai, tha sen ngai, taima leh ti tak takte tana duan a nih thu a sawi a. Partner bank-te chu handholding loan/CM package leh thlai thar leina an kuta lutte a rang lama kut hna thawktute hnena pe chhuak zel tura ngenin, kal khawmte chu Bana Kaih scheme hlawhtlin nana thlawp tur leh fin chhuah tur te, mahni huam tel ‘danglamna (change)’ siampui tur te’n a sawm a ni.

He hunah hian Bana Kaih scheme hnuaia loan chu bank loan a nih angin rulh leh ngei ngei ngai a nih thu leh loan rul ṭha lo chu sawrkarin a pung (interest) a rulhpui theih dawn loh thu tar lan a ni a. Loan hi sawrkar scheme awm sa – PMEGP, MUDRA, KCC, NLM, Stand Up India leh BRS aṭang tea pek tur a nih avangin scheme inkaihhruaina zawm a ṭul thu tar lan a ni a. Loan latute’n loan chu a rulh dan tur dik takin, a pung nen ṭha taka an rulh a ngaih thu leh a pung an rulhna ai chu thla 6 danah sawrkarin progress partner-te account-ah a pe let (reimburse) ṭhin dawn tih tar lan a ni bawk.

Mizoram Bana Kaih (Handholding) Scheme hnuaiah hian Lunglei District chhungah department 12 kal tlangin loan dil, progress partner atana thlan mi 48 awmin, department 8 hnuaiah CM Special Package dawng tura thlan mi 362 an awm bawk a. Bank kal tlangin loan leh CM special package hi pek chhuah mek a ni a. Progress partner-te hma lak dan hi department chuan vil zuiin, an hlawhtlin ngei theih nan ṭanpuina, training leh kaihhruaina te nen an thawhpui zel dawn a ni.