Larsap hovin Nikshay Mitra chawimawina leh Food Basket an sem chhuak.

#ZONEWS Aizawl August 05, 2025: Vawiin khan Mizoram Larsap, General (Dr) Vijay Kumar Singh, PVSM, AVSM, YSM (Retd) hovin Raj Bhavan-ah Pradhan Mantri TB Mukt Bharat Abhiyaan programme hman a ni a. He hunah hian Food Basket Support hnuaia TB veite tana eitur hrisel leh tha thawhtu, Nikshay Mitra-thawh hlawkte chawimawina hun hman a nih bakah, Food Basket Support kaltlang hian TB veite hnenah eitur tha sem chhuah a ni a. He hun hi Health & Family Welfare Minister Pi Lalrinpuii chuan a telpui bawk.

Larsap General (Dr) Vijay Kumar Singh chuan India-in kum 2025 chhung ngeia TB awm lohna ram nih a tum thu leh heihi khawvel pum target 2030 aia kum 5 laia hma a nih thu sawiin, kum chanve kan pelh tawh avangin kumin chhung ngeiin theihtawp tak meuh meuh kan chhuah tlan a tul a, hlawhtling tur chuan Health Department mai ni lo, kan zavaia tanrual a tul a ni, a ti a. Tunhna zawng aiin TB natna chu hriat chian a nih tawh thu leh hmanrua leh damdawi awlsam taka a awm tawh avangin India ram atanga TB nuai bo tura ngawrh lehzuala tanlak a tul thu a sawi bawk.

Larsap chuan TB veite hmakhua ngaia theihtawp chhuahtu Health Minister, Health Department-a thawktute leh eitur tha an dawn theih nana sum leh pai thawhtu Nikshay Mitra-te hmalakna chhuanawm a tih thu a sawi a. Mizorama TB vei enkawl mek mi 1,501 zinga 117 te chauhin Food Basket Support kaltlanga eitur tha an dawng leh a tam zawkin an la dawng lo chu veiawm a tih thu sawiin, Food Basket hmalakna a thlawp zia lantir nan TB vei mi 10 te tana eitur tha pek a tum thu a puang a. NGO, Kohhran leh he hmalakna thlawptu zawng zawngte chu TB veite’n eitur hrisel an dawn kim vek theih nana theihtawp chhuah turin a sawm a. Mizoram chu India rama TB awm lohna State hmasa bera siam thei tura theihtawp chhuahpuiah mizo mipuite a sawm nghal bawk.

Health Minister Pi Lalrinpuii chuan TB um bo turin hmabak tam tak a la awm tih sawiin, khawtlang inpawh leh punkhawm chang nei tam kan nih avangin TB leh boruak atanga inkaidarh theih hrileng lakah kan fimkhur tlan a tul lehzual a ni, a ti a. TB do kawngah Sawrkarin theihtawp a chhuah mek zel thu leh Damdawiin hrang hrangte pawh thuam chak mek zel a nih thu sawiin, TB test leh damdawi man a thlawn veka kalpui a nih bakah ei tur tha leina tur Rs 1,000/- account-ah thun thin a nih thu a sawi a. TB chungchang inzirtir tam zawk neih a tul thu sawiin, TB chu thuawihna leh tanrualna hmanga hneh theih a nih thu a sawi bawk.

He hunah hian Food Basket Support kaltlanga TB veite eitur tha pek kawnga thawh hlawk tak Nikshay Mitra pahnih – NEDFi leh Dr. Laxmi Narayan te hnenah Larsap-in chawimawina a hlan a. TB vei mi 4 te hnenah Food Basket hlan a nih bakah NEDFi in TB vei mi 100 te Food Basket Support kaltlanga an chhawmdawlna tur Rs 4,90,000/- cheque chu TB veite aiawhin Larsap chuan a dawn sak nghal bawk.

Vawiin hun hmanah hian Pu H. Lalengmawia, Commissioner & Secretary, Health & Family Welfare Department chuan inlawmna thu sawiin, program hman chhan a sawifiah a. Dr. Zochhuanawmi, Jt. Director (TB) & State TB Officer-in TB awm lohna State siam tura hmalaknate leh dinhmun tlangpui a sawifiah a. Dr. Lily Chhakchhuak, Mission Director, National Health Mission-in lawmthu sawiin hun hman a titawp a ni.

He huna tarlan nih dan chuan Mizoramah TB vei enkawl mi 1,501 awm mekin, heng zinga 117 te hian Food Basket chhawmdawlna an dawng a, hei hi 7.8% a ni. Nikshay Mitra 76 awm mekin TB vei zinga 32.5% te chu taksa mamawh chaw tha dawng lo ni a chhut a ni. India ram State/UT te TB score siamah Mizoramin point 68 hmuin 12-na dinhmun a hauh a, a hlawhtlinna rate hi 79.50% niin, TB vei zinga 5% velin an thihpui anga chhut a ni. Kum 2024 khan TB vei 2,306 awmin thih pui  136 an awm a ni.